Urea | యూరియా తిప్పలు.. క్యూలైన్లో చెప్పులు, ఖాళీ మద్యం సీసాలు
రాష్ట్రంలో యూరియా (Urea) కోసం రైతుల తిప్పలు కొనసాగుతూనే ఉన్నాయి. ఒక్క బస్తా కోసం తిండీ తిప్పలు మాని క్యూలైన్లలో పడరానిపాట్లు పడుతున్నారు. ఎరువులు వచ్చాయని తెలిస్తే చాలు పెద్ద సంఖ్యలో అన్నదాతలు సహకార సంఘాలు, ఆగ్రో కేంద్రాలకు తరలిసవస్తున్నారు.
ములుగు: రాష్ట్రంలో యూరియా (Urea) కోసం రైతుల తిప్పలు కొనసాగుతూనే ఉన్నాయి. ఒక్క బస్తా కోసం తిండీ తిప్పలు మాని క్యూలైన్లలో పడరానిపాట్లు పడుతున్నారు. ఎరువులు వచ్చాయని తెలిస్తే చాలు పెద్ద సంఖ్యలో అన్నదాతలు సహకార సంఘాలు, ఆగ్రో కేంద్రాలకు తరలిసవస్తున్నారు. క్యూలైన్లలో చెప్పులు, పాస్ పుస్తకాలు, కట్టెలు, రాళ్లు పెట్టి తమ వంతు కోసం వేచిచూస్తున్నారు.
ములుగు జిల్లా మల్లంపల్లి మండలం రామచంద్రాపురంలో యూరియా కోసం రైతులు తమ చెప్పులతో పాటు ఖాళీ మద్యం సీసాలను క్యూ లైన్లో ఉంచారు.

ఉసురు తీస్తున్న యూరియా!
రాష్ట్రంలో యూరియా కొరత రైతులకు ప్రాణసంకటంగా మారింది. ఒక్క యూరియా బస్తా కోసం రైతులు తమ ప్రాణాలు కోల్పోతున్న దుర్భర పరిస్థితులు నెలకొన్నాయి. పంటలకు ప్రాణం పోయాల్సిన యూరియా.. కాంగ్రెస్ సర్కారు తీరుతో రైతుల ప్రాణాలు బలిగొంటున్నది. మరికొన్నిచోట్ల యూరియా కోసం జరిగిన తోపులాటల్లో రైతుల కాళ్లు, చేతులు విరిగిపోతున్నాయి. తలలు పగులుతున్నాయి. ఒక్కమాటలో చెప్పాలంటే, యూరియా కొరత పచ్చని పల్లెల్లో చిచ్చు రేపుతున్నది. అన్నదమ్ముల్లాంటి రైతుల మధ్య అగ్గిరాజేస్తున్నది. ఎప్పుడూ కలిసి మెలిసి ఉండే రైతులు యూరియా కోసం తన్నుకొనే పరిస్థితి ఏర్పడింది.
యూరియా కొరత కుటుంబాల్లోనూ చిచ్చు పెడుతున్నది. భార్యభర్తలు, తండ్రీ కొడుకుల మధ్య గొడవలకు కారణమవుతున్నది. ఇప్పటివరకు మీడియా సమాచారం మేరకు ఐదుగురు రైతులు యూరియా కొరత కారణంగా మరణించారు. ఈ సంఖ్య ఎక్కువగానే ఉండొచ్చని భా విస్తున్నారు. యూరియా కోసం వెళ్తూ రోడ్డు ప్ర మాదంలో మరణించిన వారు కొందరైతే.. యూ రియా పెట్టిన చిచ్చు కారణంగా తలెత్తిన గొడవల్లో మరణించిన వారు మరికొందరు. క్యూలైన్లలో నిల్చోలేక కొంతమంది రైతులు సొమ్మసిల్లి పడిపోతుంటే.. క్యూలైన్లలో జరిగిన తోపులాటల్లో మరికొందరు రైతులు గాయపడ్డారు.
ప్రాణాలు కోల్పోయిన రైతులు
- భద్రాద్రి కొత్తగూడెం జిల్లా ఇల్లెందు మండలం సేవాతండాకు చెందిన యువ రైతు కున్సోత్ సుమన్(30) యూరియా కోసం క్యూ కట్టారు. అక్కడ జరిగిన తోపులాటలో సుమన్ తన వద్ద ఉన్న డబ్బులను పోగొట్టుకున్నారు. ఈ విషయాన్ని తన భార్యతో చెప్పగా ఇద్దరి మధ్య తీవ్ర గొడవ జరిగింది. దీంతో మనస్థాపం చెందిన సుమన్ పురుగుల మందు తాగి ఆత్మహత్య చేసుకున్నారు.
