Visit:
Cyclone Montha | హైదరాబాద్‌, అక్టోబర్‌ 28 (నమస్తే తెలంగాణ): తీవ్ర రూపం దాల్చిన మొంథా తుపాన్‌ గంటకు 15 కి.మీ వేగంతో కదులుతూ.. కాకినాడ-మచిలీపట్నం మధ్య అంతర్వేదిపాలెం వద్ద తీరాన్ని దాటిందని వాతావరణ శాఖ ఒక ప్రకటనలో తెలిపింది. తీరం దాటే సమయంలో గంటకు 90 నుంచి 110 కి.మీ వేగంతో ఈదురుగాలులు వీచాయని వెల్లడించింది. అలాగే పెద్దఎత్తున అలలు ఎగిసిపడగా, పలు జిల్లా భారీ వర్షాలు కురిసినట్టు వెల్లడించింది. మొంథా తుపాన్‌ కారణంగా బంగాళాఖాతం పరిసరాలు అల్లోకల్లోలంగా మారాయని తెలిపింది. ప్రస్తుతం మొంథా తుపాన్‌ ఉత్తర-వాయవ్య దిశగా కదులుతున్నదని వివరించింది.
రాష్ట్రంలోని పలు జిల్లాలతోపాటు హైదరాబాద్‌ నగరంలోనూ ఉరుములతో కూడిన భారీ వర్షాలు కురుస్తున్నట్టు తెలిపింది. ఈ నేపథ్యంలో కొన్ని జిల్లాలకు రెడ్‌ అలర్ట్‌ జారీ చేసినట్టు పేర్కొన్నది. వచ్చే రెండ్రోజులూ కూడా భారీ నుంచి అతిభారీ వర్షాలు కురిసే అవకాశం ఉన్నదని హెచ్చరించింది. రంగారెడ్డి, వికారాబాద్‌, సంగారెడ్డి, మెదక్‌, నాగర్‌కర్నూల్‌, నల్లగొండ, మహబూబ్‌నగర్‌, సూర్యాపేట, ఖమ్మం, భద్రాద్రి-కొత్తగూడెంలో భారీ నుంచి అతి భారీ వర్షాలు కురిసే అవకాశం ఉన్నదని తెలిపింది.
మొంథా తుపాన్‌ కారణంగా ములుగు, భదాద్రి-కొత్తగూడెం, ఖమ్మం జిల్లాల్లో భారీ నుంచి అతి భారీ వర్షాలు కురిసే అవకాశం ఉండటంతో రెడ్‌ అలర్ట్‌ ప్రకటించినట్టు తెలిపింది. మంచిర్యాల, పెద్దపల్లి, జయశంకర్‌-భూపాలపల్లి, హనుమకొండ, వరంగల్‌, మహబూబాబాద్‌, నల్లగొండ, సూర్యాపేట జిల్లాలకు ఆరెంజ్‌ అలర్ట్‌ జారీచేసినట్టు వివరించింది. కుమ్రంభీం -జగిత్యాల, కరీంనగర్‌, సిద్దిపేట, యాదాద్రి-భువనగిరి, నాగర్‌కర్నూల్‌ జిల్లాలకు ఎల్లో అలర్ట్‌ చేసినట్టు వెల్లడించింది. బుధవారం ఆదిలాబాద్‌, నిర్మల్‌, జగిత్యాల, మంచిర్యాల, పెద్దపల్లి, కరీంనగర్‌, జయశంకర్‌-భూపాలపల్లి, ములుగు, వరంగ ల్‌, మహబూబాబాద్‌, భదాద్రి-కొత్తగూడెం, ఖమ్మం తదితర జిల్లాల్లో మోస్తరు నుంచి భారీ వర్షాలు కురిసే అవకాశం ఉన్నట్టు పేర్కొన్నది.
