నిన్నటి అసెంబ్లీ ఘటనలపై ఐదు కేసులు నమోదు.. కేటీఆర్, హరీశ్‌రావుపైనా కేసులు

అసెంబ్లీ సమావేశాల సందర్భంగా సోమవారం ఏర్పడిన ఉద్రిక్త పరిస్థితుల నేపథ్యంలో పోలీసులు మొత్తం ఐదు కేసులు నమోదు చేశారు. ఎమ్మెల్సీలు తాతా మధు, నవీన్ కుమార్ రెడ్డిపై ఎస్సీ, ఎస్టీ అట్రాసిటీ కేసులు పెట్టారు.

అసెంబ్లీ సమావేశాల సందర్భంగా సోమవారం ఏర్పడిన ఉద్రిక్త పరిస్థితుల నేపథ్యంలో పోలీసులు మొత్తం ఐదు కేసులు నమోదు చేశారు. ఎమ్మెల్సీలు తాతా మధు, నవీన్ కుమార్ రెడ్డిపై ఎస్సీ, ఎస్టీ అట్రాసిటీ కేసులు పెట్టారు. స్పీకర్ గడ్డం ప్రసాద్ కుమార్‌పై అనుచిత వ్యాఖ్యలు చేశారన్న ఆరోపణల నేపథ్యంలో పోలీసులు ఈ చర్యలకు దిగారు. ఈ క్రమంలోనే వారిని మంగళవారం ఉదయం అరెస్టు చేసి నారాయణగూడ పోలీస్ స్టేషన్‌కు తరలించారు. ఇద్దరిపై సెక్షన్ బీఎన్ఎస్ 352, 3(5) SC/ST POA చట్టంలోని సెక్షన్ 3(1)(r), 3(2)(va), 3(2)(vii) కింద కేసులు నమోదు చేశారు.

పోలీసు అధికారులపై దాడి చేసి దూషించారనే ఆరోపణలతో హరీశ్‌రావు, కేటీఆర్‌తో పాటు పలువురు బీఆర్ఎస్ ప్రజాప్రతినిధులపైనా కేసులు నమోదయ్యాయి. డిటెక్టివ్ ఇన్‌స్పెక్టర్ ఎం బాలస్వామి ఫిర్యాదు మేరకు కేటీఆర్, హరీశ్ రావు, సుధీర్ రెడ్డి, గంగుల కమలాకర్, పాడి కౌశిక్ రెడ్డి, జగదీశ్ రెడ్డి, శంబీపూర్ రాజు, సునీతా లక్ష్మారెడ్డి, కోవా లక్ష్మి, సబితా ఇంద్రారెడ్డి, సంజయ్, విజేయుడు, తాత మధు, నవీన్ కుమార్ రెడ్డి సహా మొత్తం 15 మందిపై సైఫాబాద్ పోలీసులు కేసు నమోదు చేశారు.

ఇక అసెంబ్లీ సమావేశాల సందర్భంగా పెట్రోల్ పోసుకుని హంగామా చేశారని ఆప్ కార్యకర్త హేమచంద్రపై, ప్రభుత్వ ఆస్తులను ధ్వంసం చేశారని బీజేపీ కార్యకర్త గణేశ్‌పై కేసులు పెట్టారు.