డిగ్రీ ఏదైనా పీజీ మీ ఇష్టం

‘నేను డిగ్రీ బీఎస్సీ పూర్తి చేశాను. సివిల్స్‌ రాయాలనుకొంటున్నా. ఇందుకు ఎంఏ చేయాలని ఉన్నా అవకాశం లేకుండా పోయింది. నాలుగేండ్ల బీటెక్‌ అయిపోయింది. ఎంటెక్‌ కాకుం డా ఎమ్మెస్సీ చదవాలని ఉన్నది.’ ఇవి తరచూ వినిపిస్తున్న మాటలు. ఇప్పటివరకు డిగ్రీ ఏ కోర్సులో చదివామో పీజీ కూడా అదే కోర్సులో పూర్తి చేయాల్సి ఉన్నది

• ఎనీ డిగ్రీ టు ఎనీ పీజీ చేసే చాన్స్‌.. సాధ్యాసాధ్యాలపై ఓయూ కసరత్తు
• వచ్చే విద్యాసంవత్సరం నుంచి అమల్లోకి

హైదరాబాద్‌, అక్టోబర్‌ 25 (నమస్తే తెలంగాణ): ‘నేను డిగ్రీ బీఎస్సీ పూర్తి చేశాను. సివిల్స్‌ రాయాలనుకొంటున్నా. ఇందుకు ఎంఏ చేయాలని ఉన్నా అవకాశం లేకుండా పోయింది. నాలుగేండ్ల బీటెక్‌ అయిపోయింది. ఎంటెక్‌ కాకుం డా ఎమ్మెస్సీ చదవాలని ఉన్నది.’ ఇవి తరచూ వినిపిస్తున్న మాటలు. ఇప్పటివరకు డిగ్రీ ఏ కోర్సులో చదివామో పీజీ కూడా అదే కోర్సులో పూర్తి చేయాల్సి ఉన్నది. ఈ సంప్రదాయ విధానానికి భిన్నంగా డిగ్రీ ఏదైనా పీజీలో ఇష్టమైన కోర్సు అభ్యసించే అవకాశం రాబోతున్నది. ఇందుకు ప్రతిష్ఠాత్మక ఉస్మానియా యూనివర్సిటీ కసరత్తు చేస్తున్నది. దీని పరిణామాలు, ఉపాధి, ఉద్యోగావకాశాలపై లోతుగా అధ్యయనం చేస్తున్నది. స్పష్టత రాగానే ఉన్నత విద్యామండలికి నివేదించి వచ్చేవిద్యాసంవత్సరం నుంచి అమల్లోకి తేవాలని అధికారులు భావిస్తున్నారు.

ఆరు కోర్సుల్లో అమలు
ఈ విద్యాసంవత్సరం నుంచి డిగ్రీలో ఏ కోర్సు పూర్తిచేసినా పీజీలో 6 కోర్సులు..ఎంఏ తెలుగు, ఇంగ్లిష్‌, హిస్టరీ, పబ్లిక్‌ అడ్మినిస్ట్రేషన్‌, ఎకనామిక్స్‌, పొలిటికల్‌ సైన్స్‌లో చేరేందుకు అవకాశమిచ్చారు. తాజాగా చేపట్టిన సీపీగెట్‌ ప్రవేశాల్లో రాష్ట్రంలోని 7 వర్సిటీల్లోని పీజీ కాలేజీల్లో ఈ 6ఎంఏ కోర్సుల్లో ప్రవేశాలు కల్పిస్తున్నారు. బీటెక్‌, బీఏ, బీకాం, బీఎస్సీ తదితర కోర్సులు చదివినవారంతా ఈ కోర్సుల్లో చేరేందుకు అర్హులు. ఈ విధానం సత్ఫలితాలిస్తే వచ్చే విద్యాసంవత్సరం నుంచి ఎనీ డిగ్రీ టు ఎనీ పీజీలో చేరేందుకు అవకాశం కల్పించనున్నారు. అయితే ఏటా పీజీ కోర్సుల్లో ప్రవేశాలు కల్పించేందుకు నిర్వహించే సీపీగెట్‌లో ర్యాంకు వస్తేనే ఈ అవకాశం లభిస్తుంది.

ఉదాహరణలిలా..

• బీటెక్‌, బీఎస్సీ కోర్సులు పూర్తి చేసినవారు ఎమ్మెస్సీ కెమిస్ట్రీ, ఫిజిక్స్‌, గణితం, స్టాటిస్టిక్స్‌, ఎంఏ ఇంగ్లిష్‌ లిటరేచర్‌, ఎంఏ సైకాలజీ, ఎలక్ట్రానిక్స్‌, జియో ఇన్ఫర్మేటిక్స్‌, కంప్యూటర్‌ సైన్స్‌లో చేరవచ్చు.
• బీఫార్మసీ విద్యార్థులు బయోకెమిస్ట్రీ, బయోటెక్నాలజీ, జెనెటిక్స్‌, మైక్రోబయోలజీ, ఎన్విరాన్‌మెంటల్‌ సైన్స్‌ తదితర సబ్జెక్టుల్లో ప్రవేశాలు పొందవచ్చు.
• బీఏ, బీకాం, బీఎస్సీవారు ఎంఏ తెలుగు, సైకాలజీ, ఇంగ్లిష్‌, పొలిటికల్‌ సైన్స్‌, పబ్లిక్‌ అడ్మినిస్ట్రేషన్‌, ఎకనామిక్స్‌, జర్నలిజం, సోషియాలజీ, హిస్టరీలలో చేరవచ్చు.
• బీఎస్సీ వారు ఎంకాం, ఎంఏలో, బీఏ, బీకాం వారు ఎమ్మెస్సీలో చేరవచ్చు.