చెరువులో మీటర్‌ అడిగినా ఇస్తం!

రంగారెడ్డి జిల్లా బాలాపూర్‌ మండలం జిల్లెలగూడలోని చందన చెరువు శిఖం, కుర్మల్‌గూడలోని సర్వేనంబర్‌ 46 ప్రభుత్వ భూమి సహా పలుచోట్ల కబ్జాలపై ‘నమస్తే తెలంగాణ’ కథనాలకు ప్రభుత్వ యంత్రాంగం కదిలొచ్చింది.

• కబ్జాలపై ఓ విద్యుత్తు శాఖ అధికారి నిర్లక్ష్య సమాధానం
• అవాక్కయిన రెవెన్యూ, పోలీసు, మున్సిపల్‌ అధికారులు
• చెరువులు, ప్రభుత్వ భూముల ఆక్రమణలపై సీరియస్‌
• నమస్తే ఎఫెక్ట్‌.. కలెక్టర్‌ ఆదేశంతో అధికారుల సమావేశం

హైదరాబాద్‌ సిటీబ్యూరో ప్రధాన ప్రతినిధి, జనవరి 29 (నమస్తే తెలంగాణ): రంగారెడ్డి జిల్లా బాలాపూర్‌ మండలం జిల్లెలగూడలోని చందన చెరువు శిఖం, కుర్మల్‌గూడలోని సర్వేనంబర్‌ 46 ప్రభుత్వ భూమి సహా పలుచోట్ల కబ్జాలపై ‘నమస్తే తెలంగాణ’ కథనాలకు ప్రభుత్వ యంత్రాంగం కదిలొచ్చింది. రంగారెడ్డి కలెక్టర్‌ శశాంక ఆదేశాలతో సోమవారం మహేశ్వరం డీసీపీ సునీతారెడ్డి కార్యాలయంలో రెవెన్యూ, మున్సిపల్‌, ఇరిగేషన్‌ శాఖల అధికారులు సమావేశమయ్యారు. ఈ సందర్భంగా కబ్జాలకు తొలి అడుగుగా అక్రమార్కులు కరెంటు మీటర్‌ తీసుకుంటున్నారనే చర్చ వచ్చింది. దీంతో సమావేశంలోనే విద్యుత్తుశాఖ అధికారికి ఓ రెవెన్యూ అధికారి ఫోన్‌ చేయగా పైవిధంగా నిర్లక్ష్యపు సమాధానం వచ్చినట్టు విశ్వసనీయంగా తెలిసింది. ఈ సంభాషణను ఫోన్‌లో స్పీకర్‌ పెట్టి అందరూ విని అవాక్కయినట్టు సమాచారం.

అదేవిధంగా మున్సిపల్‌శాఖ నుంచి అక్రమార్కులకు ఇంటి నంబర్ల రూపంలో సహకారం అందుతున్నదనే చర్చ కూడా జరిగింది. ఈ నేపథ్యంలో ఈ వివరాలన్నింటినీ జిల్లా కలెక్టర్‌కు వి వరించి, కబ్జాల తొలగింపునకు కార్యాచరణ ఎలా అమలు చేయాలనే దానిపై తుది నిర్ణయం తీసుకోవాలని సమావేశంలో నిర్ణయించినట్టు తెలిసింది. కలెక్టర్‌ ఆదేశాలతో అక్రమార్కులు, వారికి సహకరించిన అధికారులపైనా చర్యలు తీసుకోవాలని భావిస్తున్నారు. పోలీస్‌ బలగాల సహకారంతోనే ఆక్రమణల తొలగింపు సాధ్యం అవుతుందని రెవెన్యూ అధికారులు నిర్ణయించారు. సమావేశంలో ఏసీపీ శ్రీనివాస్‌యాదవ్‌, కందుకూరు ఆర్డీవో సూరజ్‌కుమార్‌, బాలాపూర్‌ తహసీల్దార్‌ మాధవీరెడ్డి, బడంగ్‌పేట, జల్‌పల్లి మున్సిపల్‌ కార్పొరేషన్‌ కమిషనర్లు సుమన్‌రావు, వసంత, నీటిపారుదల శాఖ ఇంజినీర్లు పాల్గొన్నారు.

• రెవెన్యూ అధికారి: హలో.. మీ విద్యుత్తుశాఖ వాళ్లు ఇష్టమొచ్చినట్టు కరెంటు మీటర్లు ఇస్తున్నరు. అందుకే ప్రభుత్వ భూముల్లో ఇండ్లు కడుతున్నరు. అలా ఎలా మీటర్లు ఇస్తారు?
• విద్యుత్తు శాఖ అధికారి: అవును ఇస్తాం. మరి మీరేం చేస్తున్నారు?
• రెవెన్యూ అధికారి: చెరువులో అడిగినా ఇస్తారా?
• విద్యుత్తు శాఖ అధికారి: ఇస్తం. చెరువులో కరెంటు మీటర్‌ అడిగినా ఇస్తాం. ఇండ్లు కట్టుకుంటే మీరు కూలగొట్టండి(ఇదీ! రంగారెడ్డి జిల్లా బాలాపూర్‌ మండలంలోని చెరువులు, ప్రభుత్వ భూముల ఆక్రమణలపై సమావేశంలో పలు శాఖల అధికారులను అవాక్కయ్యేలా చేసిన సంభాషణ)