మొంథా తుపాన్‌ కాకినాడ తీరం దాటిన నేపథ్యంలో కాకినాడ పోర్టుకు 10వ నంబర్‌ ప్రమాదస్థాయి హెచ్చరిక జారీ అయినట్టు తెలిపింది. అలాగే విశాఖపట్నం, గంగవరం, భీమునిపట్నం, కళింగపట్నం పోర్టులకు 9వ నంబర్‌ ప్రమాద హెచ్చరిక జారీ చేసినట్టు వెల్లడించింది. మచిలీపట్నం, నిజాంపట్నం, కృష్ణపట్నం ఓడరేవులకు 8వ నంబర్‌ హెచ్చరిక అమల్లోకి వచ్చినట్టు వివరించింది. తుపాన్‌ కారణంగా మత్స్యకారులు వేట కోసం సముద్రంలోకి వెళ్లవద్దని హెచ్చరించినట్టు పేర్కొన్నది.
ఏపీలో మొంథా తుపాన్‌ భీభత్సాన్ని సృష్టిస్తున్నది. రాష్ట్రవ్యాప్తంగా 403 మండలాలపై ఈ తుపాన్‌ ప్రభావం చూపనున్నట్టు వాతావారణ శాఖ స్పష్టం చేసింది. అత్యవసర పరిస్థితి ఎదుర్కొనేలా 488 కంట్రోల్‌ రూమ్‌లను ప్రభుత్వం ఏర్పాటు చేసినట్టు తెలిపింది. మొత్తం 1204 పునరావాసర కేంద్రాలను ఏర్పాటు చేసి.. 75,802 మందిని కేంద్రాలకు తరలించినట్టు వెల్లడించింది. 219కి పైగా మెడికల్‌ క్యాంపులను ప్రభుత్వం ఏర్పాటు చేసినట్టు వెల్లడించింది. ఏపీ వ్యాప్తంగా 38వేల హెక్టార్లలో భారీగా పంట నష్టం జరిగినట్టు అధికారులు ప్రాథమిక అంచనా వేశారు. 1.38 లక్షల హెక్టార్ల ఉద్యాన పంటలు సైతం దెబ్బతిన్నట్టు పేర్కొన్నారు.
పలు చోట్ల ఇండ్లు దెబ్బతినగా, చెట్లు, విద్యుత్‌ స్తంభాలు కూలిపడటంతో ఆస్తినష్టం జరిగినట్టు తెలిపారు. కోనసీమ జిల్లా మామిడికుదురు మండలం మాకనపాలెంలో చెట్టు కూలి వీరవేణి అనే మహిళ మృతి చెందినట్టు వెల్లడించారు. నదులు, చెరువులు ఉప్పొంగి ప్రవహిస్తున్నట్టు వివరించారు. పలు ప్రాం తాల్లో గ్రామాల్లోకి భారీగా వరదనీరు చేరడంతో రాకపోకలకు తీవ్ర అంతరాయం ఏర్పడించిందని పేర్కొన్నారు. జోరువానలకు అరుకులోయ-విశాఖపట్నం ఘాట్‌ రోడ్డులో భారీగా వరద ప్రవహిస్తున్నట్టు తెలిపారు. తు పాను ప్రభావంతో బస్టాండ్‌లు, రైల్వే స్టేషన్లు ప్రయాణికులు లేక వెలవెలబోయాయి.
మొంథా తుపాన్‌ ప్రభావం కారణంగా శంషాబాద్‌ ఎయిర్‌పోర్టు నుంచి విజయవాడ, విశాఖపట్నం, రాజమండ్రి వెళ్లాల్సిన విమానాలను రద్దు చేసినట్టు జీఎంఆర్‌ ఎయిర్‌పోర్టు అధికారులు మంగళవారం ఒక ప్రకటనలో తెలిపారు. మొంథా తుపాన్‌ వల్ల వాతావావరణం అనుకూలించకపోవడంతో విమానాలను రద్దు చేశామని వెల్లడించారు. ఆంధ్రప్రదేశ్‌లో ఎడతెరిపి లేకుండా భారీ నుంచి అతీభారీ వర్షాలు కురుస్తున్న నేపథ్యంలో మొత్తం 35 విమాన సర్వీస్సులను రద్దు చేసినట్టు పేర్కొన్నారు.
