సిద్దిపేటలో పోటీకి నువ్వు సిద్ధమా?
సిద్దిపేటలో గెలిస్తే మంత్రి పదవి ఆఫర్ చేస్తున్న రేవంత్రెడ్డికి బీఆర్ఎస్ఎల్పీ డిప్యూటీ ఫ్లోర్లీడర్ హరీశ్రావు గట్టి సవాల్ విసిరారు. ‘వాళ్లో వీళ్లో కాదు నువ్వే వచ్చి సిద్దిపేటల పోటీ చేయ్. నువ్వో నేనో ప్రజల ముందే తేల్చుకుందాం రా..’ అని చాలెంజ్ చేశారు.
- రేవంత్.. ప్రజాక్షేత్రంలో నువ్వోనేనో తేల్చుకుందాం
- సీఎంకు బీఆర్ఎస్ఎల్పీ ఉపనేత హరీశ్ సవాల్
- రేవంత్రెడ్డిది మిడిసిపాటు: మధుసూదనాచారి
- ముఖ్యమంత్రి అవినీతిపై విచారణ జరుపాలి: వేముల
- అనుచిత వ్యాఖ్యలపై క్షమాపణ చెప్పాలి: సబిత
- రేవంత్రెడ్డి చరిత్రంగా మోసాల మయం: జీవన్రెడ్డి
- కేసీఆర్ పేరెత్తే అర్హతే ఆయనకు లేదు: రసమయి
హైదరాబాద్, నవంబర్ 20 (నమస్తే తెలంగాణ) : సిద్దిపేటలో గెలిస్తే మంత్రి పదవి ఆఫర్ చేస్తున్న రేవంత్రెడ్డికి బీఆర్ఎస్ఎల్పీ డిప్యూటీ ఫ్లోర్లీడర్ హరీశ్రావు గట్టి సవాల్ విసిరారు. ‘వాళ్లో వీళ్లో కాదు నువ్వే వచ్చి సిద్దిపేటల పోటీ చేయ్. నువ్వో నేనో ప్రజల ముందే తేల్చుకుందాం రా..’ అని చాలెంజ్ చేశారు. అప్పుడు ప్రజలు ఎవరిని ఆదరిస్తరో, ఎవరిని చీదరిస్తరో తేలిపోతదని, తొట్టి గ్యాంగుతో తిట్టించి సమయం వృథా చేసుకోవద్దని హితవు పలికారు. తెలంగాణ భవన్లో శుక్రవారం హరీశ్రావు మీడియాతో మాట్లాడారు. సిద్దిపేట సభలో రేవంత్రెడ్డి చేసిన వ్యాఖ్యలకు గట్టి కౌంటర్ ఇచ్చారు.
సిద్దిపేట సభకు స్థానిక ప్రజలు రారని, 26 అసెంబ్లీ నియోజకవర్గాల నుంచి పార్టీ కార్యకర్తలను తరలించి కాంగ్రెస్ ప్లీనరీ పెట్టుకున్నారని ఎద్దేవా చేశారు. ఎన్టీఆర్ అధికారం చేపట్టిన తర్వాత 1989లో కాంగ్రెస్ 181 సీట్లతో అధికారంలోకి వచ్చిందని, 1994 ఎన్నికల నాటికి 26కి పడిపోయిందని, 1994లో ఓడితే అధికారంలోకి రావడానికి పదేండ్లు పట్టిందని చురకలంటించారు. ఈసారి మాత్రం రేవంత్ చేతగాని పాలన, ఆకాశాన్నంటే అవినీతి, దగుల్బాజీ మాటలు కాంగ్రెస్ పార్టీ మరో 20 ఏండ్ల వరకు లేవకపోవడం ఖాయమని చెప్పారు. టీఆర్ఎస్లో ఉన్నపుడు రేవంత్ బుద్ధి తెలిసి నాడు జడ్పీటీసీ టికెట్ కూడా ఇవ్వలేదని, 25 ఏండ్లుగా ఒకే పార్టీ ఉంటున్న చరిత్ర తనదని, 25 ఏండ్లలో 5-6సార్లు పార్టీ మారిన చరిత్ర రేవంత్దని దుయ్యబట్టారు. ఊసరవెళ్లి కూడా రేవంత్ను చూస్తే సిగుపడుతుందని ఎద్దేవా చేశారు.
