తొలివిడత భారీగా నామినేషన్లు

రాష్ట్రంలో పంచాయతీ ఎన్నికల్లో భాగంగా తొలివిడత ఎన్నికలకు నామినేషన్ల ప్రక్రియ ముగిసింది. మరోవైపు రెండోవిడత ఎన్నికల ప్రక్రియకు తెరలేచింది.

• సర్పంచ్‌ స్థానాలకు 26,083, వార్డు స్థానాలకు 82,276 నామినేషన్ల దాఖలు
• రెండో విడతకు నోటిఫికేషన్‌ జారీ
• మొదలైన నామినేషన్ల స్వీకరణ
• 4,333 సర్పంచ్‌, 38,350 వార్డులకు నామినేషన్ల దాఖలు

హైదరాబాద్‌, నవంబర్‌ 30 (నమస్తే తెలంగాణ): రాష్ట్రంలో పంచాయతీ ఎన్నికల్లో భాగంగా తొలివిడత ఎన్నికలకు నామినేషన్ల ప్రక్రియ ముగిసింది. మరోవైపు రెండోవిడత ఎన్నికల ప్రక్రియకు తెరలేచింది. తొలివిడతలో నిర్వహించే 4,236 సర్పంచ్‌, 37,440 వార్డుసభ్యుల ఎన్నికలకు చివరి రోజైన శనివారం పెద్ద సంఖ్యలో నామినేషన్లు దాఖలయ్యాయి. సాయంత్రం ఐదు గంటల్లోపు నామినేషన్లు సమర్పించేందుకు క్యూలో నిలబడిన వారందరికీ అధికారులు అవకాశం కల్పించారు. కొన్ని జిల్లాల్లో అర్ధరాత్రి దాటిన తర్వాత కూడా నామినేషన్ల స్వీకరణ పూర్తి కాలేదు. శనివారం సుమారుగా నామినేషన్ల వివరాలు వెల్లడించిన ఎస్‌ఈసీ అధికారులు ఆదివారం ఉదయం పూర్తి వివరాలు వెల్లడించారు. సర్పంచ్‌, వార్డు స్థానాలకు మొదటి, రెండు రోజుల కంటే చివరి రోజే(4%) అధిక నామినేషన్లు దాఖలయ్యాయని ఎస్‌ఈసీ అధికారులు వెల్లడించారు. తొలివిడతలో జరిగే 4,236 సర్పంచ్‌ స్థానాలకు తొలి రోజు 3,242, రెండో రోజు 4,901, మూడో రోజు 17,940 నామినేషన్లతో కలిపి మొత్తం 26,083 నామినేషన్లు దాఖలైనట్టు వివరించారు. 37,440 వార్డుస్థానాలకు తొలిరోజు 1,821, రెండోరోజు 9,643, చివరి రోజు 70,596 నామినేషన్లతో కలిపి మొత్తం 82,060 నామినేషన్లు వచ్చినట్టు తెలిపారు.

చెల్లుబాటైన నామినేషన్ల ప్రకటన
తొలివిడత నామినేషన్ల ప్రక్రియను ఆదివారం సాయంత్రం ఐదు గంటల వరకు నిర్వహించారు. స్క్రూట్నీలో కొన్ని నామినేషన్లు తిరస్కరించారు. చెల్లుబాటైన అభ్యర్థుల జాబితాను ఆయా గ్రామ పంచాయతీల వద్ద నోటీసు బోర్డుల్లో పెట్టారు. నామినేషన్లు తిరస్కరణకు గురైనవారు సోమవారం సాయంత్రం 5 గంటల వరకు అప్పీలు చేసుకోవచ్చని తెలిపారు. అప్పీళ్లను డిసెంబర్‌ 2న (మంగళవారం సాయంత్రంలోపు) పరిష్కరిస్తారు. 3వ తేదీ మధ్యాహ్నం 3 గంటల్లోపు అభ్యర్థిత్వాన్ని, నామినేషన్లు ఉపసంహరించుకోవచ్చని తెలిపారు. అదేరోజు మధ్యా హ్నం 3 గంటల తర్వాత బరిలో నిలిచిన అభ్యర్థుల తుదిజాబితా ప్రకటిస్తారు. సాయంత్రం అభ్యర్థులకు గుర్తులు కేటాయిస్తారు. వారంపాటు ప్రచారం చేసుకోవడానికి అవకాశం ఉంటుంది. తొలివిడత ఎన్నికలకు డిసెంబర్‌ 11న ఉదయం 7 నుంచి మధ్యా హ్నం ఒంటి గంట వరకు పోలింగ్‌ నిర్వహిస్తారు. మధ్యాహ్నం 2 గంటల తర్వాత ఓట్లు లెక్కింపు పూర్తయిన వెంటనే ఫలితాలు ప్రకటిస్తారు.

రెండో విడత నామినేషన్లు షురూ
రెండోవిడత పంచాయతీ ఎన్నికల నిర్వహణకు ఆదివారం రాష్ట్ర ఎన్నికల సంఘం కార్యదర్శి మందా మకరందు నోటిఫికేషన్‌ జారీచేశారు. రెండో విడతలో 4,333 సర్పంచ్‌, 38,350 వార్డుసభ్యులను ప్రజలు ఎన్నుకోవడానికి రిటర్నింగ్‌ అధికారులు ప్రకటన విడుదల చేశారు. ఓటర్ల తుది జాబితాను ఆయా గ్రామ పంచాయతీ కార్యాలయ నోటీసు బోర్డులపై అతికించారు. రెండోవిడత నామినేషన్ల స్వీకరణ ఆదివారం ఉదయం 10:30 గంటలకు మొదలైంది.