- పక్కూరులో యూరియా టోకెన్లు ఇస్తున్నారని ఉదయం 6 గంటలకు బైక్పై వెళ్లిన రైతు లు బానోత్ లాల్య, ధరావత్ వీరన్న మహబూబాబాద్ జిల్లా గూడూరు మండలం జగన్యాయకులుగూడెం వద్ద జరిగిన రోడ్డు ప్రమాదంలో మృత్యువాత పడ్డారు. వీరి బైక్ను బోలేరో వాహనం ఢీ కొనడంతో ఇద్దరు అక్కడికక్కడే మృతి చెందారు.
- మంచిర్యాల జిల్లా తాండూరు మండలం గోపాల్రావు పేటలో యూరియా ఇస్తున్నారని తెలిసి రైతు మల్లేశ్ క్యూలో నిల్చున్నాడు. అయితే ఒక్కొక్కరికి ఒకే బస్తా ఇస్తుండటంతో తన భార్య నానక్కను కూడా రావాలని ఫోన్ చేసి చెప్పాడు. దీంతో అదే గ్రామానికి చెందిన పిట్ల మారుతి బైక్పై వెళ్తున్నారు. ఎదురుగా వచ్చిన స్కూల్ బస్సు.. బండిని ఢీ కొట్టడంతో పోగుల నానక్క అక్కడికక్కడే మృతి చెందగా, మారుతికి కాలు విరిగింది.
- నల్లగొండ జిల్లా అడవిదేవునిపల్లి గోన్యాతండాకు చెందిన గిరిజన మహిళా రైతు పాతులోత్ దస్సి యూరియా కోసం వెళ్లగా తొక్కిసలాట జరిగి గాయపడి మృతి చెందింది.
తీవ్రంగా గాయపడ్డ రైతులు
- మహబూబాబాద్ జిల్లాలో పక్క గ్రామంలో యూరియా కోసం 12 మంది రైతులు ఆటోలో వెళ్తుండగా, అది బోల్తా పడటంతో ముగ్గురు రైతులకు తీవ్ర గాయాలు కాగా మిగిలిన వారి గాయాలతో బయపడ్డారు.
- మహబూబాబాద్ జిల్లా కొత్తగూడలో యూ రియా దొరకడం లేదని, పంటలు నాశనమైతున్నాయనే ఆవేదనతో రైతు నర్సయ్య పురుగుల మందు తాగి ఆత్మహత్యాయత్నం చేశాడు. తోటి రైతులు సకాలంలో దవాఖానకు తరలించగా ప్రాణాలతో బయపడ్డాడు.
- వరంగల్ జిల్లా పర్వతగిరి మండలం కల్లెడలో యూరియా టోకెన్ల కోసం గేటు ఎక్కబోయి కింద పడిన లునావత్ కవిత కాలు విరిగింది. దవాఖానలో చేర్చగా వైద్యులు ఆపరేషన్.. సిమెంట్పట్టీ వేశారు.
- మహబూబాబాద్ జిల్లా మరిపెడ ఆగ్రోస్ వద్ద రైతుల మధ్య తోపులాటలో వృద్ధ రైతు ఆజ్మీరాకు తీవ్ర గాయమైంది.
- నాగర్కర్నూల్ జిల్లా బిజినేపల్లి గ్రోమోర్ సెంటర్ వద్ద క్యూలో జరిగిన తోపులాటలో మహిళా రైతు లలిత తన పుస్తెలతాడులోని ఒక బిల్ల పోయిందని వాపోయింది.
- సిరిసిల్ల జిల్లా సుద్దాల రైతువేదిక వద్ద రైతు దుర్గయ్య పెట్రోల్ బాటిల్తో యూరియా ఇస్తారా.. పెట్రోల్ పోసుకొని చావమంటరా? అని నిలదీశాడు.
రైతులకు ప్రాణాపాయ ఘటనలు
- కరీంనగర్ జిల్లా సైదాపూర్ మండలం వెన్నంపల్లి సొసైటీ వద్ద యూరియా కోసం వెన్నంపల్లి, ఎక్లాస్పూర్ గ్రామాల రైతుల మధ్య తీవ్రస్థాయి గొడవలో వెన్నంపల్లికి చెందిన రైతు గోపాల్రెడ్డికి తీవ్ర గాయాలయ్యాయి. ఆయన చొక్కా మొత్తం నెత్తుటిమయమైంది.
- మెదక్ జిల్లా చిన్నశంకరంపేట జంగరాయి సొసైటీ వద్ద యూరియా కోసం వచ్చిన రైతు లు చెప్పులు క్యూలో పెట్టి ఎదురు చూశారు. చిట్టీలు పంపకం వద్ద మహిళా రైతుల మధ్య తీవ్ర స్థాయిలో గొడవ జరిగింది.
