ఇంటర్‌ ప్రశ్నపత్రాలపై క్యూఆర్‌కోడ్‌

ఇంటర్‌ వార్షిక పరీక్షల్లో పేపర్‌ లీకేజీలకు ఆస్కారంలేకుండా బోర్డు పటిష్టచర్యలు చేపడుతున్నది. తొలిసారిగా ప్రతి ప్రశ్నాపత్రంపై క్యూఆర్‌కోడ్‌, పేపర్‌ కోడ్‌ ముద్రిస్తున్నది. ఎవరైనా ప్రశ్నపత్రాలను ఫొటో తీసి పేపర్‌ లీక్‌చేసేందుకు ప్రయత్నిస్తే సులభంగా గుర్తించవచ్చని ఇంటర్‌బోర్డు కార్యదర్శి కృష్ణ ఆదిత్య తెలిపారు.

• వాటర్‌ మార్క్‌ రూపంలో ప్రతిపేజీపై పేపర్‌ కోడ్‌
• పేపర్‌ లీకేజీలను అరికట్టేందుకు చర్యలు

హైదరాబాద్‌, ఫిబ్రవరి 19 (నమస్తే తెలంగాణ) : ఇంటర్‌ వార్షిక పరీక్షల్లో పేపర్‌ లీకేజీలకు ఆస్కారంలేకుండా బోర్డు పటిష్టచర్యలు చేపడుతున్నది. తొలిసారిగా ప్రతి ప్రశ్నాపత్రంపై క్యూఆర్‌కోడ్‌, పేపర్‌ కోడ్‌ ముద్రిస్తున్నది. ఎవరైనా ప్రశ్నపత్రాలను ఫొటో తీసి పేపర్‌ లీక్‌చేసేందుకు ప్రయత్నిస్తే సులభంగా గుర్తించవచ్చని ఇంటర్‌బోర్డు కార్యదర్శి కృష్ణ ఆదిత్య తెలిపారు. ఏ సెంటర్‌లో, ఏ విద్యార్థి వద్ద నుంచి పేపర్‌ లీక్‌ అయ్యిందన్న సమాచారాన్ని సులభంగా పొందవచ్చు. ఇంటర్‌ పరీక్షలు మార్చి 5 నుంచి 25 వరకు జరుగనున్నాయి. ఈ నేపథ్యంలోనే ప్రశ్నాపత్రాల ప్రతి పేజీపై క్యూఆర్‌కోడ్‌, పేపర్‌ కోడ్‌ను ఇంటర్‌బోర్డు ముద్రించనుంది. పేపర్‌ కోడ్‌ను వాటర్‌ మార్క్‌ రూపంలో ముద్రించారు. అత్యధికంగా ఇంగ్లిష్‌ సబ్జెక్టులో 10 లక్షల ప్రశ్నపత్రాలను ముద్రిస్తున్నారు. అంటే ఈ 10లక్షల ప్రశ్నపత్రాలపై క్యూఆర్‌ కోడ్‌ ఉండటంతోపాటు, 10 లక్షల నంబర్లను ముద్రిస్తారు.