చెక్డ్యాంపై చేతులెత్తేసిన సర్కార్!
ఏదైనా ప్రాజెక్టు కూలిపోయినా.. కూల్చివేతకు గురైనా ప్రభుత్వం వెంటనే స్పందించాలి. అందుకు కారణాలను అన్వేషించాలి. ఒకవేళ విచారణ ఆలస్యమైతే రైతులు నష్టపోకుండా పునరుద్ధరణ లేదా పునర్నిర్మాణంపై దృష్టి సారించాలి. కానీ, కాంగ్రెస్ ప్రభుత్వం మాత్రం అందుకు భిన్నం గా వ్యవహరిస్తున్నది.
- నిరుడు తనుగుల చెక్డ్యాం పేల్చివేత
- వృథాగా పోయిన నీరు.. ఎడారిగా మానేరు
- పునరుద్ధరణ పనులు పట్టని ప్రభుత్వం
- సర్కార్పై నమ్మకం కోల్పోయిన రైతులు
- ధ్వంసమైన చెక్డ్యాంకు స్వచ్ఛందంగా మరమ్మతులు చేయించాలని నిర్ణయం
- ఎకరానికి రూ 3వేలు చొప్పున 10లక్షల వరకు సేకరించేందుకు ప్రణాళిక
- నాలుగు రోజులుగా ఎక్స్కవేటర్తో పనులు
జమ్మికుంట/ ఓదెల, నవంబర్ 20: ఏదైనా ప్రాజెక్టు కూలిపోయినా.. కూల్చివేతకు గురైనా ప్రభుత్వం వెంటనే స్పందించాలి. అందుకు కారణాలను అన్వేషించాలి. ఒకవేళ విచారణ ఆలస్యమైతే రైతులు నష్టపోకుండా పునరుద్ధరణ లేదా పునర్నిర్మాణంపై దృష్టి సారించాలి. కానీ, కాంగ్రెస్ ప్రభుత్వం మాత్రం అందుకు భిన్నం గా వ్యవహరిస్తున్నది. కరీంనగర్-పెద్దపల్లి జిలా ్లల సరిహద్దులో మానేరుపై నిర్మించిన చెక్డ్యాం కూల్చివేతకు గురై ఏడాది అవుతున్నా.. కనీస స్పందన కరువైంది. ఏడాదిగా నీరంతా వృథాగా పోయి మానేరు ఎడారిగా మారినా పట్టించుకోకుండా నిర్లక్ష్యం చేస్తున్నది. ఫలితంగా ప్రభుత్వంపై నమ్మకం కోల్పోయిన రైతులు సొంతంగా మరమ్మతులు చేసుకుంటే.. సహకరించాల్సింది పోయి అడ్డుకోవడంపై తీవ్ర ఆగ్రహం వ్యక్తమవుతున్నది.
ఏడాదిగా నిర్లక్ష్యమే
మానేరుపై ప్రతి నీటి బొట్టును ఒడిసి పట్టి, పరీవాహక ప్రాంత రైతులకు అందించాలన్న లక్ష్యంతో నాడు కేసీఆర్ సర్కారు రూ. 256 కోట్లతో 16 చెక్ డ్యాంలను నిర్మించింది. కరీంనగర్ జిల్లా జమ్మికుంట మండలం తనుగుల, పెద్దపల్లి జిల్లా ఓదెల మండలం గుంపుల సరిహద్దులోని మానేరుపై రూ.19 కోట్లతో నిర్మించిన చెక్డ్యాంను నిరుడు నవంబర్ 21న దుండగులు పేల్చివేశారు. ఇది విధ్వంసకారుల పనేనంటూ ఇరిగేషన్ అధికారులు స్పష్టం చేశారు. లీకేజీలు, ఇతర కారణాలవల్ల కూలిపోలేదని, కచ్చితంగా కూల్చడం లేదా పేల్చడం జరిగిందని పేర్కొంటూ జమ్మికుంట ఠాణాలోనూ సదరు అధికారులు ఫిర్యాదు చేశారు. ఈ నేపథ్యంలో కరీంనగర్ జిల్లా అధికారులతోపాటు హైదరాబాద్ నుంచి వచ్చిన ప్రత్యేక ఫోరెన్సిక్ విభాగం అధికారులు క్షేత్రస్థాయిలో పరిశీలించారు. పలు రకాల షాంపిల్స్ సేకరించారు. ఫోరెన్సిక్ విభాగం రిపోర్ట్ వచ్చిన తర్వాత పూర్తి వివరాలు చెబుతామని వెల్లడించినా నేటి వరకు తేల్చలేదు. కూల్చివేత వెనుక కాంగ్రెస్ పార్టీకి చెందిన కొంతమంది ఇసుక మాఫియా హస్తం ఉన్నదనే ఆరోపణలు వెల్లువెత్తాయి. చెక్డ్యాం కూలిం దా..? కూల్చివేశారా..? అన్న విషయాలు పక్కనబెడితే.. పునరుద్ధరించాల్సిన సర్కార్ చేతులెత్తేయడం తీవ్ర విమర్శలకు దారితీస్తున్నది.