- మహబూబాబాద్ జిల్లా పొగుళ్లపల్లి సొసైటీ వద్ద విపరీతమైన జ్వరం వచ్చినా వచ్చి గంటల తరబడి క్యూలో నిల్చున్న రైతు నర్సయ్య మూర్చ వచ్చి పడిపోయారు.
- మహబూబాబాద్ జిల్లా కొత్తగూడ మండలం పొగుళ్లపల్లి సొసైటీ వద్ద యూరియా కోసం క్యూలో నిల్చున్న ఆవుల నారాయణ అనే రైతుకు ఫిట్స్ వచ్చి కుప్పకూలిపోయాడు.
- మహబూబాబాద్ జిల్లా మరిపెడ మండలం ఐటీడీఏ భవనం వద్ద యూరియా కోసం జరిగిన తోపులాటలో రైతులు కింద పడిపోగా పలువురు రైతులకు గాయాలయ్యాయి.
- వికారాబాద్ జిల్లా పెద్దేముల్ మండల కేంద్రంలో యూరియా కోసం జరిగిన తొక్కిసలాటలో జనగామకు చెందిన మల్లప్పకు గాయాలై సృహతప్పి పడిపోయాడు.
- మహబూబాబాద్ జిల్లా కేసముద్రంలో జరిగిన తొక్కిసలాటలో మహిళా రైతు అనితకు తీవ్ర గాయాలయ్యాయి. ఆమె కాలు బెణికి నడవలేని పరిస్థితి ఎదురైంది.
- మహబూబాబాద్ జిల్లా నెల్లికుదురులోని రైతువేదిక వద్ద యూరియా కోసం జరిగిన తోపులాటలో రైతు బానోత్ రమేశ్ తీవ్రంగా గాయపడ్డాడు.
- ఖమ్మం జిల్లా నేలకొండపల్లిలో యూరియా కూపన్ల కోసం గంటల తరబడి క్యూలైన్లలో నిల్చోగా జరిగిన తోపులాటలో మహిళా రైతు కూరాకుల మల్లమ్మ సొమ్మసిల్లి పడిపోయింది.
- భద్రాద్రి కొత్తగూడెం జిల్లా చర్ల మండలం సత్యనారాయణపురం సొసైటీ వద్ద క్యూలో నిల్చున్న రైతు సోమయ్య పడిపోయాడు.
- సిద్దిపేట జిల్లా దుబ్బాకలో ఆగ్రోస్ వద్ద యూరియా కోసం క్యూలో నిల్చొన్న మహిళా రైతు సీతవ్వ సొమ్మసిల్లి పడిపోయింది.
- ఎల్లారెడ్డిపేట మండల కేంద్రానికి చెందిన రైతు లక్ష్మణ్ యూరియా దొరకలేదన్న బాధలో ప్రభుత్వంపై తీవ్ర ఆగ్రహం వ్యక్తంచేశాడు. మీకు ఓటేసినందుకు మాకు మేం చెప్పుతో కొట్టుకోవాలంటూ ఆవేదన వ్యక్తంచేశాడు. ప్రభుత్వాన్ని దూషించాడనే కారణంతో ఆయనపై పోలీసులు కేసు నమోదు చేశారు.
- నిర్మల్ జిల్లా లోకేశ్వరం ప్యాక్ సెంటర్ వద్ద యూరియా కోసం పాఠశాలకు వెళ్లకుండా ఓ విద్యార్థి క్యూలో నిల్చోవడంతో ఆ రోజు క్లాసులు మిస్ అయ్యాడు.
Read Today's Latest Telangana News in Telugu and Telugu News
RELATED ARTICLES
తాజా వార్తలు
Rajapeta | గురుకుల పాఠశాలలో మళ్లీ జూనియర్లపై కట్టెలతో సీనియర్ల దాడి, ముగ్గురికి తీవ్ర గాయాలు
‘ఇబ్బందులు ఎదురైతే భయపడకుండా తెలుపాలి’
Samantha Ruth Prabhu | తల్లిదండ్రులైన సమంత – రాజ్ నిడిమోరు.. కొడుకుకు ‘దేవ్ నిడిమోరు’ అని నామకరణం!
Harish Rao | రేవంత్ రెడ్డికి కేసీఆర్ అంటే భయం పట్టుకుంది : హరీశ్ రావు
Delhi Capitals | దిల్లీ క్యాపిటల్స్కు మహేల జయవర్దనే.. తొలి టైటిల్ సాధించేనా..!
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

