RRR | రూటు మారిన ట్రిపుల్‌ ఆర్‌.. దక్షిణభాగం అలైన్‌మెంట్‌లో మార్పు

ఇతర పార్టీలు అధికారంలో ఉన్నప్పుడు సాంకేతిక వెసులుబాటు ప్రకారం వెళ్లే రింగు రోడ్డుకు కాంగ్రెస్‌ అధికారంలోకి రాగానే పూనకం వస్తుంది.

• మాడ్గుల, మన్నెగూడ ప్రధాన కేంద్రాలుగా మారిన మ్యాప్‌
• ఆమనగల్‌ నుంచి కడ్తాల్‌కు… చేవెళ్ల నుంచి మన్నెగూడకు..
• పాతరూట్‌ నుంచి పలుచోట్ల పక్కకు జరిగిన అలైన్‌మెంట్‌
• 189 నుంచి 194కు.. 5 కిలోమీటర్ల వరకు పెరిగిన దూరం
• అలైన్‌మెంట్‌ మార్పుల వెనుక అసలు మతలబేమిటో..!

హైదరాబాద్‌ సిటీబ్యూరో ప్రధాన ప్రతినిధి, సెప్టెంబరు 17 (నమస్తే తెలంగాణ): ఇతర పార్టీలు అధికారంలో ఉన్నప్పుడు సాంకేతిక వెసులుబాటు ప్రకారం వెళ్లే రింగు రోడ్డుకు కాంగ్రెస్‌ అధికారంలోకి రాగానే పూనకం వస్తుంది. అప్పటివరకు ఉన్న అలైన్‌మెంట్లు పాములు తిరిగినట్టుగా అటూ ఇటూ వంకర తిరుగుతాయి. ఇప్పుడూ అదే జరిగింది. రీజనల్‌ రింగ్‌ రోడ్డు (ట్రిపుల్‌ ఆర్‌) రూటు మారింది. దక్షిణ భాగంలో ఏకంగా నాలుగైదు కిలోమీటర్ల మేర రోడ్డు పెరిగింది. ఇటీవల ఓ కీలక నేత నివాసంలోనే ఈ మార్పునకు అధికారిక ముద్ర పడగా… తాము బహిరంగంగా ప్రకటించేవరకు సమాచారం బయటికి పొక్కొద్దంటూ ఆర్‌అండ్‌బీ అధికారులకు గట్టిగానే హెచ్చరికలు జారీ అయినట్టు తెలిసింది. పైకి ఫ్యూచర్‌ సిటీ కోసమేనంటూ నేతలు చెప్తున్నా.. వాస్తవం వేరే ఉన్నదని ప్రచారం జరుగుతున్నది. నానాటికీ విస్తరిస్తున్న హైదరాబాద్‌ మహా నగరం పరిధిలో అధునాతన రవాణా వ్యవస్థను మెరుగుపర్చేందుకు కేసీఆర్‌ ప్రభుత్వ హయాంలోనే రీజినల్‌ రింగురోడ్డుకు అంకురార్పణ జరిగింది.

కేంద్రప్రభుత్వ సహకారంతో అవుటర్‌ రింగు రోడ్డుకు అవతల 300 కిలోమీటర్లకు పైగా పొడవుతో ట్రిపుల్‌ ఆర్‌ను ప్రతిపాదించారు. ఈ మేరకు కేసీఆర్‌ ప్రభుత్వ హయాంలోనే ఉత్తర, దక్షిణ భాగాలకు సంబంధించిన అలైన్‌మెంట్‌ ప్రతిపాదనలు కూడా కేంద్రానికి వెళ్లాయి. అందులో భాగంగా తొలుత ఉత్తర భాగం సంగారెడ్డి (ఎన్‌హెచ్‌-65 మీదుగా) – తూప్రాన్‌ – గజ్వేల్‌ – చౌటుప్పల్‌ (ఎన్‌హెచ్‌-65 మీదుగా) వరకు 158 కిలోమీటర్ల మేర అలైన్‌మెంట్‌ నిర్ధారణ జరిగింది. ఈ ప్రక్రియ అంతా పారదర్శకంగా జరిగింది. ఎక్కడా ఆరోపణలుగానీ, అనుమానాలుగానీ రాలేదు. దక్షిణ భాగంలో అలైన్‌మెంట్‌కు సంబంధించిన ప్రాథమిక దశ కసరత్తు పూర్తయ్యింది.

