బీటెక్‌ రెండేండ్లు చదివితే డిప్లొమా

బీటెక్‌, ఎంటెక్‌, బీఫార్మసీ, ఎంఫార్మసీ తదితర సాంకేతిక విద్యా కోర్సులలో విప్లవాత్మక విధానానికి జేఎన్టీయూ హైదరాబాద్‌ శ్రీకారం చుట్టింది. కోర్సు మధ్యలో ఆపేసినా డిప్లొమా సర్టిఫికెట్‌ ప్రదానం చేయాలని నిర్ణయించింది.

• మధ్యలో మానేసినా సర్టిఫికెట్‌ ప్రదానం
• సిలబస్‌లో 70 శాతమే ప్రత్యక్ష బోధన
• 30 శాతం ఆన్‌లైన్‌.. ఇంటర్నల్స్‌కు 40 శాతం
• కోర్సు మధ్యలో ఉద్యోగం చేసొచ్చి మళ్లీ చేరొచ్చు
• జేఎన్టీయూ హైదరాబాద్‌ సంచలన నిర్ణయాలు

హైదరాబాద్‌ సిటీబ్యూరో, మే 19 (నమస్తే తెలంగాణ): బీటెక్‌, ఎంటెక్‌, బీఫార్మసీ, ఎంఫార్మసీ తదితర సాంకేతిక విద్యా కోర్సులలో విప్లవాత్మక విధానానికి జేఎన్టీయూ హైదరాబాద్‌ శ్రీకారం చుట్టింది. కోర్సు మధ్యలో ఆపేసినా డిప్లొమా సర్టిఫికెట్‌ ప్రదానం చేయాలని నిర్ణయించింది. సిలబస్‌లో ఇకనుంచి 70 శాతమే ప్రత్యక్ష బోధన ఉండాలని, 30 శాతం ఆన్‌లైన్‌ బోధన నిర్వహించాలని సూత్రప్రాయంగా నిర్ణయించింది. ఆన్‌లైన్‌ బోధనలో పలు ఐఐటీలకు చెందిన ఫ్యాకల్టీల సేవలు వినియోగించుకోనున్నారు. 182 మంది సభ్యులతో కూడిన ‘బోర్డ్‌ ఆఫ్‌ స్టడీస్‌’ మూడు రోజుల సమావేశాలను వర్సిటీ వైస్‌ చాన్స్‌లర్‌ ప్రొఫెసర్‌ కట్టా నరసింహారెడ్డి గురువారం ప్రారంభించారు. ఈ సమావేశాల్లో పలు కీలక నిర్ణయాలు తీసుకొన్నారు.

జేఎన్టీయూ బోర్డ్‌ ఆఫ్‌ స్టడీస్‌ నిర్ణయాలు

• బీటెక్‌లో చేరిన విద్యార్థులు కోర్సు పూర్తిచేయకుండా రెండు, మూడేండ్లకే కాలేజీ మానేసిన పక్షంలో వారు నష్టపోకుండా డిప్లొమా సర్టిఫికెట్‌ జారీ చేస్తారు.
• నాలుగేండ్ల కోర్సు పూర్తిచేస్తే డిగ్రీ సర్టిఫికెట్‌ ఇస్తారు.
• ఫ్లెక్సిబుల్‌ విద్యావిధానాన్ని అమల్లోకి తేనున్నారు. అంటే నాలుగేండ్ల బీటెక్‌లో విద్యార్థి మూడేండ్లు చదివి, నాలుగో సంవత్సరం ఎక్కడైనా ఉద్యోగం చేసుకొని, తిరిగి ఫైనల్‌ ఇయర్‌లో చేరి కోర్సు పూర్తిచేయాలనుకొంటే, అందుకు అవకాశం కల్పిస్తారు.
• ప్రతి కోర్సులోని మొత్తం సిలబస్‌లో 70 శాతమే ప్రత్యక్ష బోధన. 30 శాతం ఆన్‌లైన్‌ బోధన ఉంటుంది.
• కోర్సు ఇంటర్నల్స్‌కు ఇప్పటివరకు 25 శాతం మార్కులుండగా, కొత్త సిలబస్‌లో 40 శాతానికి పెంచుతారు.
• వార్షిక పరీక్ష 60 శాతం మార్కులకే నిర్వహిస్తారు.
• 2022-23 నుంచే కొత్త విధానం అమలు చేస్తారు.
• బీటెక్‌లో 160 క్రెడిట్స్‌ కేటాయించారు.
• విద్యార్థులు ఏకకాలంలో రెండు డిగ్రీలు పూర్తి చేసుకొనే అవకాశం ఇస్తారు. అంటే బీటెక్‌ విద్యార్థి, బీబీఏ వంటి కోర్సులో కూడా అడ్మిషన్‌ తీసుకోవచ్చు. ఒక కోర్సు ఆఫ్‌లైన్‌, మరో కోర్సు ఆన్‌లైన్‌లో చదవాలి.
• కొత్త సిలబస్‌ రూపకల్పన కోసం 13 బీవోఎస్‌లను ఏర్పాటు చేశారు.