ఆరోగ్యంలో తెలంగాణ భేష్‌

• పనితీరు, పురోగతిలో దేశంలో మూడో స్థానం
• లోక్‌సభలో మరోసారి స్పష్టం చేసిన కేంద్రం

హైదరాబాద్‌, ఫిబ్రవరి 11 (నమస్తే తెలంగాణ): ఆరోగ్య రంగంలో దేశంలోనే తెలంగాణ రాష్ట్రం మూడో స్థానంలో ఉన్నదని కేంద్ర ప్రభుత్వం మరోసారి స్పష్టం చేసింది. నీతి ఆయోగ్‌ హెల్త్‌ ఇండెక్స్‌-4పై లోక్‌సభలో అడిగిన ప్రశ్నకు శుక్రవారం కేంద్ర ప్రభుత్వం లిఖిత పూర్వక సమాధానం ఇచ్చింది. 2019-20 ఆర్థిక సంవత్సరంలో అన్ని రాష్ర్టాలు, కేంద్రపాలిత ప్రాంతాల్లో వైద్యారోగ్య రంగం పనితీరును విశ్లేషిస్తూ నీతి ఆయోగ్‌ గతేడాది డిసెంబర్‌ 27న 4వ హెల్త్‌ ఇండెక్స్‌ను విడుదల చేసిందని చెప్పింది. శాంపిల్‌ రిజిస్ట్రేషన్‌, సివిల్‌ రిజిస్ట్రేషన్‌, హెల్త్‌ మేనేజ్‌మెంట్‌ ఇన్ఫర్మేషన్‌ సిస్టమ్స్‌ వంటి 24 అంశాలను పరిగణనలోకి తీసుకొని సమాచారాన్ని సేకరించిందని పేర్కొన్నది. 2019-20లో పనితీరు (ఒవరాల్‌ పర్ఫార్మెన్స్‌)ను, 2018-19తో పోల్చి పురోగతిని (ఇంక్రిమెంటల్‌ పర్ఫార్మెన్స్‌) గణించి పాయింట్లు ఇచ్చినట్టు వెల్లడించింది. పెద్ద రాష్ర్టాల క్యాటగిరీలో తెలంగాణ ఒవరాల్‌ పర్ఫార్మెన్స్‌, ఇంక్రిమెంటల్‌ పర్ఫార్మెన్స్‌ విభాగాల్లో మూడో స్థానంలో నిలిచినట్టు స్పష్టం చేసింది.

తెలంగాణ ముందువరుసలో నిలిచిన అంశాలు..

• 2019-20లో వైద్యారోగ్య రంగంలో 100 పాయింట్లకుగాను 69.95 పాయింట్లు సాధించి ఉత్తమ పనితీరు కనబరిచిన రాష్ర్టాల జాబితాలో మూడో స్థానంలో నిలిచింది.
• 2018-19లో 65.74 స్కోర్‌తో నాలుగో స్థానంలో నిలిచింది. ఏడాదిలో 4.22 పాయింట్లు మెరుగుపరుచుకున్నది.
• ప్రభుత్వ దవాఖానల్లో ప్రసవాలలో 96.3 శాతంతో దేశంలోనే అగ్రస్థానంలో నిలిచింది. 2014-15, 2019-20 మధ్య పోల్చినప్పుడు ఉత్తమ పురోగతి సాధించిన రాష్ట్రంగా నిలిచింది.
• పిల్లల టీకాలలో దేశంలోనే అగ్రభాగాన నిలిచింది. రాష్ట్రంలో 100 శాతం మంది పిల్లలకు టీకాలు వేసినట్టు స్పష్టం చేసింది.
• 2019-20లో 100 శాతం బర్త్‌ రిజిస్ట్రేషన్లు జరిగాయి.
• రాష్ట్రస్థాయి దవాఖానల్లో బెడ్‌ ఆక్యుపెన్సీ పాజిటివ్‌ వృద్ధిలో దేశంలోనే మూడో స్థానంలో నిలిచింది.
• స్వచ్ఛభారత్‌ అభియాన్‌ కింద ఆరోగ్య కేంద్రాలకు ఇచ్చే ‘కాయకల్ప్‌ స్కోర్‌’ 70 శాతానికిపైగా ఉన్న జిల్లా దవాఖానల జాబితాలో అగ్రస్థానంలో ఉన్నది. తెలంగాణ, కర్ణాటకలో మాత్రమే 100 శాతం ఉన్నట్టు నివేదిక వెల్లడించింది.
• పీహెచ్‌సీలు, యూపీహెచ్‌సీలన్నీ ‘హెల్త్‌ అండ్‌ వెల్‌నెస్‌ సెంటర్లు’గా పనిచేస్తున్నాయి. దేశంలో ఏపీ,
• తెలంగాణ మాత్రమే ఈ ఘనత సాధించాయి.
• జిల్లా దవాఖానల్లో బాలింతల వార్డులు (లేబర్‌ రూం) కేంద్ర ఆరోగ్య, కుటుంబ సంక్షేమ మంత్రిత్వ శాఖ
• నిర్దేశించిన ప్రమాణాల ప్రకారం ఉన్న ఏకైక రాష్ట్రంగా నిలిచింది. రాష్ట్రంలోని అన్ని జిల్లా దవాఖానలు లేబర్‌ రూం క్వాలిటీ ఇంప్రూమెంట్‌ ఇనీషియేటివ్‌ (లక్ష్య) సర్టిఫికెట్‌ పొందాయి.
• అన్ని జిల్లా దవాఖానల్లో 100 శాతం మెటర్నిటీ ఆపరేషన్‌ థియేటర్లు ఉండి లక్ష్య సర్టిఫికెట్‌ పొందిన ఏకైక రాష్ట్రంగా నిలిచింది.
• టీబీ కేసుల గుర్తింపులోనూ టాప్‌లో నిలిచింది. 2019-20లో వందశాతం నమోదైనట్టు నీతి ఆయోగ్‌ నివేదిక వెల్లడించింది.