పెన్సిల్‌ కోడ్‌పై ఏసీబీ రైడ్‌.. రాష్ట్రవ్యాప్తంగా సబ్‌రిజిస్ట్రార్‌ ఆఫీసుల్లో విస్తృత తనిఖీలు

రిజిస్ట్రేషన్ల కోసం వచ్చే వారి నుంచి అక్రమంగా లక్షల రూపాయలు వసూలు చేస్తున్న సబ్‌రిజిస్ట్రార్‌ కార్యాలయ సిబ్బంది, డాక్యుమెంట్‌ రైటర్లపై అవినీతి నిరోధకశాఖ కొరడా ఝులిపించింది.

• నమస్తే తెలంగాణ’ కథనంతో కదలిక..
• రాష్ట్రవ్యాప్తంగా సోదాలు సబ్‌రిజిస్ట్రార్‌ ఆఫీసుల్లో రోజంతా తనిఖీలు
• పలు అనుమానాస్పద లావాదేవీల గుర్తింపు
• కార్యాలయాల్లో ఉన్న ప్రైవేట్‌ వ్యక్తుల అరెస్ట్‌
• వివరాలు వెల్లడించని ఏసీబీ అధికారులు

హైదరాబాద్‌, నవంబర్‌ 14 (నమస్తే తెలంగాణ): రిజిస్ట్రేషన్ల కోసం వచ్చే వారి నుంచి అక్రమంగా లక్షల రూపాయలు వసూలు చేస్తున్న సబ్‌రిజిస్ట్రార్‌ కార్యాలయ (Sub Registrar Office) సిబ్బంది, డాక్యుమెంట్‌ రైటర్లపై అవినీతి నిరోధకశాఖ కొరడా ఝులిపించింది. ఒక్కో ఆఫీసులో రోజుకు కనీసం రూ.2 లక్షల వరకు పథకం ప్రకారం దండుకుంటున్న వారిపై ఏసీబీ అధికారులు యాక్షన్‌కు దిగారు. శుక్రవారం ‘నమస్తే తెలంగాణ’ దినపత్రిక మొదటి పేజీలో ‘పెన్సిల్‌ రాత.. కోట్లల్లో మేత’ శీర్షికన రిజిస్ట్రేషన్‌ ఆఫీసులలో జోరుగా సాగుతున్న వసూళ్ల దందాపై కథనం ప్రచురితమైంది. పెన్సిల్‌ రాత తో పేపర్‌పై మార్కింగ్‌ చేసి, సైన్‌ లాంగ్వేజ్‌తో వాటాలు పంచుకుంటూ రూ.కోట్లు జేబులు నింపుకుంటున్న వైనాన్ని బయటపెట్టింది. ప్రజల ముక్కుపిండి అదనంగా వసూలు చేస్తు న్న తీరును వెల్లడించింది. గతంలోనే ఏసీబీకి ఫిర్యాదులు వచ్చినా స్పందించలేదు. ‘నమస్తే తెలంగాణ’లో కథనం ప్రచురితం కావడంతో అధికారులు కదిలారు. ఏసీబీ ఇన్‌చార్జి డీజీ చారుసిన్హా ఆదేశాలతో రాష్ట్రంలోని అన్ని సబ్‌ రిజిస్ట్రార్‌ కార్యాలయాల్లో సోదాలు చేపట్టారు.