ఆ మేరకు ట్రిపుల్‌ఆర్‌ అలైన్‌మెంట్‌ మ్యాపునూ విడుదల చేశారు. అందులో దక్షిణభాగం వైపు ట్రిపుల్‌ ఆర్‌ ఎలా వెళ్తుందనే వివరాలు కూడా ఉన్నాయి. కాకపోతే దానిని అధికారికంగా సర్వే చేసి నిర్ధారించాల్సి ఉంది. ఈలోగా కాంగ్రెస్‌ ప్రభుత్వం అధికారంలోకి వచ్చింది. ట్రిపుల్‌ ఆర్‌ దక్షిణ భాగం వాస్తవానికి 189 కిలోమీటర్లుగా గతంలోనే నిర్ధారించారు. ఎన్‌హెచ్‌-65 మీదుగా చౌటుప్పల్‌ నుంచి షాద్‌నగర్‌- ఆమన్‌గల్‌ సమీపంలో నుంచి చేవెళ్ల మీదుగా సంగారెడ్డి వరకు రింగును కలపాల్సి ఉంది. గతంలో అధికారికంగా విడుదల చేసిన ట్రిపుల్‌ ఆర్‌ అలైన్‌మెంట్‌ మ్యాపులోనూ ఇదేరీతిన అలైన్‌మెంట్‌ ఉన్నది. కానీ కొంతకాలం కిందటి నుంచి అలైన్‌మెంట్‌లో మార్పులపై ప్రభుత్వ పెద్దల స్థాయిలో అంతర్గతంగా తర్జనభర్జనలు జరిగినట్టు తెలిసింది. ఈ మేరకు ఏకంగా నాలుగు కిలోమీటర్ల మేర పొడిగింపుతో పలుచోట్ల అలైన్‌మెంట్‌లో మార్పులు చేశారు.

• చౌటుప్పల్‌ నుంచి అలైన్‌మెంట్‌ను గతంలోని పాయింట్‌ నుంచి 5 కిలోమీటర్ల అవతలకు జరిపారు. ఫలితంగా తక్కళ్లపల్లి- చినమాడ్గుల – ఆమన్‌గల్‌- కొందుర్గు- చెంగోముల్‌- చేవెళ్ల- కొండాపూర్‌- సంగారెడ్డి వరకు ఉండే అలైన్‌మెంట్‌ దూరం జరిగింది.
• భట్లపల్లి దగ్గర మొదలై కొద్దిదూరం గత అలైన్‌మెంట్‌ మాదిరిగానే కొనసాగినా… ఆపై నల్లగొండ జిల్లాలో తక్కళ్లపల్లి నుంచి కిష్టరాంపల్లి వైపునకు జరిగింది. అలా శివన్నగూడ మీదుగా పోవాల్సిన అలైన్‌మెంట్‌ కురంపల్లి ఎక్స్‌ రోడ్డు-నల్లచెరువు మీదుగా వెళ్లింది.
• రంగారెడ్డి జిల్లాలో నాగిళ్ల నుంచి ఆమన్‌గల్‌, ఆకుతోటపల్లి లోపల నుంచి తలకొండపల్లి వైపు పాత అలైన్‌మెంట్‌ ఉన్నది. ఇక్కడ భారీ ఎత్తున మార్పు చేపట్టారు. ఇందులో నల్లచెరువు-సింగంపల్లి మీదుగా ఆకుతోటపల్లి బయటి చాలా దూరం నుంచి తలకొండపల్లి వరకు అలైన్‌మెంట్‌ను మార్చారు.
• అలైన్‌మెంట్‌లో తలకొండపల్లి నుంచి కిలోమీటర్ల దూరం వరకు మార్పులు చేశారు.
• ఇక సేరిరామకృష్ణాపురం నుంచి చౌలపల్లి వరకు ఎలాంటి మార్పు లేకుండా పాత అలైన్‌మెంట్‌ను కొనసాగించారు.
• చౌలపల్లి నుంచి ఏదురుగూడెం వరకు పాత అలైన్‌మెంట్‌లో భారీ మార్పులు చేశారు. టేకులపల్లి-మీర్జాగూడ-చెంగోముల్‌ గ్రామ సమీపంలో నుంచి సంకేపల్లి మీదుగా వెళ్లాల్సిన అలైన్‌మెంట్‌ తుమ్మలపల్లి-చిన్న ఉమ్మెంతాల-తిప్పాపూర్‌-ఆపై చెంగోముల్‌ పోలీస్‌స్టేషన్‌ మీదుగా పులిమామిడి, హరిదాస్‌పూర్‌ మీదుగా సంగారెడ్డికి తీసుకువెళ్లారు. చెంగోముల్‌ గ్రామం నుంచి పోలీస్‌స్టేషన్‌ సుమారు ఐదు కిలోమీటర్లకు పైగా దూరం ఉంది. అంటే అలైన్‌మెంట్‌ను నాలుగైదు కిలోమీటర్ల మేర అవతలికి జరిపారు.
• గత అలైన్‌మెంట్‌లో ఎక్కడా సాంకేతిక సమస్యలు లేవు. సర్వేనే పూర్తికానందున భూసేకరణ సమస్య తలెత్తినట్టుగా చెప్పలేం. అలైన్‌మెంట్‌ మార్పు వెనక భారీ వ్యూహం ఉన్నదనేది స్పష్టం. ఫోర్త్‌సిటీ కోసం అలైన్‌మెంట్‌ మార్చినట్టుగా ప్రభుత్వ పెద్దలు బయట ప్రచారం చేస్తున్నప్పటికీ.. గత అలైన్‌మెంట్‌ మాత్రమే ఫోర్త్‌ సిటీకి సమీపంలో ఉన్నది. తాజా అలైన్‌మెంట్‌ నాలుగైదు కిలోమీటర్ల దూరం పెరిగింది. దీంతో మార్పు వెనక ఉద్దేశం వేరే ఉందనేది బహిరంగ రహస్యం.