ఎమర్జింగ్‌ టెక్నాలజీ హబ్‌గా భారత్‌

• సీపీగ్రామ్‌తో అన్ని రాష్ర్టాలు, జిల్లాల పోర్టళ్ల ఏకీకరణ
• 24వ జాతీయ ఈ-గవర్నెన్స్‌ సదస్సు విజయవంతం
• ‘హైదరాబాద్‌ డిక్లరేషన్‌’కు ఏకగ్రీవ ఆమోదం

హైదరాబాద్‌, జనవరి 8 (నమస్తే తెలంగాణ): ఎమర్జింగ్‌ టెక్నాలజీల్లో భారత్‌ను గ్లోబల్‌ హబ్‌గా నిలపాలనే లక్ష్యంతో అన్ని రాష్ర్టాలు, కేంద్రపాలిత ప్రాంతాలను కలుపుకొని ముందుకు వెళ్లాలని నిర్ణయించినట్టు కేంద్ర పరిపాలన సంస్కరణలు, ప్రజా ఫిర్యాదులశాఖ కార్యదర్శి వీ శ్రీనివాస్‌ తెలిపారు. హైదరాబాద్‌లో రెండురోజులపాటు నిర్వహించిన 24వ ఈ-గవర్నెన్స్‌ జాతీయ సదస్సు శనివారం ముగిసింది. ఇందులో ‘హైదరాబాద్‌ డిక్లరేషన్‌’ను ఏకగ్రీవంగా ఆమోదించారు. ఈ సందర్భంగా శ్రీనివాస్‌ మాట్లాడుతూ పౌరులకు ప్రభుత్వాన్ని మరింత దగ్గర చేయడంతోపాటు భవిష్యత్తు తరానికి అవసరమైన పరిపాలన సంస్కరణలను రూపొదించటంపై సదస్సులో చర్చలు సఫలమయ్యాయని తెలిపారు. సదస్సులో తెలంగాణ ఐటీశాఖ ముఖ్య కార్యదర్శి జయేశ్‌రంజన్‌, కేంద్ర ప్రభుత్వ పరిపాలన సంస్కరణలు, ప్రజాఫిర్యాదుల శాఖ సంయుక్త కార్యదర్శి ఎన్‌బీఎస్‌ రాజ్‌పుత్‌, తెలంగాణ ఎమర్జింగ్‌ టెక్నాలజీస్‌ విభాగం డైరెక్టర్‌ రమాదేవి తదితరులు పాల్గొన్నారు. సదస్సులో ఆరు అంశాలపై చర్చలు జరిగాయి. వివిధ అంశాలపై 50 మందికిపైగా నిపుణులు పత్రాలను సమర్పించగా, దేశం నలుమూలల నుంచి రెండువేల మంది ప్రతినిధులు హాజరయ్యారు. ఈ సందర్భంగా డిజిటల్‌ ప్లాట్‌ఫామ్‌ల ద్వారా పౌరులను ప్రభుత్వానికి మరింత దగ్గర చేయడం, సామాజిక సాధికారత కోసం ఆర్టిఫిషియల్‌ ఇంటెలిజెన్స్‌, మెషిన్‌ లెర్నింగ్‌, బ్లాక్‌ చెయిన్‌, 5జీ, ఆగ్మెంటెడ్‌ రియాలిటీ, వర్చువల్‌ రియాలిటీ తదితర సాంకేతికతలను ఉపయోగించడాన్ని ప్రోత్సహించడం, ఎమర్జింగ్‌ టెక్నాలజీలపై నైపుణ్యం కలిగిన వనరులను సృష్టించి, దేశాన్ని సాంకేతికతకు గ్లోబల్‌ హబ్‌గా మార్చడం. ప్రజా ఫిర్యాదులను సజావుగా పరిష్కరించడం కోసం సీపీగ్రామ్‌తో అన్ని రాష్ర్టాలు, జిల్లా పోర్టర్లను ఏకీకరించడం వంటి అంశాలను హైదరాబాద్‌ డిక్లరేషన్‌లో ఆమోదించారు.

తెలంగాణలో నోలైన్‌.. అన్నీ ఆన్‌లైన్‌లోనే!

• తెలంగాణ ప్రభుత్వం దాదాపు అన్నీ పౌరసేవలను ఇప్పటికే ఆన్‌లైన్‌లో అందిస్తున్నది. ప్రత్యక్షంగా హాజరుకాకుండా, ఎవరినీ కలుకుండా, అన్ని వేళల్లో, ఎక్కడి నుంచైనా సేవలు పొందే వెసులుబాటు కల్పిస్తున్నది. ప్రస్తుతం కొవిడ్‌ మూడోదశ వ్యాప్తి నేపథ్యంలోనూ ప్రజలు ఎలాంటి ఆటంకం లేకుండా ప్రభుత్వ సేవలు పొందుతున్నారు.

సెల్ఫీద్వారా పెన్షనర్ల లైఫ్‌ సర్టిఫికెట్‌

• పెన్షనర్లు స్మార్ట్‌ఫోన్‌తోతో సెల్ఫీ దిగి దానిని అప్‌లోడ్‌చేసి వార్షిక లైఫ్‌ సర్టిఫికెట్‌ సమర్పిస్తున్నారు.
• 2019 నవంబర్‌లో ప్రారంభమైన ఈ యాప్‌ను ఇప్పటివరకు 1.8 లక్షల మంది వాడారు.

డిగ్రీ అడ్మిషన్లు ఆన్‌లైన్‌లోనే..

• సెల్ఫీని స్మార్ట్‌ఫోన్‌తో అప్‌లోడ్‌చేసి డిగ్రీ కళాశాలలో ప్రవేశాలు పొందుతున్నారు.
• 2020 జూన్‌లో ప్రారంభమైన ఈ యాప్‌ను ఇప్పటివరకు లక్ష మంది విద్యార్థులు వినియోగించారు.

రవాణా సేవలూ సులువే..

• రవాణాశాఖకు సంబంధించిన 17 రకాల పౌర సేవలను స్మార్ట్‌ఫోన్‌ ద్వారా పొందవచ్చు.
• 2020 జూలైలోప్రారంభమైన ఈ సేవలను నిత్యం సుమారు 500 మంది పొందుతున్నారు.

ఓటర్లను గుర్తించడం ఇలా..

• పోలింగ్‌ అధికారి ఒక ఓటరు ఫొటో తీసుకుంటారు. దానిని సిస్టమ్‌లో అప్‌లోడ్‌ చేస్తే అతడు ఏ పోలింగ్‌ బూత్‌లో ఓటు హక్కు కలిగి ఉన్నాడనే తెలియజేస్తుంది.
• 2020 జనవరిలో కొంపల్లి మున్సిపల్‌ ఎన్నికల్లో 10 పోలింగ్‌ బూత్‌లలో దీనిని వినియోగించారు.

స్మార్ట్‌ఫోన్‌ ద్వారా ఓటింగ్‌..

• సంప్రదాయ పద్ధతిలో కాకుండా స్మార్ట్‌ఫోన్‌ ద్వారా ఓటు వేసే పద్ధతి అందుబాటులోకి వచ్చింది.
• ఇందుకోసం రియల్‌ టైమ్‌ డిజిటల్‌ అథెంటికేషన్‌ ఆఫ్‌ ఐడెంటిటీ (ఆర్‌డీఏఐ), బ్లాక్‌చైన్‌ టెక్నాలజీ వాడనున్నారు.
• 2021 అక్టోబర్‌లో ఖమ్మంలో దీనిపై డ్రై రన్‌ నిర్వహించారు.