మూడంచెల్లో బోగస్‌ అధ్యాపకులకు చెక్‌!

• నకిలీ సర్టిఫికెట్ల నిర్ధారణకు ప్రత్యేక విభాగం
• ఫేక్‌గా తేలితే 5నెలలు వర్సిటీ వద్దే సర్టిఫికెట్లు

హైదరాబాద్‌, అక్టోబర్‌ 9 (నమస్తే తెలంగాణ): బోగస్‌ అధ్యాపకులను అరికట్టేందుకు జేఎన్టీయూ కొత్త మార్గాలను అనుసరిస్తున్నది. ఫ్యాకల్టీ సమర్పించిన విద్యార్హత ధృవీకరణ పత్రాలను ఐదు నెలలపాటు యూనివర్సిటీ వద్దే ఉంచకుంటున్నది. ఈ మధ్యకాలంలో ఎవరివైనా ఫేక్‌ సర్టిఫికెట్లుగా అనుమానం వచ్చినా, ఫిర్యాదులందినా విచారణ జరిపి వారిపై చర్యలు తీసుకోనున్నారు. జేఎన్టీయూ అనుబంధ గుర్తింపు పొందిన ప్రైవేట్‌ కాలేజీల్లో బోగస్‌ అధ్యాపకులు పనిచేస్తున్నారన్న ఫిర్యాదులున్నాయి. ఫేక్‌ పీహెచ్‌డీలు, ఎంటెక్‌ ధ్రువీకరణలు సమర్పించి ప్రొఫెసర్లు, అధ్యాపకులు, ప్రిన్సిపాళ్లుగా పనిచేస్తున్నట్టు ఆరోపణలున్నాయి. దీన్ని అరికట్టేందుకు ఈ విద్యాసంవత్సరం నుంచి జేఎన్టీయూ మూడంచెల విధానాన్ని అనుసరించనున్నది.

మూడంచెల్లో తనిఖీలు

• మొదటి దశలో ఫ్యాకల్టీ ర్యాటిఫికేషన్‌లో భాగంగా కాలేజీలు సమర్పించిన విద్యార్హత ధ్రువీకరణ పత్రాలను సంబంధిత కాలేజీలు పరిశీలించి, అవన్ని సరైనవేనని, ఫేక్‌ సర్టిఫికెట్లు కావని అఫిడవిట్‌ సమర్పించాలి.
• రెండో దశలో ఫ్యాకల్టీ ర్యాటిఫికేషన్‌ సమయంలో యూనివర్సిటీ అధికారులతో కూడిన మరో కమిటీ సర్టిఫికెట్లను క్షుణ్ణంగా పరిశీలిస్తుంది.
• మూడో దశలో ఫేక్‌ సర్టిఫికెట్లపై విచారణ జరిపేందుకు ప్రత్యేక విభాగాన్ని ఏర్పాటు చేశారు. ఈ విభాగం సర్టిఫికెట్లు జారీచేసిన యూనివర్సిటీలతో సంప్రదింపులు జరిపి అసలువో, కాదే తేలుస్తుంది. అంత వరకు ఈ సర్టిఫికెట్లు అసలువో కాదే తేలేవరకు 5నెలల పాటు యూనివర్సిటీ వద్దే ఉంటాయి.