ఉద్యోగ దంపతులు ఒక్కచోటే

• ఉపాధ్యాయ దంపతుల సమస్య పరిష్కారం
• విద్యాశాఖలో 1,586 మందికి ప్రయోజనం

హైదరాబాద్‌, జనవరి 5(నమస్తే తెలంగాణ ): కొత్త జోన్లు, జిల్లాల ప్రకారం ఉద్యోగుల కేటాయింపు ప్రక్రియతో తాజాగా 1,586 మంది ఉద్యోగుల కుటుంబాలను ఎన్నో ఏండ్లుగా పీడిస్తున్న సమస్య పరిష్కారమైంది. తెలంగాణ ప్రభుత్వం మానవతా దృక్పథంతో వ్యవహరించడంతో చెరో జిల్లాలో పనిచేస్తున్న దంపతులు ఒకే జిల్లాకు బదిలీ అయ్యారు. ఉద్యోగుల బదిలీలు, కేటాయింపుల ప్రక్రియలో భాగంగా విద్యాశాఖలో స్పౌజ్‌ కేసుల దరఖాస్తులను బుధవారం పరిష్కరించారు. దంపతులిద్దరూ ఒకే జిల్లాలో ఉండే విధంగా చర్యలు తీసుకొన్నారు. 1,586 మంది జాబితాను విడుదల చేశారు. ఆయా జాబితాలను జిల్లా విద్యాశాఖాధికారి కార్యాలయాల్లో ప్రదర్శించారు. ముఖ్యమంత్రి కేసీఆర్‌ తీసుకొన్న నిర్ణయంతో సుదీర్ఘకాల సమస్యలకు పరిష్కారం లభించడంతో ఆయా కుటుంబాలు సంబురాలు చేసుకొంటున్నాయి.

• మ్యాన పవన్‌కుమార్‌, గజెల్లి సునీత దంపతులు ఇద్దరూ ఉపాధ్యాయులు. పదకొండేండ్లుగా చెరో జిల్లాలో పనిచేస్తూ ఇబ్బంది పడుతున్నారు. స్థానికత ప్రకారం పవన్‌కుమార్‌ ఉమ్మడి ఆదిలాబాద్‌ (ప్రస్తుతం మంచిర్యాల), సునీత ఉమ్మడి కరీంనగర్‌ (ప్రస్తుతం జగిత్యాల) జిల్లాల్లో ఉద్యోగాలు పొందారు. స్పౌజ్‌ కోటాలో బదిలీ కోసం ప్రయత్నించినప్పటికీ ఉమ్మడి ఆంధ్రప్రదేశ్‌లో సాధ్యం కాలేదు. కొత్త జోన్లు, జిల్లాలకు ఉద్యోగుల కేటాయింపులో భాగంగా స్పౌజ్‌ కోటాలో వీరిద్దరినీ జగిత్యాల జిల్లాకు కేటాయించారు. తమ సమస్యను తీర్చిన ముఖ్యమంత్రి కేసీఆర్‌కు రుణపడి ఉంటామని ఆనందంగా చెప్తున్నారు ఈ దంపతులు.

• కల్వల్‌ శ్రీకాంత్‌, పరమేశ్వరి దంపతులదీ ఇదే సంతోషం. పరమేశ్వరి 2006లో వరంగల్‌ జిల్లాలో స్కూల్‌ అసిస్టెంట్‌ టీచర్‌ (ఎస్టీజీ)గా ఎంపికయ్యారు. ప్రస్తుతం సిద్దిపేటలో పనిచేస్తున్నారు. ఆమె భర్త కల్వల్‌ శ్రీకాంత్‌ మహబూబ్‌నగర్‌ జిల్లాలో ఉద్యోగిగా ఎంపికై, ప్రస్తుతం నారాయణపేట జిల్లాలో పనిచేస్తున్నారు. తాజా కేటాయింపులో వీరిద్దరినీ నారాయణపేట జిల్లాకు కేటాయించారు. పిల్లల చదువులు, భవిష్యత్తుపై తమ ఆందోళనంతా ఈ రోజుతో తీరిపోయిందని సంతోషం వ్యక్తం చేస్తున్నారు.