Nirmala Sitharaman | ఆర్థిక మంత్రీ.. అభివృద్ధి మరిచారా?

‘తెలంగాణ రాష్ట్రం ఏర్పడినప్పుడు రెవెన్యూ మిగులుతో ఉండేది. పదేండ్లలో అప్పుల్లో మునిగిపోయింది’.. కేంద్ర ఆర్థిక మంత్రి నిర్మలా సీతారామన్‌ గురువారం రాజ్యసభలో చేసిన వ్యాఖ్యలు ఇవి. అంతేకాదు, కేంద్రంలోని ఎన్డీఏ ప్రభుత్వం విభజన హామీలను నెరవేర్చిందని చెప్పుకొచ్చారు.

• రాష్ట్రం అప్పుల కుప్పగా మారిందన్న నిర్మలా సీతారామన్‌
• విభజన హామీలన్నీ నెరవేర్చినట్టు చెప్పుకొచ్చిన కేంద్ర మంత్రి
• పదేండ్ల అభివృద్ధి కనిపించలేదా? అంటూ నిర్మలపై విమర్శలు
• తెలంగాణ నంబర్‌ వన్‌గా ఎదిగిందంటూ గతంలో ప్రశంసలు
• ఎన్డీఏ హయంలో పదేండ్లలో 119 లక్షల కోట్ల అప్పులు

Nirmala Sitharaman | హైదరాబాద్‌, ఫిబ్రవరి 13 (నమస్తే తెలంగాణ): ‘తెలంగాణ రాష్ట్రం ఏర్పడినప్పుడు రెవెన్యూ మిగులుతో ఉండేది. పదేండ్లలో అప్పుల్లో మునిగిపోయింది’.. కేంద్ర ఆర్థిక మంత్రి నిర్మలా సీతారామన్‌ గురువారం రాజ్యసభలో చేసిన వ్యాఖ్యలు ఇవి. అంతేకాదు, కేంద్రంలోని ఎన్డీఏ ప్రభుత్వం విభజన హామీలను నెరవేర్చిందని చెప్పుకొచ్చారు. ఈ వ్యాఖ్యలపై ఆర్థిక నిపుణలు, తెలంగాణవాదులు మండిపడుతున్నారు.

కేంద్ర మంత్రి వ్యాఖ్యలు గురివింద గింజను తలపిస్తున్నాయని మండిపడుతున్నారు. పదేండ్లలో తెలంగాణ చేసిన అప్పుల గురించి మాట్లాడిన నిర్మలా సీతారామన్‌.. అదే పదేండ్లలో తెలంగాణలో జరిగిన అభివృద్ధిని ఎందుకు ప్రశంసించలేదని ప్రశ్నిస్తున్నారు. తలసరి ఆదాయం, జీఎస్డీపీ, సొంత పన్ను ఆదాయం, బడ్జెట్‌.. ఇలా ఆర్థిక వృద్ధికి కొలమానాలుగా పిలిచే అన్ని ప్రమాణాల్లోనూ తెలంగాణ సాధించిన విజయాలను ఎందుకు

ప్రస్తావించలేదని నిలదీస్తున్నారు.