నిన్ను, నీ పాలనను జనం చీదరించుకోవడం కాదు, నీ సొంత పార్టీ ఎమ్మెల్యేలే చీదరించుకుంటున్నరు. నిజాలు మాట్లాడితే పిచ్చి కుకలు అంటవా? వారు లేకుంటే నీకు సీఎం కుర్చీ ఎకడిది? మూడేండ్లలో ఎవరు పిచ్చికుకనో ప్రజలకు అర్థమైంది. అధికారం ఉంది కదా అని విర్రవీగకు రేవంత్రెడ్డి
– హరీశ్రావు
జలద్రోహంపై చర్చకు సిద్ధమా?
ఏపీలోని కుప్పానికి కృష్ణా జలాలు తరలిపోతుంటే.. పాలమూరు రైతులు కన్నీళ్లు పెట్టుకోవాలా? తెలంగాణ నీటి హకులను కాలరాస్తూ చంద్రబాబు ఏజెంట్గా వ్యవహరిస్తున్న రేవంత్రెడ్డి, సిద్దిపేట సభలో అబద్ధాలతో ప్రజలను తప్పుదోవ పట్టిస్తున్నారని హరీశ్ రావు ధ్వజమెత్తారు. తెలంగాణకు జరిగిన జలద్రోహంపై అసెంబ్లీలో చర్చకు సిద్ధమా? 299:512 నీటి వాటాల విషయంలో బీఆర్ఎస్ సంతకం చేసిందని నిరూపిస్తే తన పదవికి రాజీనామా చేస్తానని, నిరూపించలేకపోతే సీఎం పదవికి రేవంత్రాజీనామా చేయాలని సవాల్ విసిరారు. ‘మూడేండ్ల పాలనలో అన్ని విధాలా వైఫల్యం చెంది, సమస్యల పరిషారంలో చేతులెత్తేసి, నీళ్లు ఎత్తిపోయక తెలంగాణను కరువు పాలు చేసి.. ఆంధ్రా నీటి దొంగతనానికి లోపాయికారిగా సహకరించి ఈ మొత్తం భ్రష్టత్వం నుంచి దృష్టి మళ్లించేందుకు చేసిన ముష్టి, కుష్టు, నికృష్ట ప్రయత్నమే సిద్దిపేట సభ’ అని దుయ్యబట్టారు.

రేవంత్కు కలలో కూడా కేసీఆర్
సీఎం రేవంత్రెడ్డికి కలలో కూడా కేసీఆర్ కలవరపెడుతున్నాడేమోనని హరీశ్రావు ఎద్దేవా చేశారు. సిద్దిపేట సభలో 63సార్లు కేసీఆర్ పేరు, 53 సార్లు తన పేరు, 24 సార్లు కేటీఆర్ పేరు తీశారని చెప్పారు. ‘నా పొడుగు, కేటీఆర్ గడ్డం గురించి వికృత వ్యాఖ్యలు చేయడం కోసం బోలెడంత ప్రజల సొమ్ము వ్యర్థం చేసి, సిద్దిపేట దాకా రావాల్నా? ఆ డ్రైనేజీ ఉపన్యాసం కోసం అంతదూరం రావాల్నా? ప్రజల ముందు నిన్ను నగ్నంగా నిలబెడుతున్నామని, నీ చేతగానితనాన్ని బట్టబయలు చేస్తున్నామనే కదా నీకు నామీద కసి. ఆ ఫ్రస్ట్రేషన్ అంతా వెల్లగకడం కోసం నీకో బహిరంగ సభ కావాల్సి వచ్చింది’ అని రేవంత్పై నిప్పులు చెరిగారు. బీజేపీని ప్రశ్నించే ధైర్యం లేదా? అని నిలదీశారు.
