Last Man In Tower | మనసును కదిలించే భావోద్వేగాల ప్రయాణం.. ఓటీటీలోకి మనోజ్ బాజ్‌పాయ్ ‘లాస్ట్ మ్యాన్ ఇన్ టవర్’

Manoj Bajpayee | మారుతున్న ఆధునిక నగరాలు, వేగవంతమైన పట్టణీకరణ నేపథ్యంలో మానవ సంబంధాల సంక్లిష్టతలను, జ్ఞాపకాలకు ఇచ్చే విలువను అత్యంత సహజంగా ఆవిష్కరిస్తూ తెరకెక్కిన అద్భుతమైన భావోద్వేగ చిత్రమే ‘లాస్ట్ మ్యాన్ ఇన్ టవర్’.

Manoj Bajpayee | మారుతున్న ఆధునిక నగరాలు, వేగవంతమైన పట్టణీకరణ నేపథ్యంలో మానవ సంబంధాల సంక్లిష్టతలను, జ్ఞాపకాలకు ఇచ్చే విలువను అత్యంత సహజంగా ఆవిష్కరిస్తూ తెరకెక్కిన అద్భుతమైన భావోద్వేగ చిత్రమే ‘లాస్ట్ మ్యాన్ ఇన్ టవర్’. ప్రఖ్యాత నటులు మనోజ్ బాజ్‌పాయ్, బోమన్ ఇరానీ, దివ్య దత్తా ప్రధాన పాత్రల్లో నటించిన ఈ విభిన్నమైన చిత్రం ప్రముఖ ఓటీటీ వేదిక జీ5లో నవంబర్ 6 నుంచి ప్రేక్షకుల ముందుకు రానుంది. ప్రముఖ రచయిత అరవింద్ అడిగా రాసిన ఇదే పేరుతో ఉన్న ప్రసిద్ధ నవల ఆధారంగా తెరకెక్కిన ఈ చిత్రానికి బెన్ రేఖి దర్శకత్వం వహించగా, టాలీవుడ్ ప్రముఖ నిర్మాత రానా దగ్గుబాటి నిర్మాణ సంస్థ స్పిరిట్ మీడియా అత్యంత ప్రతిష్టాత్మకంగా నిర్మించింది. ఈ చిత్రానికి సూనీ తారాపోరేవాలా స్క్రిప్ట్ అందించడం విశేషం.

ముంబై నగరంలోని ఓ పాత హౌసింగ్ సొసైటీ రీడెవలప్‌మెంట్ నేపథ్యంలో సాగే ఈ కథ, ఒక వ్యక్తి తన ఇంటి కోసం, గతంతో ఉన్న అనుబంధం కోసం చేసే ఒంటరి పోరాటం చుట్టూ తిరుగుతుంది. ముంబైలోని పిరమిడ్ హౌసింగ్ సొసైటీలో యోగేశ్ మిశ్రా అనే రిటైర్డ్ ఫిజిక్స్ టీచర్‌గా మనోజ్ బాజ్‌పాయ్ కనిపించనున్నారు. ఆ భవనాన్ని పునర్నిర్మించేందుకు (రీడెవలప్‌మెంట్) డెవలపర్ ధర్మేన్ షా పాత్రలో బోమన్ ఇరానీ భారీ మొత్తంలో డబ్బును ఆఫర్ చేసినప్పటికీ, తనకు ఎంతో ఇష్టమైన ఇంటిని, అక్కడి మనుషుల మధ్య ఉన్న ఆత్మీయతను వదులుకోవడానికి యోగేశ్ మిశ్రా అంగీకరించడు. ఈ ఒప్పందం వల్ల తమకు మెరుగైన భవిష్యత్తు ఉంటుందని భావించే ఆ అపార్ట్‌మెంట్‌లోని మిగతా వారంతా ఈ రీడెవలప్‌మెంట్‌కు సంసిద్ధులవుతారు. కానీ, యోగేశ్ మాత్రం ఇందుకు ఒప్పుకోకపోవడంతో సొసైటీలో తీవ్రమైన వివాదం రాజుకుంటుంది.

ఈ సంఘర్షణలో తన కుమారుడికి మంచి భవిష్యత్తును అందించాలని తపించే గృహిణి సంగీత పురి పాత్రలో దివ్య దత్తా నటించగా, ఆమె ఆశయమే యోగేశ్‌కు వ్యతిరేకంగా నిలబడేలా చేస్తుంది. ఒకప్పుడు ఎంతో సన్నిహితంగా ఉన్న స్నేహితులే, తమ ఆశలకు అడ్డుపడుతున్నాడని భావించి యోగేశ్‌ను దూరం పెట్టడం, సమాజంలో ఒక వ్యక్తి నమ్మకాలు అందరి ఆశయాలకు ఎదురునిలిచినప్పుడు ఎదురయ్యే ఒంటరితనాన్ని ఈ చిత్రంలో అత్యంత శక్తివంతంగా చూపించారు. ఈ సందర్భంగా దర్శకుడు బెన్ రేఖి మాట్లాడుతూ.. కష్టకాలంలో కుటుంబంతో, సమాజంతో మనకున్న అనుబంధాన్ని ఎలా కాపాడుకోవాలనే అంశాన్ని ఈ సినిమా చర్చిస్తుందని, కాలం గడిచేకొద్దీ ఈ కథ మరింత ప్రాధాన్యం సంతరించుకుంటోందని తెలిపారు.

నటుడు మనోజ్ బాజ్‌పాయ్ మాట్లాడుతూ.. యోగేశ్ మిశ్రా పాత్రలోని సంక్లిష్టత, మొండితనం, జ్ఞాపకాలపై ఉండే గాఢమైన అనుబంధం నన్ను ఎంతగానో ఆకట్టుకున్నాయని, ఇల్లు అంటే కేవలం నాలుగు గోడలు కాదనే విషయాన్ని ఈ చిత్రం గుర్తుచేస్తుందని పేర్కొన్నారు. నటి దివ్య దత్తా మాట్లాడుతూ.. పాత్రల ప్రవర్తనను కేవలం మంచి, చెడుగా కాకుండా వారి పరిస్థితుల ఆధారంగా సహజంగా చూపించామని, ఈ సినిమాలోని సంఘర్షణ ప్రతి ఒక్కరికీ కనెక్ట్ అవుతుందని ఆశాభావం వ్యక్తం చేశారు. నిర్మాత రానా దగ్గుబాటి మాట్లాడుతూ.. మనుషులు తాము తీసుకునే నిర్ణయాలు, దేనిని వదులుకోవడానికి ఇష్టపడరు అనే అంశాల చుట్టూ సాగే ఈ మానవీయ కథలో ప్రధాన తారాగణం అద్భుతమైన నటన కనబరిచిందని కొనియాడారు. మధ్యతరగతి ప్రజల ఆశలు, ఆకాంక్షలు, జ్ఞాపకాలకు విలువనిచ్చే ఈ ప్రత్యేకమైన సినిమా నవంబర్ 6 నుంచి హిందీతో పాటు పలు భాషల్లో జీ5లో స్ట్రీమింగ్ కానుండటంతో ప్రేక్షకుల్లో భారీ అంచనాలు నెలకొన్నాయి.