రాష్ట్రవ్యాప్తంగా విస్తృత తనిఖీలు

• ఖమ్మం జిల్లా వైరా సబ్‌రిజిస్టార్‌ కార్యాలయంలో శుక్రవారం ఏసీబీ డీఎస్పీ రమేశ్‌ ఆధ్వర్యంలో సీఐ శేఖర్‌తోపాటు పది మంది అధికారులు తనిఖీలు చేశారు. డాక్యుమెంట్‌ రైటర్ల గదులను పరిశీలించి పలువురి సెల్‌ఫోన్లను, అనుమానాస్పద నగదును స్వాధీనం చేసుకున్నారు.
• పెద్దపల్లిలోని సబ్‌ రిజిస్ట్రార్‌ కార్యాలయంలో కరీంనగర్‌ ఏసీబీ డీఎస్పీ విజయ్‌కుమార్‌ ఆధ్వర్యంలో అధికారులు తనిఖీ చేశారు. డాక్యుమెంట్లు, రికార్డులను పరిశీలించారు. డాక్యుమెంట్‌ రైటర్లను సైతం విచారించారు.
• వనపర్తిలోని సబ్‌రిజిస్ట్రార్‌ కార్యాలయంలో ఏసీబీ డీఎస్పీ సీహెచ్‌ బాలకృష్ణ ఆధ్వర్యంలో రెండు గంటలపాటు సోదాలు చేశారు. వివరాలు త్వరలో వెల్లడిస్తామని ఏసీబీ డీఎస్పీ వెల్లడించారు. జడ్చర్లలో వనపర్తి సబ్‌రిజిస్ట్రార్‌ చంద్రశేఖర్‌ ఇంట్లో ఏసీబీ సీఐ జిలానీ ఆధ్వర్యంలో తనిఖీలు నిర్వహించారు.

రెండుచోట్ల నగదు స్వాధీనం

• నల్లగొండ జిల్లా మిర్యాలగూడ సబ్‌ రిజిస్ట్రార్‌ కార్యాలయంలో ఏసీబీ డీఎస్పీ జగదీశ్‌చంద్ర ఆధ్వర్యంలో అధికారులు దాడులు చేశారు. హైదరాబాద్‌లోని రిజిస్ట్రార్‌ బలరాంయాదవ్‌ ఇంట్లోనూ సోదాలు నిర్వహించారు. రికార్డులు, దస్తావేజులు స్వాధీనం చేసుకున్నారు. అనధికారిక అసిస్టెంట్‌ వద్ద గల రూ.60,160 నగదును సీజ్‌ చేశారు. సంగారెడ్డి జిల్లా జహీరాబాద్‌ పరిధిలోని రంజోల్‌ గ్రామ సమీపంలో సబ్‌ రిజిస్టార్‌ కార్యాలయంపై శుక్రవారం ఏసీబీ ఉమ్మడి మెదక్‌ జిల్లా డీఎస్పీ సుదర్శన్‌ ఆధ్వర్యంలో అధికారులు మెరుపు దాడులు నిర్వహించారు. ఆఫీసులోని 10 మంది డాక్యుమెంట్‌ రైటర్ల నుంచి రూ. 42,300లను ఏసీబీ అధికారులు స్వాధీనం చేసుకున్నారు.
• నిజామాబాద్‌ అర్బన్‌ సబ్‌రిజిస్ట్రార్‌ కార్యాలయంలో ఏసీబీ డీఎస్పీ శేఖర్‌గౌడ్‌ అధ్వర్యంలోని అధికారులు గేట్లు మూసివేసి తనిఖీ చేశారు. డాక్యుమెంట్లు, రిజిస్ట్రేషన్ల దస్ర్తాలు పరిశీలించారు. కాంప్లెక్స్‌లోని డాక్యుమెంట్‌ రైటర్స్‌ తమ షాపులకు తాళాలు వేసి పరుగులు పెట్టారు.
• జయశంకర్‌ భూపాలపల్లి జిల్లా సబ్‌రిజిస్ట్రార్‌ కార్యాలయంలో ఏసీబీ డీఎస్పీ సాంబయ్య ఆధ్వర్యంలో సీఐలు ఎస్‌ రాజు, ఎల్‌ రాజు, సిబ్బందితో కలిసి సోదాలు నిర్వహించారు. ప్రైవేట్‌ డాక్యుమెంట్‌ రైటర్లు ఆఫీస్‌లోనే తిష్ట వేయడాన్ని గుర్తించారు. 42 డాక్యుమెంట్లను దస్తావేజు రైటర్లు సంతకం లేకుండానే నేరుగా తీసుకున్నట్టు తెలిపారు. ఉన్నతాధికారులకు నివేదిక సమర్పిస్తామని ఏసీబీ అధికారులు చెప్పారు.