Visit:
హైదరాబాద్‌, మే 7 (నమస్తే తెలంగాణ) : కాంగ్రెస్‌ పార్టీ ఎన్నికల సమయంలో ఇచ్చిన హామీ ప్రకారం సమగ్ర రుణమాఫీ చేయాలని, ఆరు పంటలకు బోనస్‌ ఇవ్వాలని సంయుక్త కిసాన్‌ మోర్చా (ఎస్‌కేఎం) డిమాండ్‌ చేసింది. బుధవారం మార్క్స్‌భవన్‌లో జరిగిన కార్యక్రమంలో ఎస్‌కేఎం కన్వీనర్లు టీ సాగర్‌, వీ ప్రభాకర్‌, ఉపేందర్‌రెడ్డి, ప్రసాదన్న, విజయ్‌లు ఈనెల 20న జరిగే సార్వత్రిక సమ్మె, గ్రామీణ బంద్‌ కార్యక్రమ పోస్టర్‌ను విడుదల చేశారు.
ఈ సందర్భంగా వారు మాట్లాడుతూ.. రాష్ట్రంలో పంటల బీమా పథకాన్ని రూపొందించడంతోపాటు, రైతు భరోసాను అర్హులైన రైతులందరికీ ఇవ్వాలని డిమాండ్‌ చేశారు. 2011చట్టం ప్రకారం కౌలు రైతులకు రుణార్హత కార్డులు ఇవ్వాలని కోరారు. అకాల వర్షాలు, వడగండ్ల వానల వల్ల నష్టపోయిన రైతులకు తక్షణమే పరిహారం చెల్లించాలని పేర్కొన్నారు. కార్మిక వ్యతిరేక లేబర్‌కోడ్ల రద్దు కోసం ఈనెల 20న నిర్వహించ తలపెట్టిన సార్వత్రిక సమ్మె, గ్రామీణ బంద్‌ను విజయవంతం చేయాలని వారు పిలుపునిచ్చారు.
