హైదరాబాద్‌కు ‘బెంగ’ లేదు

ప్రపంచంలోనే అత్యంత అనుకూల వాతావరణం ఎక్కడ ఉంటుంది అంటే టక్కున గుర్తొచ్చే నగరం పేరు.. హైదరాబాద్‌. అలాంటి నగరాన్ని ఏడున్నరేండ్లలోనే మోస్ట్‌ డైనమిక్‌ సిటీగా తీర్చిదిద్దింది.. టీఆర్‌ఎస్‌ సర్కారు. దేశంలో ఏ నగరం సాధించని వృద్ధి రేటు హైదరాబాద్‌ సాధిస్తున్నది. ఇతర మెగా సిటీలను వెనక్కి నెట్టి అగ్రస్థానంలో నిలిచింది.

• పచ్చదనంలో మనది మెగా సిటీ..
• వాతావరణంలోనూ మనదే హవా
• హైదరాబాద్‌పై కర్ణాటక సీఎం బొమ్మై అనుచిత వ్యాఖ్యలు .. సొంత రాష్ట్రం నుంచే వ్యతిరేకత
• బెంగళూరును మించిన వృద్ధి రేటు భాగ్యనగరంలోనే
• నగరాల ర్యాంకింగ్‌లో మెరుగైన స్థానం.. వ్యక్తిగత భద్రత ఇచ్చేది మన దగ్గరే
• ప్రపంచంలోనే మోస్ట్‌ డైనమిక్‌ సిటీ.. అంతర్జాతీయ సంస్థల నుంచి ప్రశంసలు

హైదరాబాద్‌, ఏప్రిల్‌ 6 (నమస్తే తెలంగాణ): ప్రపంచంలోనే అత్యంత అనుకూల వాతావరణం ఎక్కడ ఉంటుంది అంటే టక్కున గుర్తొచ్చే నగరం పేరు.. హైదరాబాద్‌. అలాంటి నగరాన్ని ఏడున్నరేండ్లలోనే మోస్ట్‌ డైనమిక్‌ సిటీగా తీర్చిదిద్దింది.. టీఆర్‌ఎస్‌ సర్కారు. దేశంలో ఏ నగరం సాధించని వృద్ధి రేటు హైదరాబాద్‌ సాధిస్తున్నది. ఇతర మెగా సిటీలను వెనక్కి నెట్టి అగ్రస్థానంలో నిలిచింది. వ్యక్తిగత భద్రతలో, పచ్చదనం పెంపులో, ఆఫీస్‌ స్పేస్‌లో, ఐటీ కంపెనీలకు ఆహ్వానం పలకడంలో, స్టార్టప్‌లను నెలకొల్పడంలో హవా కొనసాగిస్తున్నది. ఎంతలా అంటే.. బెంగళూరును మించి. అలాంటిది.. హైదరాబాద్‌పై కర్ణాటక సీఎం బొమ్మై చేసిన అనుచిత వ్యాఖ్యలు చేస్తే నెటిజన్లు ఊరుకుంటారా? ఓ ఆటాడుకొన్నారు. వారిలో ఎక్కువమంది ఆ రాష్ర్టానికి చెందిన నేతలు, నెటిజన్లే ఎక్కువ మంది కావటం గమనార్హం. ‘హైదరాబాద్‌ అభివృద్ధిని అంగీకరించలేకపోతున్నావా? బెంగుళూరుతో పోల్చితే హైదరాబాద్‌ అన్ని రంగాల్లో అభివృద్ధి చెందిందని జాతీయ, అంతర్జాతీయ సంస్థలు ప్రకటించిన విషయాన్ని మరిచిపోయావా? అని ప్రశ్నిస్తున్నారు. మౌలిక సదుపాయాల కల్పనలో హైదరాబాద్‌, బెంగళూరులో ఏది ఉత్తమం అనే అంశంపై మంగళవారం ట్విట్టర్‌ వేదికగా రాష్ట్ర ఐటీ, పరిశ్రమల శాఖ మంత్రి కేటీఆర్‌కు, కర్ణాటక కాంగ్రెస్‌ చీఫ్‌ డీకే శివకుమార్‌ మధ్య చర్చ జరిగింది. మధ్యలో కల్పించుకొన్న కర్ణాటక ముఖ్యమంత్రి బొమ్మై ‘కర్ణాటక దేశంలోనే ఎక్కువ పెట్టుబడులను ఆకర్షిస్తున్నది. బెంగళూరులో పని చేసేందుకు ప్రపంచ దేశాల ప్రజలు ఆసక్తి చూపుతున్నారు. అలాంటిది హైదరాబాద్‌ను బెంగుళూరుతో పోల్చడం పెద్ద జోక్‌’ అని అనుచితంగా ట్వీట్‌ చేశారు. దీనిపై నెటిజన్లు తీవ్రంగా మండిపడ్డారు.

