Musi Project | క్లారిటీ మిస్సింగ్‌.. మొన్న థేమ్స్‌ మాడల్‌.. నిన్న సుందరీకరణ.. ఇప్పుడు పునరుజ్జీవం

మూసీ ప్రాజెక్టుపై రేవంత్‌ సర్కారుకు స్పష్టత లోపించినట్టు నిపుణులు, ఇంజినీర్లు అభిప్రాయపడుతున్నారు.

• మూసీ ప్రాజెక్టుపై రేవంత్‌ ప్రభుత్వానికి స్పష్టత కరువు

Musi Project | (స్పెషల్‌ టాస్క్‌ బ్యూరో) హైదరాబాద్‌, అక్టోబర్‌ 18 (నమస్తే తెలంగాణ): మూసీ ప్రాజెక్టుపై రేవంత్‌ సర్కారుకు స్పష్టత లోపించినట్టు నిపుణులు, ఇంజినీర్లు అభిప్రాయపడుతున్నారు. మూసీ ప్రాజెక్టుకు లండన్‌లోని థేమ్స్‌ మాడల్‌ను అనుసరిస్తామని ఒకసారి, ప్రక్షాళన చేపడుతామని మరోసారి, మూసీ సుందరీకరణ చేపడుతామని ఇంకోసారి, సుందరీకరణ కాదు నదీ పునరుజ్జీవనానికే కట్టుబడి ఉన్నామని మరోసారి సీఎం రేవంత్‌ పలు విధాలుగా ప్రకటనలు చేయడమే ఉదాహరణగా చెప్తున్నారు. తాజాగా దక్షిణ కొరియాలోని సియోల్‌లో ఉన్న చుంగ్‌ గై చున్‌ రీస్టోరేషన్‌ ప్రాజెక్టును పరిశీలించేందుకు ప్రభుత్వ బృందం సిద్ధమైంది. దీంతో నదులకు సంబంధించిన ప్రాజెక్టులు ఎన్ని రకాలన్న దానిపై చర్చ మొదలైంది.

నదీ ప్రాజెక్టులు-రకాలు

• రివర్‌ఫ్రంట్‌ ప్రాజెక్టు నదీ పరీవాహకంలోని గట్టుమీద మొక్కలు, చెట్లు, పార్కులు అభివృద్ధి చేస్తారు. వాటిని విద్యుత్తు దీపాలతో అలంకరించి పర్యాటకంగా అభివృద్ధి చేస్తారు. ఈ పనులు చేపట్టడానికంటే ముందే నదిలో మురుగు చేరకుండా సీవరేజీ ట్రీట్మెంట్‌ పూర్తి చేస్తారు.
• రివర్‌ రీస్టోరేషన్‌/రీజ్యువెనేషన్‌ ప్రాజెక్టు కాలక్రమంలో తన అస్థిత్వాన్ని కోల్పోయిన నదిని తిరిగి మునుపటి విధంగా మార్చేందుకే ఈ ప్రాజెక్టు చేపడుతారు. ఈ విధానంలో గతంలో నది ఎలా ఉండేదో అలాగే మారుస్తారు.
• రివర్‌ ప్యూరిఫికేషన్‌ ప్రాజెక్టు- నది సుందరీకరణ కాకుండా కేవలం నదిలోని మురికిని తొలగించడానికి ఈ ప్రాజెక్టును చేపడుతారు. నదీ జలాల్లో మురికి చేరకుండా సీవరేజీ ట్రీట్మెంట్‌ను కూడా ఏర్పాటు చేస్తారు.
• రివర్‌ డెవలప్‌మెంట్‌ ప్రాజెక్టు అడుగంటుతున్న నదీ జలాల్ని పెంచడానికి ప్రధాన నదీ ప్రవాహానికి వాగులను అనుసంధానించి సుందరీకరిస్తారు. నదీజలాల్లో మత్స్య, ఇతర జీవాల సంతతిని పెంచుతారు.
• రివర్‌ బ్యూటిఫికేషన్‌ ప్రాజెక్టు నదీతీరంలోని ప్రాంతాన్ని పర్యాటకంగా అభివృద్ధి చేస్తారు. నదీ జలాల ప్రక్షాళన అనేది ఇందులో ఉండదు.