Visit:
Harish Rao | హైదరాబాద్, ఆగస్టు 31 (నమస్తే తెలంగాణ): ‘రేవంత్రెడ్డీ.. ఎవరు మాట ఇచ్చి నిలబెట్టుకున్నారో, ఎవరు నమ్మించి నయవంచన చేశారో రాష్ట్ర ప్రజలు అన్నీ గమనిస్తున్నారు. నువ్వు మాట్లాడిన నంది ఎవరో.. పంది ఎవరో వారికి తెలుసు.. నువ్వు అన్న మాటలకు సమాధానం నీ వెయ్యి రోజుల పాలనే తేటతెల్లం’ అని మాజీ మంత్రి హరీశ్రావు పేర్కొన్నారు. మైక్ దొరికిన ప్రతిసారీ కేసీఆర్పై అక్కసు వెళ్లగక్కడం దుర్మార్గం అని ఆయన తీవ్ర ఆగ్రహం వ్యక్తంచేశారు. ఎన్ని అబద్ధాలు ప్రచారం చేసినా, ఎన్ని విమర్శలు గుప్పించినా తెలంగాణ చరిత్ర నుంచి కేసీఆర్ పేరును, ప్రజల గుండెల్లోంచి ఆయన ముద్రను చెరిపివేయడం ఎవరి తరమూ కాదు అని పేర్కొన్నారు.
పదేండ్లపాటు సాగునీరు, నిరంతర విద్యుత్, రైతుబంధు, సంక్షేమం, సమగ్ర మౌలిక వసతులతో తెలంగాణను దేశానికే ఆదర్శంగా నిలిపిన దార్శనికుడు కేసీఆర్ లాంటి మహానేతపై నోరుపారేసుకోవడం సీఎం రేవంత్కు సులభమే కావచ్చు, కానీ ఆయనలా తెలంగాణ కోసం నిబద్ధతతో పనిచేయడం, రాష్ట్రాన్ని ప్రగతిపథంలో నడుపడం వెయ్యి జన్మలెత్తినా అతడి వల్ల కాదని తేల్చిచెప్పారు. సోమవారం మూసారాంబాగ్ హైలెవల్ బ్రిడ్జ్ ప్రారంభోత్సవ సభలో బీఆర్ఎస్ అధినేత కేసీఆర్పై ముఖ్యమంత్రి రేవంత్రెడ్డి చేసిన వ్యక్తిగత విమర్శలపై హరీశ్రావు ఎక్స్ వేదికగా తీవ్రంగా స్పందించారు.
సందర్భమేదైనా కేసీఆర్పై వ్యక్తిగత దూషణలకు దిగడం వల్ల రేవంత్ స్థాయి ఏమాత్రం పెరుగదని గుర్తుంచుకోవాలని హితవు పలికారు. పైగా ఒక ముఖ్యమంత్రి సీట్లో కూర్చొని ఇలాంటి దిగజారుడు వ్యాఖ్యలు చేయడం రేవంత్ రాజకీయ కుసంస్కారం, ఆలోచనా దౌర్భాగ్యం ప్రజలకు మరింత స్పష్టంగా అర్థమవుతున్నదని పేర్కొన్నారు. ‘ముఖ్యమంత్రిగా ప్రజల కష్టాలను పట్టించుకోవాలి.. ఎన్నికల్లో ఇచ్చిన హామీలను నిలబెట్టుకోవాలి.. కానీ నీ వైఫల్యాలను ప్రశ్నిస్తున్న ప్రజల దృష్టిని మళ్లించేందుకు ప్రతిసారీ కేసీఆర్పై నిందలు మోపడం, దుర్భాషలాడడం నీ ఏకైక అజెండాగా మార్చుకోవడం సిగ్గుచేటు. తెలంగాణ అస్తిత్వం కోసం ప్రాణాలను పణంగా పెట్టి, ఉద్యమాన్ని ఉధృతం చేసి, ప్రత్యేక రాష్ట్రాన్ని సాధించి పెట్టిన ఉద్యమ రథసారథి కేసీఆర్ గురించి అని గుర్తుపెట్టుకో’ అంటూ దుయ్యబట్టారు. రేవంత్రెడ్డి డైవర్షన్ రాజకీయాలను తెలంగాణ సమాజం నిశితంగా గమనిస్తున్నదని చెప్పారు.
రేవంత్రెడ్డి.. ఇంతకీ వెయ్యి రోజుల పాలనలో ఏం సాధించావో ప్రజలకు సమాధానం చెప్పాలని అని హరీశ్రావు సూటిగా ప్రశ్నించారు. ‘ఆరు గ్యారెంటీల పేరిట ఇచ్చిన హామీల అమలు ఎకడికి పోయింది? రైతుబంధు, పూర్తిస్థాయి రుణమాఫీ, మహిళలకు సంక్షేమం, నిరుద్యోగ భృతి లాంటి అనేక వాగ్దానాలపై ప్రజలు రోడ్లెకి నిలదీస్తున్నారు. హైడ్రా పేరుతో పేదల గూళ్లను కూల్చివేయడం, మూసీ ప్రాజెక్టుల పేరుతో సాగిస్తున్న వివాదాలు, భూముల వ్యవహారాలపై వెల్లువెత్తుతున్న ప్రజాందోళనలకు నీ దగ్గర జవాబు ఉందా?
ఈ ప్రజా సమస్యలపై సమాధానం చెప్పలేక, ప్రతిరోజూ కేసీఆర్ను దూషిస్తే నీ పాలనా వైఫల్యాలు మరుగున పడిపోవు.. కేవలం తిట్లతో ప్రజల కడుపు నిండదు, విమర్శలతో వ్యవస్థాగత సమస్యలు పరిషారం కావు..’ అనే విషయాన్ని గుర్తుంచుకోవాలని సూచించారు. ఇప్పటికైనా ఈ చిల్లర మాటలు, డైవర్షన్ రాజకీయాలు బంద్ చేసి ప్రజలకు ఇచ్చిన హామీలను నెరవేర్చడంపై నిజాయితీగా దృష్టిపెట్టాలని హితవు పలికారు. కేసీఆర్పై చేసిన వ్యాఖ్యలను వెంటనే ఉపసంహరించుకొని, బేషరతుగా క్షమాపణ చెప్పాలని హరీశ్రావు డిమాండ్ చేశారు.
