ఫిట్‌మెంట్‌ 40% ఇవ్వండి

రాష్ట్రంలోని ఉద్యోగులు, ఉపాధ్యాయులు, పెన్షనర్లు పీఆర్సీపై భారీ ఆశలుపెట్టుకున్నారు. రెండో పీఆర్సీలో వేతనాలు గణనీయంగా పెంచాలని కోరుతున్నారు. 40% ఫిట్‌మెంట్‌ ఇవ్వాలని, హెచ్‌ఆర్‌ఏను గరిష్ఠంగా 28 శాతానికి పెంచాలని విజ్ఞప్తి చేస్తున్నారు.

• హెచ్‌ఆర్‌ఏ 28% చేయండి
• కనీస వేతనం 35 వేలకు.. పెన్షన్‌ 17 వేలకు పెంచాలి
• ఓపీఎస్‌ను అమలుచేయాలి
• పీఆర్సీ కమిటీకి ఉద్యోగ, ఉపాధ్యాయ సంఘాల వినతి

హైదరాబాద్‌, మార్చి 4 (నమస్తే తెలంగాణ): రాష్ట్రంలోని ఉద్యోగులు, ఉపాధ్యాయులు, పెన్షనర్లు పీఆర్సీపై భారీ ఆశలుపెట్టుకున్నారు. రెండో పీఆర్సీలో వేతనాలు గణనీయంగా పెంచాలని కోరుతున్నారు. 40% ఫిట్‌మెంట్‌ ఇవ్వాలని, హెచ్‌ఆర్‌ఏను గరిష్ఠంగా 28 శాతానికి పెంచాలని విజ్ఞప్తి చేస్తున్నారు. ఉద్యోగుల వేతన సవరణపై అధ్యయనానికి గత కేసీఆర్‌ ప్రభుత్వం రిటైర్డ్‌ ఐఏఎస్‌ అధికారి శివశంకర్‌ నేతృత్వంలో పీఆర్సీ కమిటీని నియమించగా.. ఆ కమిటీ ప్రస్తుతం సంఘాల నుంచి ప్రతిపాదనలు స్వీకరిస్తున్నది. సోమవారం తెలంగాణ నాన్‌ గెజిటెడ్‌ అధికారుల సంఘం (టీఎన్జీవో), తెలంగాణ గెజిటెడ్‌ అధికారుల సంఘం (టీజీవో),పీఆర్టీయూ టీఎస్‌, టీఎస్‌ యూటీఎఫ్‌, టీఎస్‌జీహెచ్‌ఎం అసోసియేషన్లు, పెన్షనర్ల జేఏసీ పీఆర్సీ కమిటీకి ప్రతిపాదనలు సమర్పించాయి. ఫిట్‌మెంట్‌ను సిఫారసు చేసేందుకు కేరళ, కర్ణాటక రాష్ర్టాల వేతనాలు, దక్షిణాది రాష్ర్టాల వినియోగదారుల సూచీ, ద్రవ్యోల్బణం అంశాలను పరిగణనలోకి తీసుకోవాలని కోరాయి. టీఎన్జీవో రాష్ట్ర ప్రధాన కార్యదర్శి మారం జగదీశ్వర్‌, అసోసియేట్‌ అధ్యక్షులు కస్తూరి వెంకట్‌, సత్యనారాయణగౌడ్‌, కోశాధికారి రామినేని శ్రీనివాస్‌రావు, ముజీబ్‌హుస్సేని, టీజీవో అధ్యక్ష, ప్రధాన కార్యదర్శులు ఏలూరి శ్రీనివాస్‌రావు, సత్యనారాయణ, పీఆర్టీయూ నుంచి ఎమ్మెల్సీ రఘోత్తమ్‌రెడ్డి, అధ్యక్ష, ప్రధాన కార్యదర్శులు పింగిలి శ్రీపాల్‌రెడ్డి, బీరెల్లి కమలాకర్‌రావు తదితరులు పీఆర్సీ కమిటీ చైర్మన్‌ శివశంకర్‌ను వేర్వేరుగా కలిసి ప్రతిపాదనలిచ్చారు.

