Telangana | డిగ్రీ చదువుతూనే నెలకు 10వేల జీతం.. 103 కాలేజీల్లో అందుబాటులోకి..

Telangana | విద్యార్థులు డిగ్రీ చదువుతూనే నెలకు రూ.10 వేలు సంపాదించే అవకాశం ప్రభుత్వం కల్పించనున్నది. వచ్చే విద్యాసంవత్సరం నుంచి స్కిల్‌ డెవలప్‌మెంట్‌ కోర్సులను ప్రవేశపెట్టాలని నిర్ణయించింది.

Telangana | హైదరాబాద్‌, ఏప్రిల్‌ 24 (నమస్తే తెలంగాణ) : విద్యార్థులు డిగ్రీ చదువుతూనే నెలకు రూ.10 వేలు సంపాదించే అవకాశం ప్రభుత్వం కల్పించనున్నది. వచ్చే విద్యాసంవత్సరం నుంచి స్కిల్‌ డెవలప్‌మెంట్‌ కోర్సులను ప్రవేశపెట్టాలని నిర్ణయించింది. రాష్ట్రంలో 1,054 డిగ్రీ కాలేజీలుండగా, అత్యధిక అడ్మిషన్లున్న 103 కాలేజీల్లో ఈ కోర్సులను అందుబాటులోకి తీసుకురానున్నది. ఇందులో 37 ప్రభుత్వ డిగ్రీ కాలేజీలుండగా, 66 ప్రైవేట్‌ డిగ్రీ కాలేజీలున్నాయి. వీటిలో 56 కాలేజీలు ఓయూ పరిధిలోనే ఉన్నాయి. సెక్టార్‌ స్కిల్‌ కౌన్సిల్‌ సహకారంతో ఈ కోర్సులను నిర్వహిస్తారు. ఈ కోర్సులను ప్రవేశపెట్టడం సహా నిర్వహణపై సోమవారం ఉన్నత విద్యామండలి చైర్మన్‌ ప్రొఫెసర్‌ ఆర్‌ లింబాద్రి.. ఉస్మానియా, తెలంగాణ, కాకతీయ, శాతవాహన, మహత్మాగాంధీ, పాలమూరు, తెలంగాణ మహిళా వర్సిటీల వీసీలతో వీడియో కాన్ఫరెన్స్‌ నిర్వహించారు. సమావేశంలో సెక్టార్‌ స్కిల్‌ కౌన్సిల్‌ ప్రతినిధి సుబ్బారావుతో రోడ్‌మ్యాప్‌పై చర్చించారు. ఈ నెల 28న మరోమారు సమావేశమై, పూర్తిస్థాయి రోడ్‌మ్యాప్‌ను తయారుచేయాలని నిర్ణయించారు. విద్యాశాఖ కార్యదర్శి వాకాటి కరుణ, కళాశాల విద్యాశాఖ కమిషనర్‌ నవీన్‌మిట్టల్‌ ఈ దిశగా చేపట్టిన చొరవతో కొత్త కోర్సులు అందుబాటులోకి రానున్నాయి.

అమలు ఇలా..

• సంబంధిత సెక్టార్‌లోని పరిశ్రమలతో సెక్టార్‌ స్కిల్‌ కౌన్సిల్‌, సంబంధిత కాలేజీలు పరస్పరం ఎంవోయూను కుదుర్చుకొంటాయి. ఇందుకు వర్సిటీలు చొరవ తీసుకుంటాయి.
• సెక్టార్‌ స్కిల్‌ కౌన్సిల్‌ ద్వారా మొత్తం 13 రకాల స్కిల్‌డెవలప్‌మెంట్‌ కోర్సులు అందుబాటులో ఉండగా, రాష్ట్రంలో 10 రకాల కోర్సులను ప్రవేశపెడతారు.
• ఒక కాలేజీలో ఒక కోర్సుకే అనుమతినివ్వనుండగా, గరిష్ఠంగా 60 మంది విద్యార్థులను మాత్రమే చేర్చుకుంటారు.
• విద్యార్థులు మూడు రోజుల పాటు కాలేజీలో, మిగిలిన మూడు రోజులు పరిశ్రమలో ఇంటర్న్‌షిప్‌ చేయాల్సి ఉంటుంది. అంటే పరిశ్రమలో 15 రోజులు పనిచేస్తే నెలకు రూ.10 వేల వేతనం ఇస్తారు. కోర్సు పూర్తయిన తర్వాత ప్లేస్‌మెంట్స్‌ కల్పిస్తారు.
• బీకాం, బీబీఏ విద్యార్థులకు రిటైలింగ్‌, ఈ కామర్స్‌ ఆపరేషన్స్‌, లాజిస్టిక్స్‌ కోర్సుల్లో ఏదైనా ఒకదానిని కాలేజీలో అనుమతిస్తారు.
• బీఏ విద్యార్థుల కోసం కంటెంట్‌ అండ్‌ క్రియేటివ్‌ రైటింగ్‌, మీడియా అండ్‌ ఎంటర్‌టైన్‌మెంట్‌ కోర్సులను నిర్వహిస్తారు.
• బీఎస్సీ విద్యార్థులకు ఫార్మా, యానిమేషన్‌ అండ్‌ ఎంటర్‌టైన్‌మెంట్‌ కోర్సులను నిర్వహిస్తారు.

విద్యార్థులకు మంచి భవిష్యత్తునిచ్చే కోర్సులివి

డిగ్రీ స్థాయిలోనే విద్యార్థులకు మంచి భవిష్యత్తునిచ్చే కోర్సులివి. వీటిలో చేరడం ద్వారా విద్యార్థులకు నెలకు కొంత ఆర్థిక సహాయం లభిస్తుంది. కోర్సు పూర్తయ్యాక అపోలో, ఎల్‌ఎండ్‌టీ వంటి సంస్థల్లో ప్లేస్‌మెంట్‌ కల్పిస్తాం. విద్యార్థులు సాధించిన క్రెడిట్స్‌ మార్పిడి, మేజర్‌, మైనర్‌ కోర్సుల అమలుపై సమాలోచనలు చేస్తున్నాం. ఈ నెల 28న మరోమారు వర్సిటీ వీసీలు, ప్రిన్సిపాళ్లతో సమావేశమవుతాం. కోర్సుల నిర్వహణలో అవాంతరాలు లేకుండా కాలేజీలకే పూర్తిస్వేచ్ఛనిస్తున్నాం. – ప్రొఫెసర్‌ ఆర్‌ లింబాద్రి, ఉన్నత విద్యామండలి చైర్మన్‌