బాసర బాధలు తీర్చిన కేటీఆర్‌

బాసర ట్రిపుల్‌ ఐటీలో సమస్యలు ఒక్కొక్కటిగా పరిష్కారమవుతున్నాయి. విద్యార్థుల డిమాండ్లు యుద్ధ ప్రాతిపాదికన నెరవేరుతున్నాయి.

• మంత్రి చొరవతో తొలగిన బాసర ట్రిపుల్‌ ఐటీ సమస్యలు
• వర్సిటీలో యాంటీ ర్యాగింగ్‌, డిసిప్లిన్‌, మెస్‌ కమిటీల ఏర్పాటు
• విద్యార్థులకు వేడి నీళ్లు, మినీ టీ హబ్‌, మినీ స్టేడియం, సైన్స్‌ ల్యాబ్‌

నిర్మల్‌ (నమస్తే తెలంగాణ)/బాసర, డిసెంబర్‌ 10: బాసర ట్రిపుల్‌ ఐటీలో సమస్యలు ఒక్కొక్కటిగా పరిష్కారమవుతున్నాయి. విద్యార్థుల డిమాండ్లు యుద్ధ ప్రాతిపాదికన నెరవేరుతున్నాయి. ఐటీ, పరిశ్రమలశాఖ మంత్రి కేటీఆర్‌ చొరవతో సకల సౌలత్‌లు విద్యార్థులకు అందుబాటులోకి వస్తున్నాయి. ఈ విద్యాసంవత్సరం ప్రారంభంలో బాసర ట్రిపుల్‌ ఐటీలో సమస్యలపై విద్యార్థులు ఆందోళన నిర్వహించారు. రాష్ట్ర ప్రభుత్వం సమస్యల పరిష్కారానికి చర్యలు చేపట్టింది. ఈ క్రమంలో సెప్టెంబర్‌ 26న బాసర ట్రిపుల్‌ ఐటీని విద్యాశాఖ మంత్రి సబితాఇంద్రారెడ్డితో కలిసి మంత్రి కేటీఆర్‌ సందర్శించారు. విద్యార్థులతో కలిసి భోజనం చేసి సమస్యలను స్వయంగా అడిగి తెలుసుకున్నారు. నాటి నుంచే మంత్రి విద్యార్థుల ఒక్కో సమస్యను పరిష్కరిస్తూ వస్తున్నారు. ఇప్పటికే చాలా సమస్యలను యుద్ధ ప్రాతిపదిన తీర్చారు. ఇంచార్జి వీసీ వెంకరటమణ, డైరెక్టర్‌ ప్రొఫెసర్‌ సతీశ్‌కుమార్‌తో కలిసి మంత్రి ప్రక్షాళన ప్రారంభించారు.

మంత్రి కేటీఆర్‌ చొరవతో తీరిన సమస్యలు ఇవే..

• బాసర ట్రిపుల్‌ఐటీలో బోధన, బోధనేతర సిబ్బందితో సమావేశాలు నిర్వహిస్తూ ఒక్కో సమస్యను పరిష్కరించారు. మెస్‌లలో వార్డెన్లను నియమించారు. విద్యార్థులతో కలిసి రోజు మెస్‌లలో వార్డెన్లు భోజనం చేయాలనే నిబంధన పెట్టారు.
• అన్ని సమస్యలకు ప్రత్యేక కమిటీలను ఏర్పాటు చేశారు. ట్రిపుల్‌ ఐటీలోని ఏడు విభాగాల్లోని హెచ్‌వోడీలను మార్చారు. బడ్జెట్‌లో అవకతవకలు జరుగకుండా ఫైనాన్స్‌ ఆఫీసర్లను నియమించారు.ముగ్గురు మహిళా పీడీలను నియమించారు.
• ఇండస్ట్రీయల్‌ టూర్‌ నిర్వహించి, ప్రముఖ కంపెనీల సీఈవోలతో అవగాహన కార్యక్రమాలు ఏర్పాటు చేశారు. ఎల్వీ ప్రసాద్‌ కంటి దవాఖానతో ఒప్పందం చేసుకొని, పరీక్షలు నిర్వహించి 1200 మందికి కంటి అద్దాలను అందజేశారు.
• మన ఆర్జీయూకేటీ-మన బాధ్యత’ పేరుతో ప్రతినెలా ఒక రోజు క్యాంపస్‌లో శ్రమదానం చేస్తున్నారు. 2022-23 విద్యార్థులకు ఓరియంటేషన్‌ తరగతులు,
  ట్రిపుల్‌ఐటీ గురించి తల్లిదండ్రులకూ అవగాహన కల్పించారు.
• ఏకో పార్కును ఏర్పాటు చేసి పనులు ప్రారంభించారు. ల్యాప్‌టాప్‌ల కోసం టెండర్లు పిలిచారు. ఆడిటోరియంలో 800 ఫిక్స్‌డ్‌ చైర్లను బిగించారు. 24 గంటల లైబ్రరీని విద్యార్థులకు అందుబాటులోకి తెచ్చారు.
•  విద్యార్థుల తల్లిదండ్రులు ఇన్‌చార్జి వీసీని, డైరెక్టర్‌ను నేరుగా కలవడానికి
  వారానికి ఒక రోజు సమయం కేటాయించారు. యాంటీ ర్యాగింగ్‌ కమిటీ, డిసిప్లిన్‌ కమిటీ, మెస్‌ కమిటీలను ఏర్పాటుచేశారు. చీఫ్‌ వార్డెన్లను నియమించారు.
• ఐటీసీసీ సెంటర్‌తోపాటు, 24 డిజిటల్‌ తరగతులు, మినీ టీ హబ్‌, మినీ స్టేడియం, సైన్స్‌ ల్యాబ్‌తోపాటు సోలార్‌ ప్లాంటు ద్వారా విద్యార్థినులకు వేడి నీళ్లు అందించేందుకు ఉగాదికల్లా పనులన్నీ పూర్తి చేయాలని మంత్రి ఆదేశించారు.