రాష్ట్ర ఓటర్లు 3.34 కోట్లు

రాష్ట్రంలో ప్రస్తుత ఓటర్ల సంఖ్య 3,34,26,323 ఉన్నట్టు రాష్ట్ర చీఫ్‌ ఎలక్టోరల్‌ ఆఫీసర్‌(సీఈవో) సుదర్శన్‌రెడ్డి తెలిపారు. ఈ మేరకు సీఈవో కార్యాలయంలో శనివారం ఏర్పాటుచేసిన విలేకరుల సమావేశంలో కొత్త ఓటర్‌ జాబితా విడుదల చేశారు.

• పురుషులు 1.66 కోట్లు, మహిళలు 1.68 కోట్లు
• ఈ సారి కొత్తగా 8,02,805 ఓటర్లు నమోదు
• 9, 10 తేదీల్లో ఓటరు జాబితా వెరిఫికేషన్‌ క్యాంపెయిన్‌
• అభ్యంతరాలకు ఈ నెల 28 వరకు గడువు
• వచ్చే ఏడాది జనవరి 6న ఓటర్ల తుది జాబితా
• కొత్త ఓటర్‌ జాబితా విడుదల చేసిన సీఈవో

హైదరాబాద్‌, నవంబర్‌ 2 (నమస్తే తెలంగాణ) : రాష్ట్రంలో ప్రస్తుత ఓటర్ల సంఖ్య 3,34,26,323 ఉన్నట్టు రాష్ట్ర చీఫ్‌ ఎలక్టోరల్‌ ఆఫీసర్‌(సీఈవో) సుదర్శన్‌రెడ్డి తెలిపారు. ఈ మేరకు సీఈవో కార్యాలయంలో శనివారం ఏర్పాటుచేసిన విలేకరుల సమావేశంలో కొత్త ఓటర్‌ జాబితా విడుదల చేశారు. రివైజ్డ్‌ ఓటర్‌ జాబితాలను అక్టోబర్‌ 29న విడుదల చేసినట్టు చెప్పారు. ఈ ఏడాది ఫిబ్రవరి 8 నుంచి అక్టోబర్‌ 20 వరకు ఓటరు నమోదు నిర్వహించినట్టు తెలిపారు. మొత్తం ఓటర్లలో 1,66,16,446 మంది పురుషులు, 1,68,07,100 మంది మహిళా ఓటర్లు ఉన్నట్టు వెల్లడించారు. అయితే పురుష ఓటర్ల కంటే మహిళా ఓటర్లు 1,90,654 మంది అధికంగా ఉన్నట్టు తెలిపారు. థర్డ్‌ జెండర్లు 2,777 మంది ఓటర్లుగా నమోదైనట్టు చెప్పారు. మొత్తం ఓటర్లలో కొత్త ఓటర్లు(18 నుంచి 19 ఏండ్లవారు)4,73,838 మంది, వృద్ధులు(85 ఏండ్లు పైబడినవారు)2,25,462 మంది, వికలాంగులు 5,28,085 మంది, ఓవర్సీస్‌ 3,578 మంది నమోదైనట్టు వివరించారు. ఓటర్ల సవరింపు ప్రక్రియలోభాగంగా రాష్ట్ర వ్యాప్తంగా 8,02,805 మంది ఓటర్లను తొలగించామని, కొత్తగా 4,14,165 మంది నమోదయ్యారని, 5,93,956 మంది మార్పులు, చేర్పులు చేసుకున్నట్టు సీఈవో తెలిపారు.

ముఖ్యంశాలు ఇలా..

• కొత్త ఓటర్లు, సవరణలు, మార్పుల కోసం ఈ నెల 9, 10 తేదీల్లో ప్రత్యేక డ్రైవ్‌ నిర్వహించాలని నిర్ణయించారు.
• ఉదయం 10 నుంచి సాయంత్రం 5 వరకు ఓటర్‌ జాబితా వెరిఫికేషన్‌కు అవకాశం కల్పించారు.
• ఈ మేరకు ఆయా పోలింగ్‌ స్టేషన్లలో జాబితాలు అందుబాటులో ఉంచనున్నారు.
• ఓటర్ల జాబితాలపై అభ్యంతరాలకు, ఓటర్ల నమోదుకు ఈ నెల 28 వరకు గడువు విధించారు.
• వచ్చే ఏడాది జనవరి 6న ఓటర్ల తుది జాబితా వెల్లడించనున్నారు.
• ఈ ఓటర్‌ జాబితా ఆన్‌లైన్‌తోపాటు ఆఫ్‌లైన్‌లోనూ అందుబాటులో ఉంచుతారు.
• జనవరి 1, 2025 నాటికి 18 ఏండ్లు నిండినవారు కొత్తగా ఎన్‌రోల్‌మెంట్‌కు ఈ నెల 28 వరకు గడువు ఇచ్చారు.
• ఓటర్ల నమోదుకు సంబంధించి పూర్తిసమాచారం కోసం టోల్‌ఫ్రీ నంబర్‌ 1950కి ఫోన్‌ చేసి తెలుసుకోవచ్చు.