వెబ్‌సైట్‌లో టెట్‌ హాల్‌టికెట్లు

ఉపాధ్యాయ అర్హత పరీక్ష (టెట్‌) హాల్‌టికెట్లు విడుదలయ్యాయి. ఈసారి టెట్‌ పేపర్‌-1కు 2,69,557 దరఖాస్తులు, పేపర్‌-2కు 2,08,498 దరఖాస్తులు వచ్చాయి. ఈ నెల 15న ఉదయం 9:30 నుంచి మధ్యాహ్నం 12 గంటల వరకు మొదటి పేపర్‌, మధ్యాహ్నం 2:30 నుంచి సాయంత్రం 5 గంటల వరకు రెండో పేపర్‌కు పరీక్ష నిర్వహిస్తారు.

• పరీక్ష రోజు తప్పుల సవరణకు చాన్స్‌
• 15న రెండు సెషన్లలో పరీక్షలు

హైదరాబాద్‌, సెప్టెంబర్‌ 9 (నమస్తే తెలంగాణ): ఉపాధ్యాయ అర్హత పరీక్ష (టెట్‌) హాల్‌టికెట్లు విడుదలయ్యాయి. ఈసారి టెట్‌ పేపర్‌-1కు 2,69,557 దరఖాస్తులు, పేపర్‌-2కు 2,08,498 దరఖాస్తులు వచ్చాయి. ఈ నెల 15న ఉదయం 9:30 నుంచి మధ్యాహ్నం 12 గంటల వరకు మొదటి పేపర్‌, మధ్యాహ్నం 2:30 నుంచి సాయంత్రం 5 గంటల వరకు రెండో పేపర్‌కు పరీక్ష నిర్వహిస్తారు. ఈ ఏడాది 1,139 పరీక్ష కేంద్రాలను ఏర్పాటు చేశారు. హైదరాబాద్‌లో అత్యధికంగా 92, అతి తక్కువగా ములుగు జిల్లాలో 8 పరీక్ష కేంద్రాలను ఏర్పాటు చేశారు. ఈ మేరకు రాష్ట్ర విద్యా శిక్షణ పరిశోధన సంస్థ (ఎస్సీఈఆర్టీ) అధికారులు హాల్‌టికెట్లను వెబ్‌సైట్‌లో పొందుపరిచారు. దరఖాస్తుల్లో తప్పులుంటే పరీక్ష రోజు సవరించుకోవచ్చని అధికారులు పేర్కొన్నారు. ఇన్విజిలెటర్‌ను సంప్రదించి తప్పుగా నమోదైన వివరాలను నామినల్‌ రోల్స్‌లో సవరించుకోవచ్చని సూచించారు. ఇదే విషయాన్ని హాల్‌టికెట్లల్లోనూ పొందుపరిచారు.

టెట్‌ అభ్యర్థులకు సూచనలు

• హాల్‌టికెట్‌ డౌన్‌లోడ్‌ చేసుకున్న తర్వాత పూర్తి వివరాలను సరిచూసుకోవాలి.
• పేరులో స్వల్ప అక్షర దోషాలు, తండ్రి పేరు, తల్లి పేరు, పుట్టిన తేదీ, జెండర్‌, డిసేబిలిటీ వంటి వివరాలు సరిగా లేకుంటే పరీక్ష హాలులో నామినల్‌ రోల్‌ కమ్‌ ఫొటో ఐడెంటిటీలో సవరించుకోవాలి.
• హాల్‌టికెట్‌పై ఫొటో, సంతకం సరిగ్గా లేకపోతే అభ్యర్థుల ఇటీవలి తాజా ఫొటోను అతికించి గెజిటెడ్‌ అధికారితో అటెస్టేషన్‌ చేయించుకొని, ఆధార్‌ కార్డు, ఇతర ఐడీతో సంబంధిత జిల్లా డీఈవోను సంప్రదించాలి. డీఈవో పర్మిషన్‌ అనంతరమే పరీక్షకు అనుమతించడంలో తగు నిర్ణయం తీసుకుంటారు.
• పరీక్షాకేంద్రం చిరునామాను ఒకరోజు ముందుగానే సంప్రదించడం ఉత్తమం.