SSC Exams | పది పరీక్షల్లో గ్యాప్.. విద్యార్థుల ప్రిపరేషన్‌కు యాక్షన్ ప్లాన్ ప్రకటించిన విద్యా శాఖ

SSC Exams | మార్చి 14 నుంచి ఏప్రిల్‌ 16 వరకు పదో తరగతి పరీక్షలు నిర్వహించాలని పాఠశాల విద్యాశాఖ షెడ్యూల్‌ ప్రకటించిన విషయం తెలిసిందే. షెడ్యూల్‌ ప్రకారం ఒక్కో పరీక్షకు మూడు నుంచి ఐదు రోజుల వ్యవధి ఉండడంతో ఈ గ్యాప్‌ విద్యార్థులకు నష్టం కలిగిస్తుందన్న భావనకు వచ్చింది.

SSC Exams | హైదరాబాద్‌, ఫిబ్రవరి 18 (నమస్తే తెలంగాణ) : మార్చి 14 నుంచి ఏప్రిల్‌ 16 వరకు పదో తరగతి పరీక్షలు నిర్వహించాలని పాఠశాల విద్యాశాఖ షెడ్యూల్‌ ప్రకటించిన విషయం తెలిసిందే. షెడ్యూల్‌ ప్రకారం ఒక్కో పరీక్షకు మూడు నుంచి ఐదు రోజుల వ్యవధి ఉండడంతో ఈ గ్యాప్‌ విద్యార్థులకు నష్టం కలిగిస్తుందన్న భావనకు వచ్చింది. ఆలస్యంగా మేల్కొని ఎట్టకేలకు నష్టనివారణ చర్యలకు ఉపక్రమించింది. గ్యాప్‌లో విద్యార్థులను పరీక్షలకు సన్నద్ధం చేయాలని నిర్ణయించింది.

ఉపాధ్యాయ సంఘాలు వారించినా..

సీబీఎస్‌ఈ తరహాలో పదో తరగతి పరీక్షల్లోనూ వ్యవధి ఇవ్వాలన్న ఆలోచనతో విద్యాశాఖ షెడ్యూల్‌ విడుదల చేసింది. ఓ ఉన్నతాధికారికి హఠాత్తుగా వచ్చిన ఆలోచనను అమలుచేసింది. దీనిని టీచర్‌ ఎమ్మెల్సీలు సహా ఉపాధ్యాయ సంఘాలన్నీ వ్యతిరేకించాయి. ఈ వ్యవధిలో విద్యార్థులు ప్రిపరేషన్‌ మానేసి ఆటలు, ఫోన్లు, టీవీలకు అలవాటు పడితే అసలుకే మోసం వస్తుందని ఆందోళన వ్యక్తంచేశాయి. ఇదే విషయాన్ని విద్యాశాఖ ఉన్నతాధికారులకు వివరించాయి. షెడ్యూల్‌ మార్చకుండ ఇప్పుడు నష్టనివారణ చర్యల్లో భాగంగా యాక్షన్‌ ప్లాన్‌ ప్రకటించింది.

ఇదీ యాక్షన్‌ ప్లాన్‌..

• ఈనెల 24న ప్రీ ఫైనల్‌ పరీక్షలు ముగుస్తాయి. వార్షిక పరీక్షలకు ఉండే 18 రోజుల వ్యవధిలో ప్రశ్నపత్రాలు మూల్యాంకనం చేసి తల్లిదండ్రులకు పంపించాలి. విద్యార్థుల ప్రగతిని వివరించాలి.
• ఒక్కో పరీక్షకు మధ్య వ్యవధిని కేవలం విద్యాసంబంధ అంశాలకే వినియోగించుకోవాలి. విద్యార్థులు, సబ్జెక్ట్‌ టీచర్లు బడికి హాజరయ్యేలా చూడాలి.
• పరీక్షల్లో ప్రతిభ ఆధారంగా విద్యార్థులను 3 క్యాటగిరీలుగా విభజించాలి. ఒక్కో క్యాటగిరీకి ప్రత్యేక వ్యూహాన్ని అమలుచేయాలి.
• వ్యవధి రోజుల్లో విద్యార్థులకు ప్రత్యేక తరగతులు తీసుకోవాలి. గంటలో 20 నిమిషాలు పాఠం, 40 నిమిషాలు రాసేందుకు వినియోగించాలి.
• రోజూ మూడు ప్రశ్నలిచ్చి సమాధానాలు రాయించాలి. పాత ప్రశ్నపత్రాలు ప్రాక్టీస్‌ చేయించాలి.
• రోజుకు మూడు పీరియడ్లు నిర్వహించాలి. మొదటి పీరియడ్‌లో రివిజన్‌ చేసి కాన్సెస్ట్‌ అర్థం చేయించాలి. రెండో పీరియడ్‌లో ప్రాక్టీస్‌ టెస్ట్‌, మూడో పీరియడ్‌లో జవాబులు రాయించాలి.