Visit:
హైదరాబాద్‌ సిటీబ్యూరో, డిసెంబర్‌ 18 (నమస్తే తెలంగాణ): కొత్త సంవత్సరం వేడుకల నిర్వహణకు తెలంగాణ పోలీసులు కొత్త రూల్స్‌ పెట్టారు. న్యూ ఇయర్‌ సెలబ్రేషన్స్‌ నిర్వహించేవారు అనుసరించాల్సిన నియమ నిబంధనలపై నగర పోలీస్‌ కమిషనర్‌ సీవీ ఆనంద్‌ ఆదివారం ఉత్తర్వులు జారీ చేశారు. రాత్రి ఒంటి గంట వరకు వేడుకలు నిర్వహించే 3 స్టార్‌, ఆ పైస్థాయి హోటల్స్‌, క్లబ్స్‌, పబ్స్‌ తప్పనిసరిగా పదిరోజుల ముందు అనుమతి తీసుకోవాలని పేర్కొన్నారు. బయట తగిన సెక్యూరిటీని ఏర్పాటు చేసుకోవడంతోపాటు డ్రగ్స్‌, ఆయుధాలు ఎట్టి పరిస్థితుల్లోను లోపలికి అనుమతించొద్దని ఆదేశించారు. నిబంధనలు అతిక్రమించినవారిపై కఠిన చర్యలు తీసుకొంటామని హెచ్చరించారు. అలాగే, డీజే, మ్యూజిక్‌ సిస్టంలతోపాటు పటాకుల శబ్దాలు 45 డెసిబుల్స్‌కు మించకూడదని స్పష్టంచేశారు. ఎక్సైజ్‌శాఖ అనుమతించిన సమయం తర్వాత మద్యం సరఫరా చేయొద్దని తెలిపారు. నియమ నిబంధనలకు సంబంధించిన డిస్‌ప్లేలను అన్ని చోట్ల ఏర్పాటు చేయాలని సూచించారు. న్యూ ఇయర్‌ రోజు డ్రంక్‌ అండ్‌ డ్రైవ్‌పై ప్రత్యేక దృష్టి ఉంటుందని పేర్కొన్నారు. మద్యం తాగి వాహనం నడుపుతూ చిక్కితే రూ. పదివేల జరిమానా లేదా ఆరు నెలల జైలు శిక్షతోపాటు మూడు నెలలపాటు లేదా దీర్ఘకాలికంగా డ్రైవింగ్‌ లైసెన్స్‌ సస్పెండ్‌ చేస్తామని హెచ్చరిచారు.
