Visit:
గీసుగొండ/మహబూబాబాద్‌ రూరల్‌, నవంబర్‌ 29 : ప్రభుత్వ నిర్లక్ష్యానికి మరో రిటైర్డ్‌ ఉపాద్యాయుడు బలయ్యాడు. ప్రభుత్వం నుంచి బెనిఫిట్స్‌ సకాలంలో రాకపోవడంతో వైద్యానికి డబ్బులు అందక మృతి చెందాడు. వివరాల్లోకి వెళ్తే.. మహబూబాబాద్‌ జిల్లా కేసముద్రం మండలం పెనుగొండకు చెందిన కంకల బీరయ్య(61) వరంగల్‌ జిల్లా గీసుకొండ మండలం రెడ్డిపాలెంలోని ప్రభుత్వ ప్రాథమిక పాఠశాలలో టీచర్‌గా 2024 డిసెంబరు 31న ఉద్యోగ విరమణ పొందాడు. కొంతకాలంగా బీరయ్య క్యాన్సర్‌తో ఇబ్బందులు ఎదుర్కొంటున్నాడు. ప్రభుత్వం నుంచి రావాల్సిన గ్రాట్యుటీ, కమ్యుటేషన్‌, జీపీఎఫ్‌, లీవ్‌ ఎన్‌క్యాష్‌మెంట్‌ సకాలంలో రాలేదు. బీరయ్యకు భార్య లక్ష్మి, ఇద్దరు కూతుళ్లు, కుమారుడు ఉన్నాడు. కుమార్తెలకు వివాహం అయ్యింది. కుమారుడు గోల్డ్‌స్మిత్‌ వర్క్‌ చేస్తూ జీవనం సాగిస్తున్నారు.
బీరయ్య తన వద్ద ఉన్న రూ.5లక్షలతో పాటు ఇతరుల వద్ద మిత్తికి తెచ్చుకున్న డబ్బులను తన వైద్యం కోసం ఖర్చు చేశాడు. రిటైర్‌మెంట్‌ డబ్బులు వస్తా యని గీసుకొండ మండలం కీర్తినగర్‌లో ఇంటి నిర్మాణం చేపట్టాడు. డబ్బులు రాకపోవడంతో పనులు మధ్యలో ఆగిపోయాయి. బీరయ్యకు ప్రభుత్వం నుంచి రూ.43లక్షలు రావాల్సి ఉన్నది. హైదరాబాద్‌లోని ఓ ప్రైవేట్‌ దవాఖానలో చికిత్స పొందుతుండగా, డబ్బులు అందకపోవడంతో శనివారం మృతిచెందాడు.
బీరయ్య అంత్యక్రియలు కీర్తినగర్‌లో నిర్వహించారు. ప్రభుత్వ నిర్లక్ష్యంతో డబ్బులు సకాలంలో అందక, వైద్యం చేయించుకోలేక బీరయ్య మృతి చెందాడని రిటైర్డ్‌ ఎంప్లాయీస్‌ పెన్షనర్ల అసోసియేషన్‌ మహబూబాబాద్‌ జిల్లా అధ్యక్షుడు సంకా బద్రినారాయణ ఆగ్రహం వ్యక్తం చేశారు. బీరయ్య మృతిని ప్రభుత్వ హత్యగా భావిస్తున్నట్టు తెలిపారు. ఇప్పటికైనా రాష్ట్ర ప్రభుత్వం రిటైర్డ్‌ ఉద్యోగులకు వెంటనే బకాయిలు విడుదల చేయాలని డిమాండ్‌ చేశారు.
