RGUKT | ఆర్జీయూకేటీలో విదేశీ విద్యార్థులు.. బీటెక్‌ ఇక్కడా.. విదేశాల్లో చదివే చాన్స్‌

బాసర ఆర్జీయూకేటీలో వచ్చేవిద్యాసంవత్సరం నుం చి ట్విన్నింగ్‌ ప్రోగ్రామ్స్‌ నిర్వహించాలని అధికారులు నిర్ణయించారు.

• ట్విన్నింగ్‌ ప్రోగ్రామ్స్‌ నిర్వహణకు నిర్ణయం
• పీయూసీలో ఏఐ, మెషిన్‌ లెర్నింగ్‌ కోర్సులు
• ఇంటర్‌బోర్డుతో వర్సిటీ అధికారుల చర్చలు
• ప్రవేశాలకు షెడ్యూల్‌ విడుదల చేసిన వీసీ

హైదరాబాద్‌, మే 24 (నమస్తే తెలంగాణ): బాసర ఆర్జీయూకేటీలో వచ్చేవిద్యాసంవత్సరం నుం చి ట్విన్నింగ్‌ ప్రోగ్రామ్స్‌ నిర్వహించాలని అధికారులు నిర్ణయించారు. ఇందులో భాగంగా వర్సిటీలో ల్యాట్రల్‌ ఎంట్రీ ద్వారా విదేశీ విద్యార్థులకు ప్రవేశాలు కల్పిస్తారు. దీని ద్వారా విద్యార్థులు బీటెక్‌ను మన దేశంతోపాటు, విదేశాల్లోనూ చదువొచ్చు. ఈ ప్రవేశాల నోటిఫికేషన్‌ను బుధవారం వర్సిటీ అధికారులు విడుదల చేశారు. తొలుత నాలుగు దేశాల విద్యార్థులను ఆర్జీయూకేటీలో చేర్చుకొంటారు. ఆ తర్వాత మిగతా దేశాలకు క్రమంగా విస్తరిస్తారు. ఒక సెమిస్టర్‌ను విదేశీ విద్యార్థులు ఇక్కడ అభ్యసిస్తుండగా, మన విద్యార్థులు కూడా ఆయా విదేశీ వర్సిటీల్లో ఒక సెమిస్టర్‌ లేదా ఒక సంవత్సరం పూర్తిస్థాయిలో చదువుతారు. ఇలా ఆర్జీయూటీకే అధికారులు బీటెక్‌లో ల్యాట్రల్‌ ఎంట్రీకి అవకాశం కల్పించారు. అభిరుచుల ప్రకారం బీటెక్‌ ఫస్టియర్‌ నుంచే ల్యాట్రల్‌ ఎంట్రీలో ప్రవేశాలు పొందవచ్చు.

• సింగపూర్‌కు చెందిన నాన్‌యాంగ్‌ టెక్నాలజీ యూనివర్సిటీతో ట్విన్నింగ్‌ ప్రోగ్రామ్స్‌ నిర్వహణకు ఆర్జీయూకేటీ ఒప్పందం కుదుర్చుకోనున్నది. ఆర్జీయూకేటీలో వారూ ప్రవేశాలు పొందుతారు.
• అమెరికాలో టెక్సాస్‌ యూనివర్సిటీ, యూనివర్సిటీ ఆఫ్‌ పిట్స్‌బర్గ్‌లలోనే ట్విన్నింగ్‌ ప్రోగ్రాంను ఆఫర్‌చేస్తారు. ఇందులో భాగంగా ఆయా వర్సిటీ విద్యార్థులు ఆర్జీయూకేటీలో చేరుతారు.
• ట్విన్నింగ్‌ప్రోగ్రాం నిర్వహణకు కెనడా వర్సిటీలతోనూ సంప్రదిస్తున్నారు.
• పలు థాయ్‌లాండ్‌ వర్సిటీలు ఆర్జీయూకేటీతో పనిచేసేందుకు ముందుకొస్తున్నాయి.

ప్రవేశాల షెడ్యూల్‌ విడుదల
ఆర్జీయూకేటీలో ఆరేండ్ల బీటెక్‌ కోర్సుల్లో ప్రవేశాల షెడ్యూల్‌ను బుధవారం హైదరాబాద్‌లో ఇన్‌చార్జి వీసీ వెంకటరమణ విడుదల చేశారు. జూన్‌ 1న నోటిఫికేషన్‌ ఇచ్చి, జూలైలో తరగతులు ప్రారంభిస్తామని చెప్పారు. మీసేవ కేంద్రాల ద్వారా దరఖాస్తు చేసుకోవచ్చని సూచించారు. పీయూసీ కోర్సుల్లో ఆర్టిఫీషియల్‌ ఇంటెలిజెన్స్‌ (ఏఐ), మెషిన్‌ లెర్నింగ్‌, ఐవోటీ వంటి కొత్త కోర్సులను తీసుకొచ్చేందుకు ఇంటర్మీ డియట్‌ బోర్డుతో చర్చిస్తున్నట్టు వెల్లడించారు. బాలికల హాస్టళ్ల సమీపంలోనే ఐటీ ల్యాబ్‌ను ఏర్పాటు చేస్తున్నామని తెలిపారు. కొత్తగా ఇంటిగ్రేటెడ్‌ మాడ్ర న్‌ కిచెన్‌ నిర్మాణానికి జూన్‌లో టెండర్లు పూర్తిచేస్తామని ఆయన వివరించారు.

ప్రవేశాల షెడ్యూల్‌ వివరాలు

• నోటిఫికేషన్‌ విడుదల 1-6-2023
• ఆన్‌లైన్‌లో దరఖాస్తుల స్వీకరణ 5-6-2023
• దరఖాస్తులకు తుది గడువు 19-6-2023
• స్పెషల్‌ క్యాటగిరీ విద్యార్థులకు
• దరఖాస్తుల గడువు 24-6-2023
• ప్రొవిజినల్‌ సెలెక్షన్‌ లిస్ట్‌ 26-6-2023
• మొదటి విడత కౌన్సిలింగ్‌ 1-7-2023