50% ఫిట్‌మెంట్‌నివ్వాలి : పీఆర్టీయూ టీఎస్‌

ఉద్యోగులు, టీచర్ల కనిష్ఠ వేతనం రూ.35 వేలుగా నిర్ణయించి 50% ఫిట్‌మెంట్‌తో పీఆర్సీని అమలుచేయాలని పీఆర్టీయూ టీఎస్‌ కోరింది. ఈ మేరకు మాజీ ఎమ్మెల్సీలు పూల రవీందర్‌, బీ మోహన్‌రెడ్డి, సంఘం మాజీ ప్రధాన కార్యదర్శి గుర్రం చెన్నకేశవరెడ్డి, వెంకట్‌రెడ్డి, ప్రసాద్‌, వేమిరెడ్డి దిలీప్‌రెడ్డి తదితరులు నివేదికలు పీఆర్సీ కమిటీకి నివేదిక సమర్పించారు. పలు ఉపాధ్యాయ సంఘాల నేతలు పర్వత్‌రెడ్డి, సదానంద్‌గౌడ్‌ (ఎస్టీయూ), జంగయ్య, చావ రవి, (టీఎస్‌యూటీఎఫ్‌), రాజభాను చంద్రప్రకాశ్‌, రాజుగంగారెడ్డి (టీఎస్‌జీహెచ్‌ఎంఏ), నర్సిహుంలు, జగదీశ్‌ (ఆర్‌యూపీపీ), కృష్ణుడు (బీసీటీఏ), ఎస్‌ రామదాసు, ఇర్ఫాన్‌ (ఎస్‌జీటీఎఫ్‌), అశోక్‌కుమార్‌, కటకం రమేశ్‌ (టీఆర్‌టీఎఫ్‌), భిక్షంగౌడ్‌, చెన్నయ్య (పీఆర్టీయూ తెలంగాణ) తదితరులు పలు అంశాలపై నివేదికలను సమర్పించారు.

సీసీఎస్‌ను రద్దుచేయాలి: సీపీఎస్‌ఈయూ

కంట్రిబ్యూటరీ పెన్షన్‌ స్కీంను రద్దుచేసి పాత పెన్షన్‌ విధానం అమలుచేయాలని సీపీఎస్‌ ఎంప్లాయీస్‌ యూనియన్‌ నేతలు గంగాపురం స్థితప్రజ్ఞ, కల్వల్‌ శ్రీకాంత్‌ కోరారు. కేస్‌స్టడీస్‌తో కూడిన 20 పేజీల నివేదికను సమర్పించారు.

40% వేతనాలు పెంచండి : పంచాయతీ కార్యదర్శుల అసోసియేషన్‌

గ్రామ పంచాయతీ కార్యదర్శుల వేతనాలను 40% పెంచేలా సిఫారసు చేయాలని పీఆర్సీ కమిటీ చైర్మన్‌ శివశంకర్‌ను తెలంగాణ పంచాయతీ సెక్రటరీస్‌ అసోసియేషన్‌ అధ్యక్షుడు పీ మధుసూదన్‌రెడ్డి కోరారు.