ఇదీ మన హైదరాబాద్‌ ఘనత..

• ప్రపంచ వ్యాక్సిన్‌ రాజధానిగా హైదరాబాద్‌ గుర్తింపు పొందింది. టీకాల పరీక్ష, నాణ్యత నియంత్రణ కోసం సెంట్రల్‌ డ్రగ్‌ ల్యాబరేటరీ హైదరాబాద్‌లో ల్యాబ్‌ను ఏర్పాటు చేసింది.
• ఐక్యరాజ్యసమితి ఫుడ్‌ అండ్‌ అగ్రికల్చర్‌ ఆర్గనైజేషన్‌ ఆర్బర్‌ డే ఫౌండేషన్‌.. హైదరాబాద్‌ను ‘ట్రీ సిటీ ఆఫ్‌ ది వరల్డ్‌ 2020’గా ప్రకటించింది.
• ఇండియా స్కిల్స్‌ 2021 నివేదిక ప్రకారం దేశంలోని అనేక మంది నిపుణులు హైదరాబాద్‌లో స్థిరపడాలని యోచిస్తున్నారు.
• 2019లో హైదరాబాద్‌ యునెస్కో ‘క్రియేటివ్‌ సిటీ ఆఫ్‌ గ్యాస్ట్రానమీ‘ టైటిల్‌ను కైవసం చేసుకొన్నది.
• 2020లో ప్రపంచంలోనే మోస్ట్‌ డైనమిక్‌ సిటీగా హైదరాబాద్‌ను ప్రకటించారు. జేఎల్‌ఎల్‌ సిటీ మొమెంటం ఇండెక్స్‌లో బెంగళూరు రెండవ స్థానంలో ఉన్నది.
• మెర్సర్స్‌ 21వ వార్షిక క్వాలిటీ ఆఫ్‌ లివింగ్‌ సర్వేలో హైదరాబాద్‌ వరుసగా ఐదో ఏడు కూడా అగ్ర నగరంగా తన స్థానాన్ని నిలుపుకొన్నది.
• ప్రపంచ నగరాల ర్యాంకింగ్స్‌లో హైదరాబాద్‌ 143వ స్థానంలో ఉండగా, బెంగళూరు 149వ స్థానంలో నిలిచింది. వ్యక్తిగత భద్రత ర్యాంకింగ్‌లో హైదరాబాద్‌కు 109వ ర్యాంక్‌, బెంగళూరుకు 116వ ర్యాంకు లభించింది.
• దేశంలో ఒక దశాబ్దంలో 48.66 చదరపు కిలోమీటర్లతో అత్యధికంగా పచ్చదనం పొందిన మెగా నగరాల్లో హైదరాబాద్‌ అగ్రస్థానంలో ఉండగా, బెంగళూరు 4.98 చదరపు కిలోమీటర్ల అటవీ విస్తీర్ణాన్ని కోల్పోయింది.

