KTR | బడా భాయ్ మోదీ.. తన ABVP చోటా భాయ్ రేవంత్‌పై ఎప్పటికీ చర్యలు తీసుకోరు: కేటీఆర్

KTR | తెలంగాణలో RR ట్యాక్స్ పేరుతో జరుగుతున్న వసూళ్లపై బీఆర్ఎస్ వర్కింగ్ ప్రెసిడెంట్ కేటీఆర్ కేంద్రంలోని బీజేపీ నాయకత్వాన్ని ప్రశ్నించారు. హైదరాబాద్‌లో ఏ బిల్డర్‌ను, డెవలపర్‌ను అడిగినా RR ట్యాక్స్ వాస్తవమేనని చెబుతారని పేర్కొన్నారు.

KTR | తెలంగాణలో RR ట్యాక్స్ పేరుతో జరుగుతున్న వసూళ్లపై బీఆర్ఎస్ వర్కింగ్ ప్రెసిడెంట్ కేటీఆర్ కేంద్రంలోని బీజేపీ నాయకత్వాన్ని ప్రశ్నించారు. హైదరాబాద్‌లో ఏ బిల్డర్‌ను, డెవలపర్‌ను అడిగినా RR ట్యాక్స్ వాస్తవమేనని చెబుతారని పేర్కొన్నారు. RR ట్యాక్స్ పేరుతో చదరపు అడుగుకు రూ.200 వసూలు చేస్తున్నది వాస్తవమని, ఈ విషయం రియల్ ఎస్టేట్ రంగంలో పనిచేస్తున్న ప్రతి ఒక్కరికీ తెలుసని తన ఎక్స్ పోస్టులో వ్యాఖ్యానించారు.

ప్రధాని నరేంద్ర మోదీ, కేంద్ర హోంమంత్రి అమిత్ షా తరచూ హైదరాబాద్‌కు వస్తుంటారని కేటీఆర్ గుర్తుచేశారు. హైదరాబాద్ పర్యటనల సందర్భంగా రేవంత్ రెడ్డి, రాహుల్ గాంధీ RR ట్యాక్స్ పేరుతో కోట్ల రూపాయలు దోచుకుంటున్నారని ఆరోపణలు చేస్తుంటారని పేర్కొన్నారు. RR ట్యాక్స్ పేరుతో భారీగా వసూళ్లు జరుగుతున్నాయని ఆరోపిస్తున్న మోదీ, అమిత్ షాలు.. ఆ వసూళ్లపై మాత్రం ఎందుకు చర్యలు తీసుకోవడం లేదని ప్రశ్నించారు.

హైదరాబాద్‌లోని బిల్డర్లు, డెవలపర్లకు RR ట్యాక్స్ వాస్తవం తెలిసినప్పుడు, కేంద్రంలోని బీజేపీ అగ్రనాయకత్వానికి ఈ విషయం తెలియదా? మోదీ, అమిత్ షాలు స్వయంగా ఈ అంశంపై ఆరోపణలు చేస్తున్నప్పుడు వాటిపై చర్యలు తీసుకోవాల్సిన బాధ్యత లేదా? హైదరాబాద్‌కు వచ్చిన ప్రతిసారీ ఆరోపణలు చేయడం, తిరిగి వెళ్లిపోవడం తప్ప ఈ వ్యవహారంపై ఎలాంటి చర్యలు తీసుకోకపోవడం ఏమిటని కేటీఆర్ నిలదీశారు.

ఈ సందర్భంగా బీజేపీ అగ్రనాయకత్వం వైఖరిని కేటీఆర్ వ్యంగ్యంగా ప్రస్తావించారు. తన ABVP చోటా భాయ్ రేవంత్ రెడ్డిపై బడా భాయ్ మోదీ ఎప్పటికీ చర్యలు తీసుకోరని వ్యాఖ్యానించారు. రేవంత్ రెడ్డి, రాహుల్ గాంధీపై కోట్ల రూపాయల దోపిడీ ఆరోపణలు చేస్తున్న బీజేపీ నేతలు, అదే అంశంపై చర్యలు తీసుకోవడంలో మాత్రం ఎందుకు వెనుకంజ వేస్తున్నారని ప్రశ్నించారు.

బీజేపీ నేతలది కేవలం ఉత్త మాటలేనని, చేతల్లో మాత్రం ఎలాంటి చర్యలు ఉండవని కేటీఆర్ విమర్శించారు. RR ట్యాక్స్‌పై ఆరోపణలు చేయడం తప్ప, ఆ వ్యవహారాన్ని అరికట్టేందుకు బీజేపీ నాయకత్వం ఎలాంటి చర్యలు తీసుకోవడం లేదని ఎద్దేవా చేశారు.

బీజేపీ, కాంగ్రెస్ మధ్య ఉన్న అంతర్గత అవగాహనే ఈ వైఖరికి కారణమని కేటీఆర్ తన పోస్టులో వ్యాఖ్యానించారు. రేవంత్ రెడ్డి, రాహుల్ గాంధీపై ఆరోపణలు చేస్తూ హైదరాబాద్‌కు వస్తున్న మోదీ, అమిత్ షాలు.. RR ట్యాక్స్‌పై చర్యలు తీసుకోకపోవడానికి కారణం ఏమిటి? బీజేపీ, కాంగ్రెస్ మధ్య ఉన్న అవగాహన వల్లే ఈ నిష్క్రియాపరత్వం కొనసాగుతోందా? అని కేటీఆర్ ప్రశ్నించారు.