నాడు బాబు డబ్బు సంచులతో రెడ్ హ్యాండెడ్గా దొరికిన దొంగ. నేడు బాబు జల దోపిడిలో చేతులు కలిపిన ఇంటి దొంగ. కోవర్టు, సబ్వర్ట్, పర్వర్ట్ ఈ రేవంత్రెడ్డి. కోవర్టు అంటే.. శత్రువుతో చేతులు కలిపినోడు. సబ్వర్ట్ అంటే వ్యవస్థను భ్రష్టు పట్టించేవాడు. పర్వర్ట్ అంటే వికృత మనస్తత్వం ఉన్నవాడు.
– హరీశ్రావు
నీ ద్రోహ బుద్ధిని బయటపెడ్తా..
తాము నిలదీసిన ప్రతిసారీ బ్యాక్డేట్ వేసి లేఖలు విడుదల చేయడం తప్ప మీకు చిత్తశుద్ధి లేదా? అని హరీశ్రావు నిలదీశారు. నాడు బనకచర్ల, ఇప్పుడు సాగర్ టన్నెల్ విషయంలో బ్యాక్డేట్ వేసిన లెటర్ చూపి తప్పించుకుంటున్నారని మండిపడ్డారు. కృష్ణాకు 700 కిలోమీటర్ల దూరంలో ఉన్న కుప్పానికి నీళ్లు ఎలా వెళ్లాయి? పాలమూరుకు ఎందుకు రావడం లేదని హరీశ్రావు ప్రశ్నించారు. ఇది రేవంత్రెడ్డి ద్రోహం వల్ల కాదా? అసెంబ్లీ పెట్టు ఆధారాలతో బట్టబయలు చేస్తానని స్పష్టంచేశారు.
గురుదక్షిణ చెల్లించేందుకు వెయ్యి టీఎంసీల నీళ్లను ఏపీకి వదిలిపెట్టింది నువ్వు కాదా? ప్రాజెక్టులకు నీళ్లెత్తకుండా రైతులకు అన్యాయం చేస్తున్నది ఎవరు? అసలు కృష్ణా జలాల్లో తెలంగాణకు ద్రోహం చేసింది కాంగ్రెస్ పార్టీయే. 299:512 నిష్పత్తితో తెలంగాణకు అన్యాయం చేసింది కాంగ్రెస్ కాదా? ఇప్పుడు అబద్ధాలు మాట్లాడుతూ బీఆర్ఎస్పై నిందలు వేస్తారా? వాటాల విషయంలో మేం సంతకం పెట్టామని నిరూపిస్తే నా పదవికి రాజీనామా చేస్తానని, నిరూపించలేకపోతే సీఎం పదవికి రాజీనామాకు రేవంత్ సిద్ధమా?
– హరీశ్రావు
గొప్ప మానవతావాది కేసీఆర్
మదన్మోహన్ గురించి మాట్లాడే నైతికత రేవంత్రెడ్డికి లేదని హరీశ్రావు స్పష్టంచేశారు. తన సొంత డబ్బులతో సిద్దిపేట నియోజకవర్గంలో ఆయన కాంస్య విగ్రహాన్ని పెట్టానని చెప్పారు. కేసీఆర్ కట్టించిన మెడికల్ కాలేజీకి ఆయన పేరు పెట్టినవు రేవంత్ ఏమైనా కట్టించారా? అని ప్రశ్నించారు. ముత్యంరెడ్డికి క్యాన్సర్ వస్తే రెండు కోట్లు ఖర్చు పెట్టి అమెరికాలో చికిత్స అందించిన గొప్ప మానవతావాది కేసీఆర్ అని గుర్తుచేశారు. శంకరమ్మకు ఎమ్మెల్యే టికెట్ ఇచ్చి నిలబెడితే ఓడించింది ఉత్తమ్కుమార్రెడ్డి కాదా? నిజంగా ప్రేమ ఉంటే ఎమ్మెల్సీ సీటు ఇవ్వాలని డిమాండ్ చేశారు. రేవంత్ తనను తాటిచెట్టుతో పోల్చారని కానీ, రేవంత్రెడ్డి మాత్రం గన్నేరుచెట్టు అని హరీశ్రావు విమర్శించారు. తాడిచెట్టుతో ఎంత ఉపయోగం.. గన్నేరు చెట్టంతా విషమేనని చెప్పారు.