టీఎన్జీవో సంఘం ప్రతిపాదనలు

• కనీస వేతనాన్ని రూ.19 వేల నుంచి రూ.35 వేలకు, గరిష్ఠ వేతనాన్ని రూ.1.62 లక్షల నుంచి రూ.2.99 లక్షలకు పెంచాలి.
• వార్షిక గ్రేడ్‌ ఇంక్రిమెంట్‌ను 3.36-2.33% నుంచి 3.36-2.50 శాతానికి పెంచాలి. స్కేల్‌ ఆఫ్‌ పే గ్రేడ్స్‌ను 32 గ్రేడ్లుగా కొనసాగించాలి.
• హెచ్‌ఆర్‌ఏను జీహెచ్‌ఎంసీలో 24 నుంచి 27 శాతానికి, జిల్లా కేంద్రాల్లో 18.5, మండల కేంద్రాల్లో 14, ఇతర ప్రాంతాల్లో 11.5 శాతానికి పెంచాలి.
• పెన్షన్‌ మొత్తం పొందేందుకు కావాల్సిన సర్వీసును 25 నుంచి 15 ఏండ్లకు తగ్గించాలి. కనీస పెన్షన్‌ మొత్తాన్ని రూ.9,700 నుంచి రూ.17,500కు పెంచాలి.
• గ్రాట్యుటీ సీలింగ్‌ను రూ.16 లక్షల నుంచి రూ.24 లక్షలకు పెంచాలి.
• ఉద్యోగి అంత్యక్రియల సహాయాన్ని రూ.75 వేలకు పెంచాలి.
• ఇంటి నిర్మాణ అడ్వాన్స్‌ను వేతన స్లాబులను బట్టి కనిష్ఠంగా రూ.30 లక్షలు, గరిష్ఠంగా రూ.60 లక్షల వరకు పొందే అవకాశం ఇవ్వాలి. వివాహ అడ్వాన్స్‌ను కనిష్ఠంగా రూ.3 లక్షల నుంచి గరిష్ఠంగా రూ.8 లక్షలు, ఎడ్యుకేషనల్‌ అడ్వాన్స్‌ను రూ.5 లక్షల వరకు పెంచాలి.

టీజీవో సంఘం ప్రతిపాదనలు

• వాస్తవ ద్రవ్యోల్బణ రేటు దృష్ట్యా 40% ఫిట్‌మెంట్‌ను ప్రకటించాలి.
• హెచ్‌ఆర్‌ఏ హెచ్‌ఎండీఏ పరిధిలో 28%, జిల్లా కేంద్రాల్లో 20, మున్సిపాలిటీలు, రెవెన్యూ డివిజన్‌ కేంద్రాల్లో 20, మండల కేంద్రాల్లో 17, ఇతర ప్రాంతాల్లో 15% చొప్పున అమలుచేయాలి.
• క్వాంటం ఆఫ్‌ ఇంక్రిమెంట్‌ను 2.7% నుంచి 3% ఉండాలి. స్టాగ్‌నేషన్‌ ఇంక్రిమెంట్లు 7 వరకు మంజూరుచేసి, తదుపరి పేస్కేల్‌ను వర్తింపజేయాలి.
• ఉద్యోగుల చందాతో ఈహెచ్‌ఎస్‌ను అమలుచేయాలి. స్కేల్‌ను అనుసరించి రూ.500 నుంచి రూ.800 వరకు ఉద్యోగుల నుంచి చందాగా తీసుకోవాలి.
• ఆటోమేటిక్‌ అడ్వాన్స్‌మెంట్‌ స్కీమ్‌లను 5,10,15,20,25 ఏండ్లకు ఇవ్వాలి.
• కనీస వేతనాన్ని రూ.35వేలకు, గరిష్ఠ వేతనాన్ని రూ. 2.99 లక్షలకు పెంచాలి. గ్రాట్యుటీని గరిష్ఠంగా రూ.25 లక్షల వరకు పెంచాలి.

పెన్షనర్ల జేఏసీ ప్రతిపాదనలు

• వయస్సుల వారీగా అదనపు క్వాంటం ఆఫ్‌ పెన్షన్‌ మొత్తాన్ని పెంచాలి. బేసిక్‌ పెన్షన్‌ మొత్తాన్ని 65-70 ఏండ్ల వారికి 15%, 75 ఏండ్లకు 25%, 80 ఏండ్లకు 35%, 85 ఏండ్లకు 45%, 90 ఏండ్లకు 55%, 95 ఏండ్లు దాటిన వారికి 10శాతం బేసిక్‌ పెన్షన్‌ అమలుచేయాలి
• పెన్షనర్లందరికీ 1% చందాతో ఈహెచ్‌ఎస్‌ స్కీమ్‌, రూ.20 లక్షల లోపు క్యాష్‌లెస్‌ ట్రీట్‌మెంట్‌ చేయాలి.
• మెడికల్‌ అలవెన్సును నెలకు రూ.600 నుంచి రూ.3వేలకు పెంచాలి.
• రెండేండ్లకొకసారి పెన్షనర్లకు తీర్థయాత్రల భత్యం రూ.50 వేలు అందజేయాలి.