Home Guards | పోరాటానికి హోంగార్డులు సై.. నవంబర్‌ 2న ఇందిరాపార్క్‌ దగ్గర భారీ ధర్నా?

సమస్యల పరిష్కారం కోసం హోంగార్డులు కూడా ఆందోళనలకు సిద్ధమవుతున్నారు. నవంబర్‌ 2న తమ డిమాండ్ల సాధనకు హైదరాబాద్‌లోని ఇందిరాపార్క్‌ వద్ద శాంతియుతంగా నిరసనకు సన్నద్ధమవుతున్నారు.

• తమను ప్రభుత్వం పట్టించుకోవడంలేదని ఆవేదన

Home Guards | హైదరాబాద్‌, అక్టోబర్‌ 27 (నమస్తే తెలంగాణ): సమస్యల పరిష్కారం కోసం హోంగార్డులు కూడా ఆందోళనలకు సిద్ధమవుతున్నారు. నవంబర్‌ 2న తమ డిమాండ్ల సాధనకు హైదరాబాద్‌లోని ఇందిరాపార్క్‌ వద్ద శాంతియుతంగా నిరసనకు సన్నద్ధమవుతున్నారు. తమకు అడిషనల్‌ డీజీ ర్యాంకు అధికారి ఉన్నా తమ సంక్షేమం గురించి, జీతభత్యాల గురించి పట్టించుకోవడంలేదని ఆవేదన వ్యక్తంచేశారు. ప్రతిపక్షంలో హోంగార్డులను ఊరించిన కాంగ్రెస్‌ నేతలు.. అధికారంలోకి వచ్చాక వినతిపత్రాలు తీసుకునేందుకూ ముఖం చాటేస్తున్నారని ఆరోపించారు. ఇతర ఉద్యోగ సంఘాలతో పాటు హోంగార్డులను కూడా ముఖ్యమంత్రి రేవంత్‌రెడ్డి చర్చలకు పిలిచి సమస్యలు పరిష్కరించాలని కోరుతున్నారు.

ఇవే ప్రధాన డిమాండ్లు

• పెండింగ్‌ యూనిఫాం అలవెన్స్‌ను వెంటనే ఇవ్వాలి.
• ఆర్డర్లీ వ్యవస్థను తొలగించాలి. కారుణ్య నియామకాలు చేపట్టాలి. సాధారణ మరణానికి రూ.5 లక్షలు పరిహారం ఇవ్వాలి.
• పదవీవిరమణ తర్వాత ప్రభుత్వం నుంచి ఆర్థిక వెసులుబాటు కల్పించాలి.
• 2017లో తీసుకొచ్చిన ఎస్పీఏను అమలు చేయాలి.
• ఆర్డర్‌ టు సర్వ్‌ ద్వారా ఐపీఎస్‌లు ఎక్కడికంటే అక్కడికి హోంగార్డులను తీసుకెళ్తున్నారు. అదే ఆర్డర్‌ టు సర్వ్‌ ద్వారా ఎవరైనా హోంగార్డులు సొంత జిల్లాలకు వెళ్తామంటే ఒప్పుకోవడం లేదు. దీనిని వెంటనే మార్చాలి.
• చాలీచాలని జీతానికి తోడు వైద్య ఖర్చులు భారంగా ఉన్నాయి. కావున హోంగార్డులకు హెల్త్‌కార్డులు ఇవ్వాలి.
• హోంగార్డు కార్యాలయాల్లో ఆర్‌ఐ స్థాయి నుంచి హెడ్‌కానిస్టేబుల్‌ స్థాయి వరకూ హోంగార్డులను చాలా ఇబ్బందులు పెడుతున్నారు. వారు చెప్పిన అధికారుల ఇండ్లలోకి వెళ్లి పనులు చేయకపోతే.. డ్యూటీలు లేవని బెదిరిస్తున్నారు. ఆ వేధింపులను వెంటనే ఉన్నతాధికారులు ఆపాలి.