రేవంత్రెడ్డిది మిడిసిపాటు : మధుసూదనాచారి
హైదరాబాద్, నవంబర్ 20 (నమస్తే తెలంగాణ) : ఎదిగినకొద్దీ ఒదిగి ఉండాలనే పెద్దల మాటలను పెడచెవిన పెట్టిన సీఎం రేవంత్రెడ్డి.. మిడిసిపడుతూ రోజురోజుకూ దిగజారుతున్నారని మండలిలో ప్రతిపక్షనేత మధుసూదనాచారి విమర్శించారు. ప్రజాధనంతో సభలు ఏర్పాటుచేసి, కేసీఆర్, ఆయన కుటుంబంపై వ్యక్తిగత విమర్శలకు దిగడం తప్ప ప్రజలకు ఒరగబెట్టింది ఏమీ లేదని మండిపడ్డారు.

మాజీ మంత్రి హరీశ్ రావును విమర్శించడం ద్వారా ప్రజల్లో ఆయన స్థానాన్ని చేరిపేయలేరని స్పష్టంచేశారు. సిద్దిపేట అభివృద్ధికి మారు పేరు అని, ప్రజలతో పెనవేసుకొన్న ఆత్మీయ అనుబంధాలు, ఆప్యాయత, అనురాగాలకు హరీశ్రావు ప్రతీక అని కొనియాడారు. హరీశ్రావుతో పోటీపడాలనుకొంటే సిద్దిపేట అభివృద్ధితో రేవంత్ పోటీ పడాలని సూచించారు.
సీఎం రేవంత్ క్షమాపణ చెప్పాలి : సబితా ఇంద్రారెడ్డి
హైదరాబాద్, నవంబర్ 20 (నమస్తే తెలంగాణ): సిద్దిపేటలో జరిగిన సభలో చేసిన అనుచిత వ్యాఖ్యలకు సీఎం రేవంత్రెడ్డి తెలంగాణ సమాజానికి బేషరతుగా క్షమాపణలు చెప్పాలని మాజీ మంత్రి, ఎమ్మెల్యే సబితా ఇంద్రారెడ్డి డిమాండ్ చేశారు. ఇప్పటికైనా సీఎం తన బజారు భాషను మార్చుకొని హూం దాగా వ్యవహరించాలని ఒక ప్రకటనలో హితవు పలికారు. సీఎం స్థాయిలో సిద్దిపేట గడ్డపై రేవంత్రెడ్డి దిగజారుడు వ్యాఖ్య లు సిగ్గుచేటు అని మండిపడ్డారు. తెలంగాణ తొలి ముఖ్యమంత్రి కేసీఆర్, మాజీ మంత్రులు కేటీఆర్, హరీశ్రావుపై సీఎం ఉపయోగించిన భాషను, వ్యక్తిగత దూషణలను తీవ్రంగా ఖండిస్తున్నట్టు పేర్కొన్నారు.

