విద్యార్థి సంఘాల ఎలక్షన్స్‌ పెట్టాలి

రాష్ట్రంలోని యూనివర్సిటీల్లో విద్యార్థి సంఘాలకు స్టూడెంట్‌ యూనియన్‌ ఎలక్షన్స్‌ నిర్వహించాలని తెలంగాణ విద్యాకమిషన్‌ సర్కారుకు సిఫారసు చేయనున్నది. వర్సిటీలు, డిగ్రీ కాలేజీల్లో విద్యార్థి సంఘాలకు ఎన్నికలు నిర్వహించాలని సూచించనున్నది.

• 50 నుంచి 60 సంఘాలతో అనేక ఇబ్బందులొస్తున్నాయి
• నాన్‌ బోర్డర్లు తిష్టవేశారు.. వారిని బయటికి పంపించాలి
• వర్సిటీల్లో పరిస్థితులపై విద్యాకమిషన్‌ అధ్యయనం
• నెల రోజుల్లో సర్కారుకు నివేదిక

హైదరాబాద్‌, నవంబర్‌ 11 (నమస్తే తెలంగాణ) : రాష్ట్రంలోని యూనివర్సిటీల్లో విద్యార్థి సంఘాలకు స్టూడెంట్‌ యూనియన్‌ ఎలక్షన్స్‌ నిర్వహించాలని తెలంగాణ విద్యాకమిషన్‌ సర్కారుకు సిఫారసు చేయనున్నది. వర్సిటీలు, డిగ్రీ కాలేజీల్లో విద్యార్థి సంఘాలకు ఎన్నికలు నిర్వహించాలని సూచించనున్నది. రాష్ట్రంలోని విశ్వవిద్యాలయాల్లో స్థితిగతులపై విద్యాకమిషన్‌ సమగ్ర అధ్యయనం చేసింది. ఇప్పటికే ప్రాథమిక నివేదికను కమిషన్‌ సిద్ధం చేసింది.

సమగ్ర నివేదికను నెల రోజుల్లో సర్కారుకు సమర్పించనున్నది. 50-60 విద్యార్థి సంఘాలున్నాయని, ఈ సంఘాలతో ఇబ్బందులొస్తున్నాయని, వీటిని నియంత్రించాలన్న అభిప్రాయానికి కమిషన్‌ వచ్చింది. ఏదైనా సమస్య తలెత్తితే గెలిచిన గుర్తింపు సంఘంతో వర్సిటీ చర్చించి ఓ నిర్ణయానికి వచ్చే అవకాశం ఉంటుందని కమిషన్‌ వాదన. సంఘాలు అధికంగా ఉండటం, ఆందోళనలు చేపట్టడంతో వాతావరణం దెబ్బతింటుందన్న యోచనలో కమిషన్‌ వర్గాలున్నాయి. ఇక వర్సిటీల్లో తిష్టవేసిన నాన్‌బోర్డర్లను బయటికి పంపించాలని, 75% హాజరును పకడ్బందీగా అమలుచేయాలని సిఫారసు చేయనున్నది.

కమిషన్‌ సిఫారసుల్లో కొన్ని

• వర్సిటీల్లో నాన్‌బోర్డర్లు తిష్టవేశారు. ఉస్మానియాలో ఈ సమస్య మరింత తీవ్రంగా ఉంది. ఒక్కో గదిలో ఐదుగురు బోర్డర్లు ఉంటే, మరో ఐదుగురు నాన్‌బోర్డర్లు ఉన్నారు. నాన్‌ బోర్డర్లను బయటికి పంపించాలి.
• ఉన్నత చదువులకు వేదిక అయిన వర్సిటీల్లో కులతత్వాన్ని పెంచిపోషిస్తున్నారు. ఇది అత్యంత బాధాకరం.
• వర్సిటీల్లో ర్యాగింగ్‌ సమస్య ఉంది. సీనియర్లు, నాన్‌బోర్డుర్లు జూనియర్‌ విద్యార్థులను భయపెడుతున్నారు. బోర్డర్లకు రక్షణ కల్పించాలి.
• నిధుల కొరత ఉంది. రాష్ట్ర బడ్జెట్‌లో విద్యకు 15% నిధులు కేటాయించాలి.
• యూనివర్సిటీల్లో ఫ్యాకల్టీ కొరత ఉంది. తక్షణమే 400 పోస్టులు భర్తీచేయాలి.
• రీసెర్చ్‌, పరిశోధనలు ఏ మాత్రం ఆశాజనకంగా లేవు. అకాడమిక్‌ ఇంటరాక్షన్‌ దెబ్బతిన్నది. దీనిని పునరుద్ధరించాలి.
• హాస్టళ్లల్లో సమస్యలు రాజ్యమేలుతున్నాయి. విద్యార్థులకు సరిపడా కొత్త హాస్టళ్లను నిర్మించాలి. క్యాంపస్‌ చుట్టూ ప్రహరీలు నిర్మించాలి.
• డ్రగ్స్‌, మాదకద్రవ్యాలతో పెను ప్రమాదం పొంచి ఉన్నది. డ్రగ్స్‌ను అరికట్టేందుకు చర్యలు చేపట్టాలి.
• క్యాంపస్‌ల్లో బయటి వ్యక్తులొచ్చి మందుపార్టీలు చేసుకుంటున్నారు. వర్సిటీలను క్లోజ్డ్‌ క్యాంపస్‌లు చేయాలి. బయటి వ్యక్తులు రాకుండా నియంత్రించాలి.