Electricity | వర్షాకాలం.. విద్యుత్తుతో జరపైలం..

ప్రస్తుతం ఎడతెరిపి లేకుండా వర్షాలు కురుస్తున్నాయి. దీంతో ప్రజలు చాలా ఇబ్బందులు ఎదుర్కోవాల్సి వస్తుంది. ముఖ్యంగా ఇంటా.. బయటా.. విద్యుత్‌ (Electricity) ప్రమాదాలు జరిగే అవకాశలెక్కువ. గాలివానకు స్తంభాలు పడిపోయి.. విద్యుత్‌ తీగలు తెగిపడి.. ఎక్కడ ఎలాంటి ముప్పు పొంచి ఉంటుందో తెలియని పరిస్థితి.

జహీరాబాద్, జూలై 25: ప్రస్తుతం ఎడతెరిపి లేకుండా వర్షాలు కురుస్తున్నాయి. దీంతో ప్రజలు చాలా ఇబ్బందులు ఎదుర్కోవాల్సి వస్తుంది. ముఖ్యంగా ఇంటా.. బయటా.. విద్యుత్‌ (Electricity) ప్రమాదాలు జరిగే అవకాశలెక్కువ. గాలివానకు స్తంభాలు పడిపోయి.. విద్యుత్‌ తీగలు తెగిపడి.. ఎక్కడ ఎలాంటి ముప్పు పొంచి ఉంటుందో తెలియని పరిస్థితి. ఈ నేపథ్యంలో రైతులు, ప్రజలు కొద్దిపాటి జాగ్రత్తలు పాటిస్తే వాటి బారి నుంచి తప్పించుకోవచ్చని జహీరాబాద్ విద్యుత్‌శాఖ డీఈఈ లక్ష్మీనారాయణ సూచిస్తున్నారు. ముఖ్యంగా వర్షాలు కురిసే సమయంలో భారీగా వీచే ఈదురు గాలులు, వర్షాల వల్ల విద్యుత్తు లైన్లు తెగిపోవడం, గాలి వానలకు చెట్లు విరిగిపోవడం జరుగుతుంటాయి. ఈ క్రమంలో ఏ మాత్రం అజాగ్రత్తగా ఉన్నా విద్యుదాఘాతం జరిగే అవకాశాలు ఎక్కువగా ఉంటాయి. దీంతో అందరూ అప్రమత్తంగా ఉండాలన్నారు.

ఈ జాగ్రత్తలు పాటించండి..

• తడిసిన కరెంట్‌ స్తంభాలను పట్టుకోకూడదు. కరెంటు లైను కింద మొబైల్‌ ఫోన్లు మాట్లాడరాదు.
• విద్యుత్తు లైన్లకు తగిలే చెట్లను ముట్టుకోకూడదు.
• ఇనుప తీగలపై ఉతికిన దుస్తులు ఆరవేయకూడదు.
• వర్షాల వేళ నీటి ప్రభావంతో చిన్న లీకేజీ ఉన్నా కరెంట్ అన్ని పరికరాల్లోకి ప్రవహిస్తుందని గుర్తించాలి.
• ఉపయోగించకుండా ఇంటిలో ఉండే విద్యుత్ ఉపకరణాలను చాలామంది ప్లగ్‌ తగిలించేసి వదిలేస్తుంటారు. ఇలా ఎప్పటికీ చేయకూడదు. వాటిని అన్‌ప్లగ్‌ చేసి పక్కన పెట్టేయాలి.
• వాన నీటితో జాయింట్ల వద్ద వేసిన టేప్‌ తొలగిపోతుంది. ఇదే ప్రమాదాలకు దారితీస్తోంది. వీటిని సరిచేయించాలి.
• విద్యుత్ ఉపకరణాలను తాకేటప్పుడు కచ్చితంగా ప్లాస్టిక్, రబ్బరు చెప్పులు వేసుకోవాలి.
• కరెంట్ పరికరాలను కచ్చితంగా ఐఎస్‌ఐ మార్కు ఉండేవే కొనాలి. నాసిరకం అసలు వద్దు.
• ఆరుబయట ఉన్న లైట్లు నీటితో తడవకుండా చూసుకోవాలి.
• ఉరుములు, మెరుపులతో వర్షం పడేటప్పుడు డిష్‌ కనెక్షన్‌ తీసేయండి.
• గాలి దుమారం, వర్షం వచ్చినప్పుడు తెగిన విద్యుత్తు తీగలను తాకరాదు. లైన్లపై చెట్ల కొమ్మలు పడి ఉంటే స్థానిక విద్యుత్తు అధికారికి సమాచారం అందించాలి.
• తడి చేతితో స్విచ్‌లు వేయడం చాలామందికి అలవాటుగా ఉంటుంది. వీటిని మానుకోవాలి. స్విచ్‌ల పక్కనున్న ఖాళీల్లో నుంచి నీటి చెమ్మ లోపలికి వెళ్లినా షాక్‌కు గురవుతారు.
• ఇంటికి ఉన్న విద్యుత్తు సర్వీస్‌ వైరు పాడైపోతే వెంటనే అధికారుల దృష్టికి తీసుకువెళ్లి మార్పించుకోవాలి.
• వాటర్‌ హీటర్‌ వాడేటపుడు స్విచ్‌ ఆఫ్‌ చేసి, ప్లగ్‌ నుంచి తీసిన తర్వాతే నీళ్లు పెట్టిన వస్తువును ముట్టుకోవాలి.
• చిన్న పిల్లలు విద్యుత్తు వస్తువుల వద్దకు రాకుండా చూసుకోండి.
• స్విచ్‌ బోర్డులు వారికి అందుబాటులో లేకుండా చూడండి.
• వర్షం పడేప్పుడు టీవీ, రిఫ్రిజిరేటర్, వాటర్‌మోటార్స్, కంప్యూటర్ల స్విచ్‌లను ఆఫ్‌ చేయండి. లేకపోతే షార్ట్‌సర్క్యూట్‌ అయ్యే అవకాశం ఉంది.
• ఆరుబయట పశువులను మేపేందుకు వెళ్లే సమయంలో విద్యుత్ ట్రాన్స్‌ఫారాల వద్ద జాగ్రత్తగా వహించాలి. పశువులు గడ్డిని మేస్తూ ఎర్తింగ్ వైర్లకు వద్దకు వెళ్లడంతో షాక్ గురయ్యే ప్రమాదం ఉంటుంది. రైతులు వాటిని దూరంగా ఉంచేలా జాగ్రత్తలు తీసుకోవడం మంచిదంటున్నారు.