అమాయక నేల కాదు నా తెలంగాణ!

కాంగ్రెస్‌ 50 ఏండ్ల పాలనంతా మోసం, ద్రోహం, వంచన, దోఖాలమయమని బీఆర్‌ఎస్‌ వర్కింగ్‌ ప్రెసిడెంట్‌, రాష్ట్ర మంత్రి కే తారక రామారావు మండిపడ్డారు.

• దాచి..దాచి దెయ్యాలకు పెట్టదు..
• కాంగ్రెస్‌ ఆరు గ్యారెంటీలపై ఐటీ మంత్రి కేటీఆర్‌ ఫైర్‌
• కవితాత్మకంగా మండిపాటు

హైదరాబాద్‌, సెప్టెంబర్‌ 19 (నమస్తే తెలంగాణ): కాంగ్రెస్‌ 50 ఏండ్ల పాలనంతా మోసం, ద్రోహం, వంచన, దోఖాలమయమని బీఆర్‌ఎస్‌ వర్కింగ్‌ ప్రెసిడెంట్‌, రాష్ట్ర మంత్రి కే తారక రామారావు మండిపడ్డారు. దాచి.. దాచి దెయ్యాలకు పెట్టేంత ఎడ్డిది తెలంగాణ కాదని, ఈనగాచి నకల పాల్జేసేంత అమాయక నేల కాదు నా తెలంగాణ అని కాంగ్రెస్‌పై కేటీఆర్‌ తీవ్రస్థాయిలో ఫైర్‌ అయ్యారు. ఈ మేరకు మంగళవారం ఒక ప్రకటనలో కవితాత్మకంగా హస్తం పార్టీపై ఆగ్రహం వ్యక్తం చేశారు.

మోసం..వంచన..
ద్రోహం..దోఖాలమయం
కాంగ్రెస్‌ అర్ధ శతాబ్దపు పాలనంతా!
ఇది..మీ కపట కథలు..
కంత్రీ గోత్రాలు బాగా తెలిసిన
తెలివైన తెలంగాణ గడ్డ!

కల్లబొల్లి గ్యారెంటీలు చెల్లవ్‌ ఇకడ!
రాబందుల రాజ్యమొస్తే
రైతుబంధు రద్దవడం గ్యారెంటీ!
కాలకేయుల కాలం వస్తే
కరెంటు కోతలు..కటిక చీకట్లు గ్యారెంటీ!

మూడు రంగుల ఊసరవెల్లిని నమ్మితే
మూడు గంటల కరెంటే గతి..
ఉచిత విద్యుత్‌ ఊడగొట్టడం గ్యారెంటీ!
దగాకోరుల పాలనవొస్తే
ధరణి రక్షణ ఎగిరిపోవడం గ్యారెంటీ!
బకాసురులు గద్దెనెకితే
రైతుబీమా.. ధీమా గల్లంతవ్వడం గ్యారెంటీ!

సమర్థతలేని సన్నాసులకు ఓటేస్తే
సకల రంగాల్లో సంక్షోభం గ్యారెంటీ!
ఢిల్లీ కీలుబొమ్మలు కుర్చీ ఎకితే
ఆత్మగౌరవాన్ని అంగట్లో
తాకట్టు పెట్టడం గ్యారెంటీ!
దొంగల చేతికి తాళాలు ఇస్తే
సంపదనంతా స్వాహా చేయడం గ్యారెంటీ!
భస్మాసుర హస్తాన్ని నెత్తిన పెట్టుకుంటే బూడిద మిగలడం గ్యారెంటీ!

సాముల పార్టీకి స్వాగతం చెప్తే
సీములన్ని ఎత్తేయడం గ్యారెంటీ!
కర్షకుడి కష్టం తెలియనోళ్లకు సీటిస్తే
అన్నదాత ఆగమైపోవడం గ్యారెంటీ!
పరిపాలన చేతగాని.. చేవలేనివాళ్లకు పగ్గాలిస్తే పల్లెపల్లెనా మళ్లీ పల్లేర్లు
మొలవడం గ్యారెంటీ!

పనికిమాలిన వాళ్లు పవర్లోకి వస్తే
పరిశ్రమలు పారిపోవడం గ్యారెంటీ..!
బుద్ధికుశలత లేనోళ్లకు చోటిస్తే
భూముల ధరలు పడిపోవడం గ్యారెంటీ..!
విషయం.. విజ్ఞానం లేనోళ్లను విశ్వసిస్తే వికాసం మాయమై వినాశనం గ్యారెంటీ!

థర్డ్‌ గ్రేడ్‌ నాలాయక్స్‌ను నమ్ముకుంటే ప్రథమ స్థానంలో ఉన్న స్టేట్‌
అథమస్థాయికి పోవడం గ్యారెంటీ!
ఆర్థికశాస్త్రం తెలియని అరాచకులకు
అవకాశం ఇస్తే ఎకానమీ ఏట్లో
కలవడం గ్యారెంటీ..!

జోకర్లకు.. బ్రోకర్లకు పీఠం ఇస్తే పరువు
ప్రతిష్ఠలు గంగలో కలవడం గ్యారెంటీ!
దాచి.. దాచి దెయ్యాలకు పెట్టేంత
ఎడ్డిది కాదు..నా తెలంగాణ..!
ఈనగాచి నకల పాల్జేసేంత
అమాయక నేల కాదు నా తెలంగాణ..!