పరిపాలన చేతకాక, ఎన్నికల్లో ప్రజలకిచ్చిన ఆరు గ్యారెంటీలు, ఇతర వాగ్దానాలను అమలు చేయలేక ప్రజల్లో పెరుగుతున్న వ్యతిరేకతను కప్పిపుచ్చుకోవడానికి సీఎం ఇలాంటి దిగజారుడు రాజకీయాలకు పాల్పడుతున్నారని ఆరోపించారు. సొంత పార్టీ నేతలనే ఎర్రగడ్డ ఆసుపత్రికి పంపాలని హెచ్చరించే స్థాయికి దిగజారారంటే కాంగ్రెస్ ప్రభుత్వంలో ఎంతటి అభద్రతాభావం, అంతర్గత కుమ్ములాటలు ఉన్నాయో అర్థమవుతోందని పేర్కొన్నారు. రాజకీయ విమర్శలు విధానాలపై ఉండాలని, కుటుంబ సభ్యులు, ఆడబిడ్డలను రాజకీయాల్లోకి లాగి చులకన చేసి మాట్లాడటమేంది? అని ప్రశ్నించారు.
రేవంత్ సిద్దిపేట సభ విఫలం : కొత్త ప్రభాకర్రెడ్డి
గజ్వేల్, నవంబర్ 20: పదిరోజుల ముందు నుంచే హడావుడి, హంగామా చేసినా సిద్దిపేట జిల్లా కేంద్రంలో సీఎం రేవంత్రెడ్డి గురువారం నిర్వహించిన సభ ఘోరంగా విఫలమైందని బీఆర్ఎస్ సిద్దిపేట జిల్లా అధ్యక్షుడు, దుబ్బాక ఎమ్మెల్యే కొత్త ప్రభాకర్రెడ్డి చెప్పారు. గురువారం సిద్దిపేట జిల్లా గజ్వేల్లోని ఎమ్మెల్యే క్యాంపు కార్యాలయంలో ఆయన మీడియాతో మాట్లాడారు. సిద్దిపేటలో సభ కోసం గ్లోబెల్స్ ప్రచారం చేశారని, రెండు డజన్ల మంది మంత్రులు, ఎమ్మెల్యేలు, నాలుగు జిల్లాల కలెక్టర్లు, అధికారులు, రాష్ట్రం మొత్తం పోలీసులతో హల్చల్ చేసినా సభ తుస్సుమన్నదని ఎద్దేవా చేశారు.

సిద్దిపేటను కేసీఆర్, హరీశ్రావు అభివృద్ధిలో గొప్పగా తీర్చిదిద్దితే, అవమానకర భాషతో అడ్డగోలుగా మాట్లాడి సీఎం రేవంత్రెడ్డి ప్రశాంత వాతావరణాన్ని కలుషితం చేసే ప్రయత్నం చేశారని ధ్వజమెత్తారు. మల్లన్నసాగర్, కొండపోచమ్మ సాగర్, రంగనాయకసాగర్ ప్రాజెక్టుల ప్రాంతాల్లో పూర్తికాని కాలువల నిర్మాణ పనులకు, భూసేకరణ బకాయిలకు, దుబ్బాక రింగ్రోడ్డు, పెండింగ్ కాలువల నిర్మాణాలకు సీఎం నిధులిస్తారని ఎంతో ఆశగా ఎదురుచూస్తే వాటికి ఒక్క రూపాయి ప్రకటించలేదని మండిపడ్డారు. కేసీఆర్ ఎప్పుడూ ఎంతో గొప్పగా ఉండేవారని, ఎక్కడికి పోయినా ముందుగానే ఎమ్మెల్యేలతో మాట్లాడి అక్కడి పరిస్థితులకు అనుగుణంగా నిధులు ప్రకటించి వేదిక మీదే జీవోలు, ఆర్డర్లు ఇచ్చే వారని గుర్తుచేశారు.
