రోగాల కాలం.. జర పైలం

• వారం నుంచి ఎడతెరిపి లేని వానలు
• సీజనల్‌ వ్యాధులు ప్రబలే అవకాశాలు
• జాగ్రత్తలు తప్పనిసరి పాటించాలి
• ప్రజలకు వైద్య నిపుణుల సూచన

హైదరాబాద్‌ సిటీబ్యూరో, జూలై 13 (నమస్తే తెలంగాణ)/సుల్తాన్‌బజార్‌/తెలుగు యూనివర్సిటీ: వారం నుంచి ఎడతెరిపిలేకుండా వర్షాలు కురుస్తున్న నేపథ్యంలో సీజనల్‌ వ్యాధులు ప్రబలే అవకాశం ఉందని వైద్య నిపుణులు హెచ్చరిస్తున్నారు. వ్యాధుల నుంచి తప్పించుకొని ఆరోగ్యంగా ఉండాలంటే తగిన జాగ్రత్తలు తీసుకోవాలని చెప్తున్నారు. ముఖ్యంగా రోడ్డు పక్కన చిరుతిండ్లు తినవద్దని, ఎప్పటికప్పుడు వేడి ఆహారం తీసుకోవాలని సూచిస్తున్నారు.

డెంగ్యూ లక్షణాలు

• తీవ్రమైన జ్వరం, తీవ్రమైన తలనొప్పి, కంటి లోపలి భాగంలో నొప్పి, వాంతులు, విరేచనాలు, కండరాలు, కీళ్ల నొప్పులు, చర్మంపై దద్దుర్లు (తీవ్రమైన కేసుల్లోనే). పంటి చిగుళ్ల నుంచి రక్తస్రావం.
  తీసుకోవాల్సిన జాగ్రత్తలు
• దోమ కాటుకు గురికాకుండా నిండుగా దుస్తులు ధరించాలి.
• మసిటో రిపెల్లెంట్లు, దోమ తెరలు వాడాలి.
• ఎక్కువ రోజులు నీరు నిల్వ లేకుండా చూసు కోవాలి. నీరు నిల్వ ఉంటే వారానికోసారి కిరోసిన్‌ కానీ, బైక్‌ ఆయిల్‌ కానీ చల్లాలి.
• ఇంటి పరిసరాల్లో కృష్ణతులసి, లెమన్‌ గ్రాస్‌, అడ్డసరము లాంటి మొకలు పెంచాలి.
• ఇంటి చుట్టూ పరిసరాలను పరిశుభ్రంగా ఉంచుకోవాలి.

టైఫాయిడ్‌ లక్షణాలు

• తీవ్ర జ్వరం, దద్దుర్లు (వీపు, ఛాతి, పొట్టపై), చిన్న పిల్లల్లో విరేచనాలు, పెద్దవారిలో మలబద్ధకం, కడుపులో నొప్పి, తలనొప్పి, ఆకలి లేకుండా ఉండటం, హార్ట్‌రేట్‌ తక్కువగా ఉండటం

కొవిడ్‌ లక్షణాలు

• జలుబు, తుమ్ములు, గొంతునొప్పి, జ్వరం తీసుకోవాల్సిన జాగ్రత్తలు
• సామాజిక దూరం పాటించాలి.
• మాస్క్‌ ధరించాలి.
• గతంలో మొదటి, రెండో కరోనా వేవ్‌ల మాదిరి చర్యలు తీసుకొని మందులు వాడాలి.

తీసుకోవాల్సిన జాగ్రత్తలు

• వేడిగా ఉన్న ఆహార పదార్థాలు తినాలి. ఆహార పదార్థాలపై ఎప్పుడూ మూతలు ఉంచాలి.
• కలుషిత నీరు తాగొద్దు. కుళ్లిన, పాచిపోయిన ఆహారం, పండ్లను తీసుకోవద్దు.
• బహిరంగ ప్రదేశాల్లో దుమ్ము, ధూళి సోకిన పదార్థాలను తీసుకోవద్దు.

చికున్‌ గున్యా లక్షణాలు

• తీవ్రమైన కీళ్లనొప్పులు, జ్వరం, గొంతునొప్పి

స్వైన్‌ఫ్లూ లక్షణాలు

• జ్వరం, విరోచనాలు

మలేరియా లక్షణాలు

• రాత్రి సమయాల్లో తీవ్రమైన చలి (వణుకు) జ్వరం ఉంటుంది.

కలుషిత నీటి వల్లే టైఫాయిడ్‌

నీరు కలుషితం కావడం వల్ల టైఫాయిడ్‌, డయేరియా వంటి రోగాలు వస్తుంటాయి. ఈ మధ్య ఫీవర్‌ దవాఖానకు ఈ కేసులు పెరుగుతున్నాయి. ప్రజలు అప్రమత్తంగా ఉండి తగిన జాగ్రత్తలు తీసుకోవాలి. ప్రతి ఒక్కరూ నీటిని కాచి చల్లార్చి తాగాలి. జ్వరం ఎక్కువగా ఉంటే వెంటనే డాక్టర్‌ను సంప్రదించాలి.
– డాక్టర్‌ కే శంకరం, సూపరింటెండెంట్‌, నల్లకుంట ఫీవర్‌ హాస్పిటల్‌

సీజనల్‌ వ్యాధులపై నిర్లక్ష్యం వద్దు

డెంగ్యూ, టైఫాయిడ్‌, మలేరియా, వైరల్‌ ఫీవర్‌లు ఎక్కువవుతున్నాయి. గత మూడు నెలలుగా దవాఖానకు వచ్చే డెంగ్యూ రోగులు పెరుగుతున్నారు. జ్వరంతో పాటు కండ్ల భాగంలో మంటలు, తలనొప్పి, తెల్ల రక్త కణాలు (ప్లేట్‌ లెట్స్‌) తగ్గడం వంటి లక్షణాలు ఉంటే డెంగ్యూగా నిర్ధారించుకోవాలి.
– డాక్టర్‌ బీ నాగేందర్‌, సూపరింటెండెంట్‌, ఉస్మానియా దవాఖాన

చిన్న పిల్లల విషయంలో జాగ్రత్త

వర్షాలు ఎక్కువగా పడుతున్నందున చిన్న పిల్లల ఆరోగ్యం విషయంలో జాగ్రత్తగా ఉండాలి. వేడి చేసి చల్లార్చిన నీటినే తాగించాలి. వాంతులు, విరేచనాలు అయితే పిల్లలు నీరసపడకుండా చూసుకోవాలి. రెండు, మూడు రోజుల్లో జ్వరం, జలుబు తగ్గకపోతే డాక్టర్‌ దగ్గరికి వెళ్లాలి.
– డాక్టర్‌ రమేశ్‌ దాంపూరి, నిలోఫర్‌ దవఖాన యువ విభాగం నోడల్‌ ఆఫీసర్‌