శనివారం 06 జూన్ 2020
Telangana - May 13, 2020 , 01:37:30

ఏపీ ఎత్తిపోతను నిలువరించండి

ఏపీ ఎత్తిపోతను నిలువరించండి

  • రాయలసీమ లిఫ్టు, పోతిరెడ్డిపాడు సామర్థ్యం పెంపుపై తెలంగాణ ఫిర్యాదు
  • సీఎం కేసీఆర్‌ అభ్యంతరంతో కృష్ణా బోర్డు అప్రమత్తం

హైదరాబాద్‌, నమస్తే తెలంగాణ: శ్రీశైలం నుంచి రోజుకు 8 టీఎంసీల నీటిని తరలించేలా ఏపీ ప్రభుత్వం జారీచేసిన ఏకపక్ష జీవోపై తెలంగాణ ప్రభుత్వం తీవ్ర అభ్యంతరం వ్యక్తంచేసింది. ఇది ఏపీ పునర్వ్యవస్థీకరణ చట్టాన్ని ఉల్లంఘించడమేనని పేర్కొంటూ తెలంగాణ నీటిపారుదలశాఖ ముఖ్య కార్యదర్శి రజత్‌కుమార్‌ మంగళవారం కృష్ణా బోర్డు చైర్మన్‌కు ఫిర్యాదుచేశారు. శ్రీశైలం జలాశయం నుంచి అదనంగా రోజుకు మూడు టీఎంసీల నీటిని లిఫ్టు చేసేందుకు రాయలసీమ ఎత్తిపోతల పథకంతోపాటు, పోతిరెడ్డిపాడు సామర్థ్యాన్ని పెంచే పనులకు ఆమోదాన్ని తెలుపుతూ ఈ నెల 5న ఏపీ ప్రభుత్వం జారీచేసిన జీవో 203పై కృష్ణాబోర్డుకు ఫిర్యాదుచేయాలని  సీఎం కేసీఆర్‌ ఆదేశించిన నేపథ్యంలో బుధవారం నీటిపారుదలశాఖ అధికారులు సమగ్రంగా చర్చించారు. అనంతరం ముఖ్యకార్యదర్శి రజత్‌కుమార్‌ కృష్ణాబోర్డు చైర్మన్‌కు ఫిర్యాదును పంపించారు. 

తెలంగాణ ఫిర్యాదులో ముఖ్యాంశాలు 

శ్రీశైలం నుంచి అదనపు జలాలను తరలించేందుకు కొత్త ప్రాజెక్టులకు సిద్ధమవుతున్నదనే సమాచారంతో గతంలోనే బోర్డుకు ఫిర్యాదుచేసినా ఏపీ నుంచి సమాధానం రాలేదు. జీవో 203 పునర్వ్యవస్థీకరణ చట్టాన్ని పూర్తిగా ఉల్లంఘించడమే. ఏకపక్షంగా కొత్త ప్రాజెక్టుకు ప్రణాళిక రూపొందించడం శ్రీశైలం జలాలపై ఆధారపడిన తెలంగాణలోని తా గు, సాగునీటి అవసరాలకు విఘాతం కలిగించడమే. పోతిరెడ్డిపాడు హెడ్‌రెగ్యులేటర్‌ వద్ద టెలిమెట్రీ కూడా ఏర్పాటుచేయకుండా ఏపీ ప్రభుత్వం కృష్ణాజలాలను లెక్కలేకుండా తరలిస్తున్నది. గతంలో తెలంగాణ ప్రభుత్వం ఏపీ కుట్రలను ఆధారాలతో సహా బ్రిజేష్‌కుమార్‌ ట్రిబ్యునల్‌ ముందు ఉంచడంతోపాటు సుప్రీంకోర్టులోనూ ప్రత్యేక లీవ్‌ పిటిషన్‌ దాఖలు చేసింది. బచావత్‌ ట్రిబ్యునల్‌ కేటాయింపు సమయంలోనే శ్రీశైలం నుంచి ఇతర బేసిన్లకు జలాల తరలింపును తిరస్కరించారు.

టెండర్లు పిలువకుండా చర్యలు తీసుకోండి

ఏపీ పునర్వ్యవస్థీకరణ చట్టం 11వ షెడ్యూల్‌లోని సెక్షన్‌-85(8)(డీ), క్లాజ్‌-7 ప్రకారం చట్టబద్ధమైన అధికారాలున్న కృష్ణా బోర్డు.. అవతలి బేసిన్‌కు జలాలను తరలించే కొత్త ప్రాజెక్టును సమర్ధించడంగానీ, సిఫారుసు కానీ చేయొద్దు. అపెక్స్‌ కౌన్సిల్‌ అనుమతి లేనందున ఇది అక్రమ ప్రాజెక్టు. బోర్డుకు సమాచారం ఇవ్వకుండా, అనుమతి లేకుండా జీవో జారీచేయడం అన్యాయం. బోర్డు జోక్యం చేసుకొని ఏపీ  జీవో 203 ప్రకారం రాయలసీమ ఎత్తిపోతల పథకంతో పాటు పోతిరెడ్డిపాడు సామర్థ్యాన్ని 80వేల క్యూసెక్కులకు పెంచేందుకు చేపట్టనున్న పనులకు టెండర్లు పిలకుండా నిలువరించాలి.  

అప్రమత్తమైన కృష్ణా బోర్డు

ఏపీ ప్రభుత్వ ఏకపక్ష నిర్ణయాన్ని తెలంగాణ తీవ్రంగా పరిగణించడంతో కృష్ణా బోర్డు అప్రమత్తమైంది. తెలంగాణ నీటిపారుదలశాఖ నుంచి ఫిర్యాదు వస్తుందని ముందుగానే భావించిన బోర్డు అధికారులు.. తదుపరి చర్యలపై చర్చించుకున్నట్టు తెలిసింది. ఈ ఏడాది జనవరిలోనే తెలంగాణ నీటిపారుదలశాఖ తమకు సమాచారమివ్వడం, ఏపీని వివరణ కోరినా బదులు ఇవ్వకపోవడంపై బోర్డు తీవ్ర అసంతృప్తితో ఉన్నది. ఎలాంటి సమాచారం లేకుండానే పరిపాలనా ఆమోదం ఇస్తూ జీవో ఇవ్వడాన్ని తీవ్రంగా పరిగణిస్తున్నది. ఈ నేపథ్యంలో తెలంగాణ మరోసారి లిఖితపూర్వకంగా, ఆధారాలతో సహా ఏపీ ఉల్లంఘనపై ఫిర్యాదు చేయడంతో వెంటనే ఈ అంశాన్ని కేంద్రానికి చేరవేసేందుకు సిద్ధమయింది. బుధవారం ఈ ప్రక్రియను పూర్తిచేయనున్నట్టు తెలిసింది. 


logo