ఉమ్మడి జిల్లాకు ఒరిగిందేమీ లేదు : వంటేరు ప్రతాప్రెడ్డి
సిద్దిపేటలో సీఎం సభతో ఉమ్మడి మెదక్ జిల్లాకు ఒరిగిందేమీ లేదని బీఆర్ఎస్ నియోజకవర్గ ఇన్చార్జి వంటేరు ప్రతాప్రెడ్డి పేర్కొన్నారు. జిల్లాను కరువు ప్రాంతంగా ప్రకటించాలని డిమాండ్ చేస్తే కనీసం ఆ ప్రస్తావననే సీఎం తేలేదని ఆవేదన వ్యక్తంచేశారు. మల్లన్నసాగర్, కొండపోచమ్మ సాగర్, రంగనాయకసాగర్ ప్రాజెక్టులను నింపాలని డిమాండ్ చేస్తే ఎక్కడా ఆ ఉసే ఎత్తలేదని చెప్పారు.

రద్దుచేసిన రూ.180 కోట్ల గజ్వేల్ నిధులను విడుదల చేయాలని, మల్లన్నసాగర్ నిర్వాసితులకు రూ.385 కోట్లను ప్యాకేజీలు, పరిహారం ఇవ్వాలని కోరినా నిరాశే ఎదురైందని చెప్పారు. సమావేశంలో మున్సిపల్ చైర్పర్సన్ చందన, మాజీ ఏఎంసీ చైర్మన్ మాదాసు శ్రీనివాస్, వైస్ చైర్పర్సన్ పద్మాబాయి, మాజీ ఎంపీపీ అమరావతి, పట్టణ అధ్యక్షుడు నవాజ్మీరా తదితరులు పాల్గొన్నారు.
రేవంత్రెడ్డిది మోసాల చరిత్ర : జీవన్రెడ్డి
జగిత్యాల, నవంబర్ 20 (నమస్తే తెలంగాణ): ముఖ్యమంత్రి రేవంత్రెడ్డిది మోసాల చరిత్ర అని బీఆర్ఎస్ రాష్ట్ర ప్రధాన కార్యదర్శి టీ జీవన్రెడ్డి ఆరోపించారు. ప్రభుత్వపరంగా ఏదైన సమావేశం నిర్వహిస్తే రాష్ట్ర పరిస్థితులు, ప్రభుత్వం చేపడుతున్న అభివృద్ధి సంక్షేమ పథకాల గురించి వివరించాలి కానీ, సిద్దిపేట మీటింగ్ చూస్తే రేవంత్రెడ్డి ఇప్పటికీ ముఖ్యమంత్రి లాగా భావిస్తున్నట్టు కన్పించడం లేదని విమర్శించారు. ఆయన దృష్టిలో కేసీఆరే ముఖ్యమంత్రి, రేవంత్రెడ్డి ప్రతిపక్ష పార్టీ ముఖ్య నాయకుడిగా ఉన్నట్టు భావించాల్సి వస్తున్నదని అన్నారు. రాష్ట్రం ఒక వైపు తాగు, సాగునీరు లేక కరువుతో అల్లాడుతుందని, హైదరాబాద్ నగరంలో విద్యాలయాలన్నీ మూతపడుతున్నాయని తెలిపారు.

శుక్రవారం ఆయన జగిత్యాలలోని తెలంగాణ భవన్లో మీడియాతో మాట్లాడారు. బీఆర్ఎస్ లేకుంటే రాష్ట్రం ఎకడిదని, రేవంత్రెడ్డి ముఖ్యమంత్రి ఎలా అయ్యేవారని ప్రశ్నించారు. విమర్శ కూడా ఒక సహేతుకంగా ఉండాలని హితవుపలికారు. తెలంగాణ సాధనలో భాగంగా కేసీఆర్ పదవులను త్యాగం చేశారని తెలిపారు. హరీశ్రావు పాల వ్యాపారం చేస్తే తప్పేంటి అని, రేవంత్రెడ్డి మాదిరిగా భూముల బేరం చేస్తలేడు కదా? అని నిలదీశారు. మరోసారి కేసీఆర్, కేటీఆర్, హరీశ్రావుపై తిట్లదండకం ఎత్తుకుంటే ప్రజలు పాతాళంలో పాతేస్తారని రేవంత్ను హెచ్చరించారు.