• తెలంగాణ ఏర్పడినప్పుడు రాష్ట్ర జీఎస్డీపీ రూ.5 లక్షల కోట్లు మాత్రమే ఉండేది. 2023-24 నాటికి రూ.14.63 లక్షల కోట్లకు చేరింది. అంటే, దాదాపు మూడు రెట్లు పెరిగింది. ఈ ఘనతను ఎందుకు ప్రస్తావించలేదని ప్రశ్నిస్తున్నారు. ఇదే సమయంలో ఎన్డీఏ పాలనలో దేశ జీడీపీ రూ.124 లక్షల కోట్ల నుంచి రూ.295 లక్షల కోట్లకు పెరిగిందని.. అంటే, రెండున్నర రెట్లు కూడా పెరగలేదని గుర్తుచేస్తున్నారు.
• 2014-15లో తెలంగాణ తలసరి ఆదాయం రూ.1.24 లక్షలు మాత్రమేనని, ఇప్పుడు దాదాపు రూ.3.5 లక్షలకు పెరిగిందని గుర్తు చేస్తున్నారు. దాదాపు మూడు రెట్ల పెరుగుదల కేంద్ర మంత్రికి కనిపించలేదా? అని అడుగుతున్నారు. తలసరి ఆదాయ వృద్ధిలో దేశంలోనే మొదటిస్థానంలో నిలిచిన విషయాన్ని ఎందుకు ప్రస్తావించలేదని ప్రశ్నిస్తున్నారు. ఇదే పదేండ్లలో దేశ తలసరి ఆదాయం రూ.86,647 నుంచి రెట్టింపయ్యి రూ.1,83,236కు మాత్రమే పెరిగిందని చెప్తున్నారు. ఈ వ్యత్యాసాన్ని నిర్మల ఎందుకు ఒప్పుకోలేదని ప్రశ్నిస్తున్నారు.
• రాష్ట్రం ఏర్పడినప్పుడు బడ్జెట్‌ రూ.లక్ష కోట్లు మాత్రమే. ఇప్పుడు రూ.2.92 లక్షల కోట్లకు పెరిగింది. మూడు రెట్లు పెరగడం తెలంగాణ సాధించిన ఘనత కాదా? అని నిలదీస్తున్నారు.
• 2014-15లో సొంత పన్నుల రాబడి రూ.29,288 కోట్లు మాత్రమే ఉండేదని, 2023-24 నాటికి రూ.1,38,181కు పెరిగిందని గుర్తుచేస్తున్నారు. నాలుగున్నర రెట్లకుపైగా పెరిగిన అభివృద్ధి కనిపించలేదా? అని కేంద్ర మంత్రిని ప్రశ్నిస్తున్నారు.

దేశ అప్పులు కనిపించలేదా?

రాజ్యసభలో తెలంగాణ అప్పులను ప్రస్తావించిన కేంద్ర ఆర్థిక మంత్రి.. తమ హయాంలో చేసిన దేశ అప్పులను ఎందుకు వివరించలేదన్న ప్రశ్నలు వినిపిస్తున్నాయి. ఎన్డీఏ అధికారంలోకి వచ్చేనాటికి దేశ అప్పులు రూ.62.78 లక్షల కోట్లు మాత్రమే. కానీ.. పదేండ్ల తర్వాత 2024-25 నాటికి అప్పులు రూ.181.74 లక్షల కోట్లకు చేరాయి. అంటే రూ.119 లక్షల కోట్లు పెరిగింది. పదేండ్లలో మూడు రెట్ల అప్పులు పెంచిన ఘనతను ఎందుకు పెద్దల సభలో చెప్పుకోలేదని ఎద్దేవా చేస్తున్నారు. తాజా బడ్జెట్‌ లెక్కల ప్రకారం ఈ ఏడాది మరో రూ.15 లక్షల కోట్ల అప్పులు చేయనున్నారని, మరి ఈ విషయాన్ని ఎందుకు ప్రస్తావించలేదని ప్రశ్నిస్తున్నారు.

అన్నీ ఇచ్చినట్టు గప్పాలు ఎందుకు?

విభజన చట్టంలోని హామీలను దాదాపు నెరవేర్చామని కేంద్ర మంత్రి చెప్పడంపైనా తీవ్ర అభ్యంతరాలు వ్యక్తంచేస్తున్నారు. పైగా తాము మాటలతో కాకుండా చేతల ద్వారా సమాధానం ఇస్తున్నామనడంపై మండిపడుతున్నారు. బయ్యారం ఉక్కు ఫ్యాక్టరీ, ప్రాజెక్టుకు జాతీయ హోదా ఏమైందని ప్రశ్నిస్తున్నారు. షెడ్యూల్‌ 9,10లోని సంస్థల విభజన ఇంకా పెండింగ్‌లో ఎందుకు ఉన్నదని నిలదీస్తున్నారు. ఇలా ప్రధాన సమస్యలను నెరవేర్చకుండా పూర్తి చేశామని చెప్పుకోవడం ఏమిటని ప్రశ్నిస్తున్నారు.