Airport Leopard | ఎట్టకేలకు బోనులో చిక్కిన చిరుత..

శంషాబాద్‌ ఎయిర్‌పోర్టులో ఎట్టకేలకు చిరుతపులి (Airport Leopard) బోనులో చిక్కింది. చిరుతను పట్టుకోవడానికి అటవీ అధికారులు ఐదురోజుల పాటు శ్రమించాల్సి వచ్చింది.

శంషాబాద్‌: శంషాబాద్‌ ఎయిర్‌పోర్టులో ఎట్టకేలకు చిరుతపులి (Airport Leopard) బోనులో చిక్కింది. చిరుతను పట్టుకోవడానికి అటవీ అధికారులు ఐదురోజుల పాటు శ్రమించాల్సి వచ్చింది. పులికోసం ఐదు బోన్లు, 20 సీసీ కెమెరాలను ఏర్పాటు చేశారు. బోనుల్లో మేకలను ఉంచినప్పటికీ అది చిక్కలేదు. పలుమార్లు బోను దగ్గరి వరకు వెచ్చిన చిరుత మళ్లీ వెనక్కి వెళ్లిపోయిన విషయం తెలిసిందే. అయితే శుక్రవారం తెల్లవారుజామున 2 గంటల సమయంలో అది బోనులో చిక్కడంతో అంతా ఊపిరిపీల్చుకున్నారు. పులిని నెహ్రూ జూపార్క్‌కు తరలించనున్నారు. అనంతరం వైద్య పరీక్షలు నిర్వహించి అమ్రాబాద్‌ అడవుల్లో వదిలివేయనున్నామని అధికారులు చెప్పారు.

గత ఆదివారం తెల్లవారుజామున (ఏప్రిల్‌ 28) గొల్లపల్లి నుంచి ప్రహరీగోడ దూకి చిరుత శంషాబాద్‌ విమానాశ్రయం లోపలికి వచ్చింది. ప్రహరీ దూకుతుండగా ఎలక్ట్రిక్‌ ఫెన్సింగ్‌ వైర్లకు అది తగలడంతో ఎయిర్‌పోర్ట్‌ కంట్రోల్‌ రూమ్‌లో అలారం మోగింది. దీంతో అప్రమత్తమైన విమానశ్రయ సిబ్బంది అటవీ శాఖ అధికారులకు సమాచారం అందించారు. చిరుత కోసం గాలింపు చేపట్టిన అధికారు ట్రాప్‌లు, బోన్లను ఏర్పాటు చేసిన విషయం తెలిసిందే.