వర్సిటీల్లో ఉచిత శిక్షణ

దేశంలోనే మొదటిసారిగా రాష్ట్రంలోని యూనివర్సిటీల్లో ప్రభుత్వ ఉద్యోగాలకు ఉచిత శిక్షణ ఇస్తున్నామని విద్యాశాఖ మంత్రి సబితాఇంద్రారెడ్డి వెల్లడించారు. మరే రాష్ట్రంలో లేనివిధంగా రాష్ట్ర ప్రభుత్వం చొరవ తీసుకొని ఉద్యోగార్థులకు కోచింగ్‌ ఇప్పిస్తున్నదని తెలిపారు.

• విడతల వారీగా ఉద్యోగాలను భర్తీ చేస్తాం
• ముందుగా పోలీస్‌, విద్య, వైద్యారోగ్యశాఖల్లో
• విద్యాశాఖ మంత్రి సబితాఇంద్రారెడ్డి
• ప్రభుత్వ ఉద్యోగాలకు కోచింగ్‌ ప్రారంభం
• దేశంలోనే తొలిసారి తెలంగాణలోనే

హైదరాబాద్‌, ఏప్రిల్‌ 20 (నమస్తే తెలంగాణ): దేశంలోనే మొదటిసారిగా రాష్ట్రంలోని యూనివర్సిటీల్లో ప్రభుత్వ ఉద్యోగాలకు ఉచిత శిక్షణ ఇస్తున్నామని విద్యాశాఖ మంత్రి సబితాఇంద్రారెడ్డి వెల్లడించారు. మరే రాష్ట్రంలో లేనివిధంగా రాష్ట్ర ప్రభుత్వం చొరవ తీసుకొని ఉద్యోగార్థులకు కోచింగ్‌ ఇప్పిస్తున్నదని తెలిపారు. బుధవారం మాసబ్‌ట్యాంక్‌లోని ఉన్నత విద్యామండలి కార్యాలయం నుంచి ఓయూ, కేయూ, శాతవాహన, మహత్మాగాంధీ, తెలంగాణ, పాలమూరు వర్సిటీల్లో ఉచిత శిక్షణను మంత్రి వర్చువల్‌గా ప్రారంభించారు. ఈ సందర్భంగా మాట్లాడుతూ.. చరిత్రలోనే తొలిసారిగా రాష్ట్ర ప్రభుత్వం 80 వేల పైచిలుకు ఉద్యోగాలను భర్తీ చేస్తున్నదని, ఇలా ఒకేసారి ఇన్ని ఉద్యోగాలను ఏ రాష్ట్రంలో భర్తీ చేసిన దాఖలాలు లేవని చెప్పారు.

ప్రైవేట్‌ కోచింగ్‌ సెంటర్లలో శిక్షణ తీసుకోలేని, గ్రామీణ, పేద విద్యార్థుల కోసమే ఉచిత శిక్షణ ఇస్తున్నామని తెలిపారు. త్వరలోనే పోలీసు, విద్య, వైద్యారోగ్యశాఖల్లోని పోస్టులు, గ్రూప్‌ -1, 2, 3, 4 పోస్టులు భర్తీ చేస్తామని వెల్లడించారు. ఉచిత కోచింగ్‌కు చొరవ తీసుకొన్న ఉన్నత విద్యామండలి చైర్మన్‌, వర్సిటీ వీసీలను మంత్రి అభినందించారు. ఈ ఉచిత శిక్షణను సద్వినియోగం చేసుకోవాలని అభ్యర్థులకు సూచించారు. కార్యక్రమంలో ఉన్నత విద్యామండలి చైర్మన్‌ ప్రొఫెసర్‌ ఆర్‌ లింబాద్రి, వైస్‌చైర్మన్‌ ప్రొఫెసర్‌ వెంకటరమణ, కార్యదర్శి శ్రీనివాస్‌రావు తదితరులు పాల్గొన్నారు.

కోచింగ్‌ తీరు ఇలా..

• శిక్షణ నిరంతరం ఉంటుంది. ప్రభుత్వ ఉద్యోగాలతో పాటు, యూపీఎస్సీ, బ్యాం కింగ్‌ ఉద్యోగాలకూ కోచింగ్‌ ఇస్తారు.
• వర్సిటీల్లోని రెగ్యులర్‌ విద్యార్థులకు మాత్రమే శిక్షణనిస్తారు. ఎంత మంది ఆసక్తి చూపిస్తే అంత మందికి కోచింగ్‌ ఇస్తారు.
• యూనివర్సిటీల్లో ఫ్యాకల్టీయే కోచింగ్‌ ఇస్తా రు. పూర్వ విద్యార్థులు, సబ్జెక్టు నిపుణుల సహాయం తీసుకొంటారు. ప్రత్యేక అవసరాల దృష్ట్యా కొంత రెమ్యునరేషన్‌ ఇచ్చి, ప్రైవేట్‌ ఫ్యాకల్టీతోనూ శిక్షణ ఇప్పిస్తారు.
• రెగ్యులర్‌ తరగతులను కొనసాగిస్తూ, ఉద యం, సాయంత్రం వేళల్లో, సెలవు రోజు ల్లో రోజంతా శిక్షణ తరగతులుంటాయి.
• సెమిస్టర్‌, ఇతరత్రా పరీక్షల సమయంలో విద్యార్థులు కోరుకుంటే శిక్షణకు విరామం ఇస్తారు.
• వర్సిటీలే కాకుండా కాలేజీల్లోనూ శిక్షణ అమలవుతుంది. ఓయూ ఆర్ట్స్‌ కాలేజీ, సైన్స్‌ కాలేజీ, నిజాం కాలేజీల్లో సైతం ఉచిత శిక్షణనిస్తారు. అవకాశాన్ని బట్టి ఇతర కాలేజీల్లో ఏర్పాట్లు చేస్తున్నారు.

కోచింగ్‌ సెంటర్లల్లో అధిక ఫీజులపై కమిటీ

ప్రైవేట్‌ కోచింగ్‌ సెంటర్లల్లో అధిక ఫీజులపై అధికారులతో కమిటీ వేస్తాం. ఫీజులను నియంత్రించేందుకు ప్రయత్నిస్తాం. ప్రభుత్వమే ఉచిత శిక్షణ ఇస్తున్నందున ప్రైవేట్‌ కోచింగ్‌ సెంటర్లకు వెళ్లేవారి సంఖ్య తగ్గుతుంది.
– మంత్రి సబితాఇంద్రారెడ్డి