హరీశ్‌రావు మామకు హైకోర్టులో ఊరట.. హనుమంతరావు భూమి స్వాధీనంపై చర్యలొద్దని ఆదేశాలు

Harish Rao | బీఆర్‌ఎస్‌ ఎమ్మెల్యే, మాజీ మంత్రి హరీశ్‌రావు మామ మాధవరపు హనుమంతరావుకు చెందిన 3.22 ఎకరాల భూమి స్వాధీనం వ్యవహారంలో బలవంతపు చర్యలు తీసుకోవద్దని హైకోర్టు ఆదేశించింది.

Harish Rao | హైదరాబాద్‌, అక్టోబర్‌ 12 (నమస్తే తెలంగాణ) : బీఆర్‌ఎస్‌ ఎమ్మెల్యే, మాజీ మంత్రి హరీశ్‌రావు మామ మాధవరపు హనుమంతరావుకు చెందిన 3.22 ఎకరాల భూమి స్వాధీనం వ్యవహారంలో బలవంతపు చర్యలు తీసుకోవద్దని హైకోర్టు ఆదేశించింది. సిద్దిపేట జిల్లా కొండపాక మండలం వెలికట్ట గ్రామ పరిధిలోని ఈ భూమికి సంబంధించి సెప్టెంబర్‌ 29న అధికారులు జారీచేసిన షోకాజ్‌ నోటీసును సవాలు చేస్తూ హనుమంతరావు దాఖలు చేసిన పిటిషన్‌పై జస్టిస్‌ ఎన్వీ శ్రవణ్‌కుమార్‌ సోమవారం విచారణ చేపట్టారు.

షోకాజ్‌ నోటీసు ఆధారంగా పిటిషనర్‌ను భూమి నుంచి ఖాళీ చేయించడం సహా ఎలాంటి బలవంతపు చర్యలు తీసుకోరాదని మధ్యంతర ఆదేశాలు జారీచేశారు. నోటీసుకు సంబంధించి పూర్తి వివరాలతో కౌంటరు దా ఖలు చేయాలని రెవెన్యూ అధికారులను ఆదేశిస్తూ తదుపరి విచారణను నవంబర్‌ 2వ తేదీకి వాయిదా వేశారు. పిటిషనర్‌ తరఫున సీనియర్‌ న్యాయవాది జే రామచంద్రరావు వాదనలు వినిపిస్తూ, హనుమంతరావు చాలా ఏండ్ల క్రితమే పట్టాదా రు నుంచి కొనుగోలు చేశారని చెప్పారు.