RC | వాహనం ఆర్సీ గడువు 15 ఏండ్లే.. ఆ తర్వాత ఐదేండ్లకోసారి రెన్యువల్‌ చేయాల్సిందే

సాధారణంగా ప్రైవేటు వాహనం రిజిస్ట్రేషన్‌ సర్టిఫికెట్‌ (ఆర్సీ) గడువు 15 సంవత్సరాలపాటు ఉంటుంది. ఇది ముగిసిన అనంతరం ప్రతి ఐదేండ్లకోసారి రెన్యువల్‌ చేసుకోవాలి. లేకుంటే ఆర్టీవో అధికారుల తనిఖీల్లో పట్టుపబడినప్పుడు భారీ జరిమానా చెల్లించాల్సి ఉంటుంది.

• లేకుంటే రవాణా శాఖకు జరిమానా చెల్లించాల్సిందే
• న్యాయపరమైన చిక్కులు రాకుండా ఉండాలంటే 60 రోజుల ముందే దరఖాస్తు చేసుకోవడం ఉత్తమం
• ఆర్సీరెన్యువల్‌కు ఆన్‌లైన్‌, ఆఫ్‌లైన్‌లో అవకాశం

RC | హైదరాబాద్‌, సెప్టెంబర్‌ 15 (నమస్తే తెలంగాణ): సాధారణంగా ప్రైవేటు వాహనం రిజిస్ట్రేషన్‌ సర్టిఫికెట్‌ (ఆర్సీ) గడువు 15 సంవత్సరాలపాటు ఉంటుంది. ఇది ముగిసిన అనంతరం ప్రతి ఐదేండ్లకోసారి రెన్యువల్‌ చేసుకోవాలి. లేకుంటే ఆర్టీవో అధికారుల తనిఖీల్లో పట్టుపబడినప్పుడు భారీ జరిమానా చెల్లించాల్సి ఉంటుంది. గడువు ముగిసిన తర్వాత ఆర్సీ రెన్యువల్‌ చేసుకోకుంటే సంవత్సరానికి వాహనం ఖరీదులో 10 శాతం వరకు అదనంగా ఫైన్‌ కట్టాల్సి ఉంటుంది. న్యాయపరమైన చికులు రాకుండా ఉండాలంటే గడువు ముగిసే తేదీకి ముందే రెన్యువల్‌ చేసుకోవడం ఉత్తమం. ఇందుకు ఆన్‌లైన్‌ ద్వారా సులభంగా దరఖాస్తు చేసుకోవచ్చు. ఆర్సీ రెన్యువల్‌కు ఫారం-25, దరఖాస్తు ఫారం, పొల్యూషన్‌ కంట్రోల్‌ సర్టిఫికెట్‌, ఆర్సీబుక్‌, ఫిట్‌నెస్‌ సర్టిఫికెట్‌, రిజిస్ట్రేషన్‌ సర్టిఫికెట్‌, రోడ్‌టాక్స్‌ చెల్లించిన డాక్యుమెంట్లు, ఇన్సూరెన్స్‌ సర్టిఫికెట్‌, పాన్‌కార్డు, చాసిస్‌, ఇంజిన్‌ పెన్సిల్‌ పాయిం ట్‌ తదితరాలు అవసరమవుతాయి.

ఆన్‌లైన్‌లో రెన్యువల్‌ ఇలా..

• మొదట https://parivahan.gov.in వెబ్‌సైట్‌ను సందర్శించాలి.
• మెను నుంచి ‘ఆన్‌లైన్‌ సేవలు’ క్లిక్‌ చేసి.. ‘వాహన సంబంధిత సేవలు’ను ఎంచుకోవాలి.
• మీ రాష్ట్రాన్ని, సమీప ఆర్టీవోను ఎంచుకుని ‘ప్రొసీడ్‌’పై క్లిక్‌ చేయాలి.
• ‘సేవలు’ విభాగంలోకి వెళ్లి డ్రాప్‌-డౌన్‌ జాబితా నుంచి ‘ఆర్‌సీ’ సంబంధిత సేవలను ఎంచుకోవాలి.
• ‘రిజిస్ట్రేషన్‌ రెన్యువల్‌’ని ఎంచుకుని, మీ వాహనం రిజిస్ట్రేషన్‌ నంబర్‌, చాసిస్‌ నంబర్‌ను ఎంటర్‌ చేయాలి
• దరఖాస్తు ప్రక్రియ పూర్తి చేయడానికి ‘వివరాలను ధృవీకరించు’ను క్లిక్‌ చేయాలి.
• రెన్యువల్‌ చార్జీలతో పాటు ఇతర ఫీజులు కూడా ఉంటాయి.

ఆఫ్‌లైన్‌లో రెన్యువల్‌ ఇలా..

• ఆర్సీ రెన్యువల్‌ కోసం ఆర్టీవో కార్యాలయంలో యజమాని దరఖాస్తు చేయాలి. అందుకోసం ఫారం-25ను నింపాలి. వాహన గడువు ముగిసిన నాటినుంచి 60రోజుల్లోగా పూర్తిచేయాల్సి ఉంటుంది.
• ఆర్సీ రెన్యువల్‌ కోసం దరఖాస్తు చేసిన తర్వాత, మీకు అపాయింట్‌మెంట్‌ ఇస్తారు.
• ఆ రోజు మీ వాహనాన్ని ఆర్టీవో కార్యాలయంలో సమర్పించాలి. ఆర్‌టీవో అధికారి మీ వాహనాన్ని తనిఖీ చేస్తారు.
• మీ వాహనంలో ఎలాంటి సమస్యలు లేనట్టయితే.. ఆర్టీవో ఇన్‌స్పెక్టర్‌ సంతకం చేసి రెన్యువల్‌కు ఆమోదముద్ర వేస్తారు.
• మీ వాహన ఆర్సీ రెన్యువల్‌ పూర్తయిన తర్వాత సంబంధిత చార్జీలు, పన్నులు చెల్లించాలి.
• రెన్యువల్‌ చార్జీలతోపాటు ఇతర ఫీజులు కూడా ఉంటాయి.