హైదరాబాద్‌ అద్భుతం. విమానాశ్రయం నుండి హైటెక్‌ సిటీకి రోడ్డు బాగుంటుంది. రాజధాని నగరం అంటే అలా ఉండాలి. వ్యాపారానికి ఎంతో అనుకూలమైంది. పెట్టుబడులు పెట్టేందుకు హైదరాబాద్‌ ఎప్పుడూ ఆకర్షిస్తూనే ఉంటుంది.
– హరిణి కలమూరు

బొమ్మై అండ్‌ కో హిజాబ్‌, హలాల్‌తో బిజీగా ఉండగా, కేటీఆర్‌ మాత్రం హైదరాబాద్‌కు పారిశ్రామికవేత్తలను, స్టార్టప్‌లను తీసుకొచ్చేందుకు ప్రయత్నిస్తున్నారు. రాష్ట్ర అభివృద్ధికి కేటీఆర్‌ మాదిరిగా తెలివిగా వ్యవహరించాలి. బెంగళూరుతో పోల్చితే హైదరాబాదే ఉత్తమ నగరం – సమీర్‌ కపూర్‌

హైదరాబాద్‌కు అనుకూలంగా పలువురి ట్వీట్లు

మెరుగైన సామాజిక వాతావరణం కోసం, స్టార్టప్‌లకు మెరుగైన మౌలిక సదుపాయాల కోసం హైదరాబాద్‌కు వెళ్లాలని ఇతరులకు మేం సూచిస్తున్నాం. కర్ణాటక ప్రభుత్వం నుంచి వచ్చే మరికొన్ని ఆర్థిక జిహాద్‌లు మాకు పెట్టుబడులు లేదా ఉద్యోగాలు రాకుండా చూస్తాయి.
-కర్ణాటక మాజీ ఐటీ మంత్రి ప్రియాంక్‌ ఖర్గే

మనకు పోటీయే లేదు..

• ఉద్యోగాలు రెట్టింపై, 6.28 లక్షలకు పెరిగాయి.

తెలంగాణ అంటే ఇదీ..

• “30 మంది రైతులతో కూడిన ప్రతినిధి బృందం బొమ్మైని కలిసి తెలంగాణ రైతు అనుకూల విధానాలను కర్ణాటకలో కూడా అమలు చేయాలని విజ్ఞప్తి చేసింది”

స్టార్టప్‌

• టాలెంట్‌ను ప్రోత్సహించటం వల్ల హైదరాబాద్‌లో ప్రస్తుతం స్టార్టప్‌ల సంఖ్య 1,500కు చేరింది.
• ఐటీ ఎగుమతులు
• తెలంగాణ వచ్చేనాటికి అంటే.. 2013-14లో రాష్ట్రంలో ఐటీ ఎగుమతులు రూ.57,258 కోట్లు ఉండగా, 3.23 లక్షల మందికి ఉద్యోగ అవకాశాలు వచ్చాయి.
• ఏడున్నరేండ్లలోనే (2020-21 నాటికి) రూ.1,45,522 కోట్లకు పెరిగింది. అంటే 154% వృద్ధి రేటు
• తెలంగాణ ఎగుమతులు ఏటా 15 శాతం పెరుగుతూ వచ్చాయి. జాతీయ సగటుకు ఇది రెండింతలు.

ఆఫీస్‌ స్పేస్‌

• జేఎల్‌ఎల్‌ ప్రకారం.. జనవరి-మార్చి త్రైమాసికంలో హైదరాబాద్‌లో 34.2 లక్షల చదరపు అడుగుల ఆఫీస్‌ స్పేస్‌ను చేర్చుకొన్నది. పుణె 23 లక్షల చదరపు అడుగులు, బెంగళూరు 16.7 లక్షల చదరపు అడుగులతో రెండు మూడు స్థానాల్లో ఉన్నాయి.
• అక్టోబర్‌-డిసెంబర్‌ త్రైమాసికం(29.9 లక్షల చదరపు అడుగులు)తో పోల్చితే హైదరాబాద్‌ 14.3 శాతం ఆఫీస్‌ స్పేస్‌ను అదనంగా సంపాదించుకొన్నది.
• బెంగళూరు విషయానికి వస్తే జనవరి-మార్చి త్రైమాసికంలో 30.8% ఆఫీస్‌ స్పేస్‌ను కోల్పోయింది.