సొంత ఖర్చులతో పనులు
చెక్ డ్యాం కూల్చివేతకు గురై ఏడాది గడుస్తున్నా పునరుద్ధరణ కరువైంది. కూల్చివేతతో నీరంతా వృథాగా పోయి మానేరు ఎడారిగా మారింది. మరోవైపు మూలిగే నక్కపై తాటిపండు పడ్డ చందంగా కాంగ్రెస్ తెచ్చిన కరువు ప్రభావం తాగు, సాగు నీటిపై పడింది. శంభునిపల్లి, గుంపుల, తనుగుల, గండ్రపల్లె, ఇందుర్తి గ్రామాల పరిధిలోని వ్యవసాయ బావులు, బోర్లు పూర్తిగా ఎండిపోయాయి. వందలాది ఎకరాల ఆయకట్టు భూములు ప్రశ్నార్థకంగా మారాయి. దీంతో పరీవాహక ప్రాంత ప్రజలు మరమ్మతులు చేసేందుకు పూనుకున్నారు. గుంపుల బ్రిడ్జి నుంచి వావిలాల గ్రామ శివారులోని సాగు భూములున్న అన్నదాతలు ఒకరానికి రూ.2వేల నుంచి రూ.3వేల నగదును జమ చేసుకోవాలని నిర్ణయం తీసుకున్నారు. అనుకున్నదే తడవుగా పలువురు ముందుకొచ్చారు. రూ.10లక్షల వరకు జమ చేయాలని లక్ష్యంగా పెట్టుకున్నారు. ఇప్పటికే రూ.2లక్షలకు పైగా నిధులు సమకూర్చుకొని, ఐదు రోజుల క్రితమే పనులు ప్రారంభించారు. రైతులకు సహకరించాల్సింది పోయి ఇరిగేషన్ అధికారులు ఫోన్లు చేసి పనులు ఆపాలంటూ అడ్డుకుంటున్నారని అన్నదాతలు ఆగ్ర హిస్తున్నారు. చెక్ డ్యాంను మరమ్మతులు చేయకపోవడమే కాకుండా.. తాము చేస్తుంటే అడ్డుకునే ప్రయత్నాలు చేస్తున్నారని, ఎవరైనా అధికారులు ఇక్కడికి వచ్చి అడ్డుకుంటే వారిని ఇక్కడే కట్టేస్తామని హెచ్చరిస్తున్నారు.
కలిసికట్టుగా కదిలినం
మేమంతా కలిసికట్టుగా కదిలినం. తాగు, సాగు నీటి ఇబ్బందులపై నెల రోజల నుంచి మాట్లాడుకున్నం. శంభునిపల్లి, పరిమలకాలనీలో చర్చలు పెట్టుకున్నం.మానేరు చుట్టూ ఉన్న వాళ్లం ఎకరానికి రూ.3వేలు వేసుకోవాలనుకున్నం. రూ. 10లక్షలు జమైతయనుకున్నం. అందరం కలిసి వారం నుంచి పనులు చేసుకుంటున్నం. రెండు ఎక్స్కవేటర్లు, రెండు ట్రాక్టర్లతో పనులు సాగుతున్నయ్.
నైనారి రమేశ్, రైతు, పరిమళకాలనీ
(జమ్మికుంట మండలం)
కష్ట పడ్తున్నం
మానేరు గుంపుల బ్రిడ్జి నుంచి వావిలాల శివారు రైతులంతా కలిసినం. ధ్వంసమైన చెక్డ్యాంపై మీటింగ్ పెట్టుకున్నం. 300 ఎకరాలున్న రైతులం పైసలు జమ చేసుకునేందుకు సిద్ధమైనం. ఇప్పటికే కొన్ని జమకాగా పనులు నడుస్తున్నయ్. రెండు రోజుల నుంచి మీది నుంచి వస్తున్న నీటి ధారకు ఇసుకతో అడ్డుకట్ట వేసినం. నీరు ఆగుతుండటంతో సంబురమైతంది. వారంలో పనులు పూర్తి చేసుకుంటం. ఖర్చు ఎక్కువైనా పర్లేదు మేమే వేసుకుంటం. నీరు ఆగేలా చేసుకుంటం.
మాదిరెడ్డి వెంకట్రెడ్డి, రైతు,
శంభునిపల్లి (జమ్మికుంట మండలం)
Read Today's Latest Telangana News in Telugu and Telugu News
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

