Mid Day Meal | కట్టెల పొయ్యిపై వండొద్దు.. బోర్‌ నీళ్లు వాడొద్దు.. అన్ని విద్యాసంస్థలకు కామన్‌ మెనూ

ప్రభుత్వ వసతి గృహాలు, గురుకులాల్లో ఫుడ్‌ పాయిజన్‌ ఘటనలు, విద్యార్థుల అస్వస్థత, మరణాలపై అధ్యయనం చేసిన తెలంగాణ విద్యా కమిషన్‌ ప్రభుత్వానికి నివేదిక సమర్పించింది.

• ఇంటర్‌ విద్యార్థులకూ మధ్యాహ్న భోజనం అమలు
• మెస్‌ చార్జీలు మరో 2 రూపాయల పెంపు
• సీఎస్‌కు విద్యాకమిషన్‌ నివేదిక

Mid Day Meal | హైదరాబాద్‌, జనవరి 27 (నమస్తే తెలంగాణ): ప్రభుత్వ వసతి గృహాలు, గురుకులాల్లో ఫుడ్‌ పాయిజన్‌ ఘటనలు, విద్యార్థుల అస్వస్థత, మరణాలపై అధ్యయనం చేసిన తెలంగాణ విద్యా కమిషన్‌ ప్రభుత్వానికి నివేదిక సమర్పించింది. క్షేత్రస్థాయిలో పరిస్థితులను పరిశీలించి, పరిష్కార మార్గాలను సూచించింది. మధ్యాహ్న భోజన పథకం మరియు ప్రభుత్వ విద్యాసంస్థల్లో ఆహార నాణ్యత, భద్రతపై సిఫారసులు శీర్షికతో 50 పేజీల నివేదికకు సీఎస్‌కు అందించింది.

విద్యాకమిషన్‌ నివేదికలో సిఫారసులు

• గ్యాస్‌ పొయ్యి మీదే వంట చేయాలి, భోజనం కట్టెల పొయ్యిపై వండొద్దు.
• వంటకు, తాగేందుకు బోర్‌ నీళ్లు వాడొద్దు, మిషన్‌ భగీరథ నీళ్లను ఉపయోగించాలి.
• అంగన్‌వాడీల నుంచి గురుకులాల వరకు అన్ని విద్యాసంస్థలకు కామన్‌ మెనూ అమలు చేయాలి.
• ఇంటర్మీడియట్‌ విద్యార్థులకు కూడా మధ్యాహ్న భోజనం పెట్టాలి.
• సన్నబియ్యం, పరిశుభ్రమైన కూరగాయలు, పండ్లు, గుడ్లు, చికెన్‌, మటన్‌ వంటి పోషకాహారం అందించాలి.
• తెలంగాణ విద్యాసంక్షేమం, మౌలికసదుపాయాల అభివృద్ధి సంస్థ ద్వారా సరకులు సరఫరా చేయాలి.
• సెంట్రలైజ్డ్‌ టెండర్ల ద్వారా సరుకులు, సామగ్రి సమకూర్చుకోవాలి.
• అన్ని క్యాటగిరీల వారికి మెస్‌ చార్జీలను రూ.2 చొప్పున పెంచాలి.
• 1-5 తరగతులు, 6-8 తరగతులు, 9, 10 తరగతుల్లోని విద్యార్థులకు వేర్వేరు పరిమాణంలో భోజనం అందించాలి.
• గురుకులాల్లోని విద్యార్థులకు సాయంత్రం స్నాక్స్‌ అందిస్తున్నట్టుగానే పాఠశాల విద్యార్థులకు కూడా స్నాక్స్‌ సమకూర్చాలి.
• మధ్యాహ్న భోజన పథకంలో వర్కర్లు, వంటవాళ్లు, సహాయకుల వేతనం, పారితోషికం పెంచాలి.
• విశాలమైన డైనింగ్‌ హాల్‌, ఫర్నీచర్‌ను అందుబాటులో ఉంచాలి.
• ఆహారం, నీటి నమూనాలను నేషనల్‌ ఇన్‌స్టిట్యూట్‌ ఆఫ్‌ న్యూట్రిషన్‌(ఎన్‌ఐఎన్‌)తో తరుచూగా పరీక్షలు చేయించాలి.
• వంటగది, మరుగుదొడ్లు, భోజనశాలను ఎప్పటికిప్పుడు పరిశుభ్రంగా ఉంచాలి.
• విద్యాసంస్థలన్నింటికీ ప్రహారీ గోడలు నిర్మించాలి, పాములు, విషపురుగులు తిరగకుండా జాగ్రత్తలు తీసుకోవాలి.