Polytechnics | అటానమస్‌ బాటలో పాలిటెక్నిక్‌లు.. సాంకేతిక విద్యామండలి మార్గదర్శకాలు

Polytechnics | రాష్ట్రంలో పాలిటెక్నిక్‌ కాలేజీలు అటానమస్‌ (స్వయంప్రతిపత్తి) హోదాను దక్కించుకొనేందుకు ప్రయత్నిస్తున్నాయి. ఇందులో ప్రభుత్వ పాలిటెక్నిక్‌ కాలేజీలు ముందువరుసలో ఉన్నాయి. ఇదివరకు డిగ్రీ, పీజీ, ఇంజినీరింగ్‌ కాలేజీలకు అటానమస్‌ హోదాను కల్పించిన విషయం తెలిసిందే.

• అఖిల భారత సాంకేతిక విద్యామండలి మార్గదర్శకాలు జారీ
• గతంలో డిగ్రీ, ఇంజినీరింగ్‌ కాలేజీలకు స్వయంప్రతిపత్తి హోదా
• ఇదే తరహాలో పాలిటెక్నిక్‌ కళాశాలలకు ఇచ్చేందుకు చర్యలు

హైదరాబాద్‌, డిసెంబర్‌ 19 (నమస్తే తెలంగాణ) : రాష్ట్రంలో పాలిటెక్నిక్‌ కాలేజీలు అటానమస్‌ (స్వయంప్రతిపత్తి) హోదాను దక్కించుకొనేందుకు ప్రయత్నిస్తున్నాయి. ఇందులో ప్రభుత్వ పాలిటెక్నిక్‌ కాలేజీలు ముందువరుసలో ఉన్నాయి. ఇదివరకు డిగ్రీ, పీజీ, ఇంజినీరింగ్‌ కాలేజీలకు అటానమస్‌ హోదాను కల్పించిన విషయం తెలిసిందే. ఈ నేపథ్యంలో ఈ విద్యాసంవత్సరం నుంచి పాలిటెక్నిక్‌ కాలేజీలకు అటానమస్‌ హోదా ఇచ్చేందుకు అఖిల భారత సాంకేతిక విద్యామండలి (ఏఐసీటీఈ) చర్యలు చేపట్టింది. ఈ మేరకు మార్గదర్శకాలు జారీచేసింది. రాష్ట్రంలో 56 ప్రభుత్వ, 70 ప్రైవేట్‌ పాలిటెక్నిక్‌ కాలేజీలున్నాయి.

ఇవి స్వయంప్రతిపత్తి హోదా ను దక్కించుకొనేందుకు కొత్తగా దరఖాస్తు చేసుకోవాల్సి ఉంటుంది. స్వయం ప్రతిపత్తి హోదా దక్కితే కాలేజీలే కొత్త కోర్సుల రూపకల్పనతో పాటు ఉన్న కోర్సుల రీడిజైన్‌ చేసేందుకు అవకాశం ఉంటుంది. ఈ కాలేజీలే సొంతంగా పరీక్షలను నిర్వహించి, మూల్యాంకనం చేసి ఫలితాలు విడుదల చేసే స్వేచ్ఛను కలిగి ఉంటా యి. అయితే అడ్మిషన్లు మాత్రం పాలిసెట్‌ ద్వారా చేపడుతారు. గతంలో టెక్విప్‌ ప్రోగ్రాంలో భాగంగా పాలిటెక్నిక్‌ కాలేజీలకు అటానమస్‌ హోదా కల్పించగా, ఈ గడువు ముగిసింది. తాజాగా ఏఐసీటీఈ మార్గదర్శకాల ప్రకారం అటానమస్‌ హోదా దక్కించుకొనేందుకు ప్రయత్నిస్తున్నట్టు ఓ ఉన్నతాధికారి తెలిపారు.

మార్గదర్శకాలు

• అటానమస్‌ హోదాకు దరఖాస్తు చేసే కాలేజీ కనీసం పదేండ్లు ఉనికిలో ఉండాలి. 30% కోర్సులు ఎన్‌బీఏ గుర్తింపు పొంది ఉండాలి లేదా 25 ఏండ్ల అనుభవం సరిపోతుంది.
• 50శాతం ఫ్యాకల్టీ ఏఐసీటీఈ సూచించిన నిబంధనల మేరకు రెగ్యులర్‌గా పనిచేస్తుండాలి.
• విద్యాసంస్థలోని 60% ఫ్యాకల్టీ ఐదేండ్లకంటే ఎక్కువ అనుభవజ్ఞులై ఉండాలి, 50% మంది మూడేండ్లుగా కొనసాగుతూ ఉండాలి.
• ఏఐసీటీఈ నిబంధనల ప్రకారం మౌలిక వసతుల కల్పన తప్పనిసరి.
• గడిచిన మూడేండ్లలో విద్యాసంస్థలో అన్ని సెమిస్టర్ల పాస్‌ పర్సంటేజీ 60శాతం కంటే మించి ఉండాలి. అడ్మిషన్లు 80శాతానికి పైగా భర్తీ కావాలి.
• గడిచిన మూడేండ్లలో 75% ఫైనలియర్‌ విద్యార్థులు ప్లేస్‌మెంట్‌ పొం దడం లేదా అంత్రప్రెన్యూర్‌షిప్‌, ఉన్నత విద్యాభ్యాసం చేస్తుండాలి.