రేవంత్ సర్కార్ ఎప్పుడైనా కూలిపోవచ్చు : పట్నం నరేందర్రెడ్డి
కోస్గి, నవంబర్ 20 : సీఎం రేవంత్రెడ్డి ప్రభుత్వం ఎప్పుడైనా కూలిపోవచ్చని కొడంగల్ మాజీ ఎమ్మెల్యే పట్నం నరేందర్రెడ్డి అన్నారు. ‘సీఎం రేవంత్రెడ్డి.. నువ్వు అభివృద్ధి చేస్తావని ప్రజలు ఆశపడి గెలిపించారు.. కానీ గద్దెనెక్కాక వారి ఆశలు అడియాశలు అయ్యేలా వాళ్ల బతుకులు రోడ్డున పడేలా కూల్చి వేతలు చేపట్టావు. ఎక్కడ చూసినా మీ కమీషన్ల కోసం బుల్డోజర్లతో క్రూరమైన పాలన కొనసాగిస్తున్నావు.. ఇక అతిత్వరలో నీ పార్టీ ఎమ్మెల్యేలే నిన్ను సీఎంగా దింపి ఇంటికి పంపిస్తారు’ అని పేర్కొన్నారు. నారాయణపేట జిల్లా కోస్గిలో శుక్రవారం ఆయన మీడియాతో మాట్లాడుతూ.. కరువు కాలంలో ప్రజాధనాన్ని వృథా చేస్తూ ఓ వైపు సీఎం రేవంత్రెడ్డి సభలు పెట్టడం ఎంత వరకు సబబు అని ప్రశ్నించారు.

ముఖ్యమంత్రికి ఓటమి భయం పట్టుకున్నదని, అందుకే సభలు నిర్వహిస్తూ బీఆర్ఎస్ ముఖ్య నేతలను టార్గెట్ చేస్తూ నిరాధార ఆరోపణలు చేస్తూ ప్రజలను మభ్యపెడుతున్నారని మండిపడ్డారు. రేవంత్రెడ్డి సిద్దిపేటలో సభ పెట్టి ఏం మాట్లాడుతారోనని ప్రజలు ఆశిస్తే.. మళ్లా పాడిందే పాట అన్నట్టు కేసీఆర్ పాలన.. కేటీఆర్ గడ్డం.. హరీశ్రావు ఎత్తు గురించి తప్ప పనికొచ్చే అంశం ఒక్కటీ లేదని దుయ్యబట్టారు. ప్రజాపాలనలో రాష్ట్రం అథోగతి పాలైందని అన్నారు. ఆరు గ్యారెంటల పేరుతో అధికారంలోకి వచ్చి నేడు వాటి ఊసే ఎత్తకుండా ప్రజలను తప్పుదోవ పట్టిస్తున్నారని మండిపడ్డారు. రాష్ట్రంలో కరువు కరాళనృత్యంతో అన్నదాతలు ఆగమైతుంటే వాటి మీద మాట్లాడాలన్న సోయి సీఎం రేవంత్రెడ్డికి లేదని ధ్వజమెత్తారు. కేసీఆర్ పోరాట ఫలితమే తెలంగాణ రాష్ట్రం ఏర్పాటైందని తెలిపారు.
రేవంత్వి దిగజారుడు రాజకీయాలు : చిరుమర్తి లింగయ్య
నార్కట్పల్లి నవంబర్ 20: రాష్ట్ర అభివృద్ధిని పూర్తిగా విస్మరించి, సభల్లో వ్యక్తిగత దూషణలతో కాలం వెల్లదీస్తున్న సీఎం రేవంత్రెడ్డిది దిగజారుడుతనమని నకిరేకల్ మాజీ ఎమ్మెల్యే చిరుమర్తి లింగయ్య ధ్వజమెత్తారు. నల్లగొండ జిల్లా నార్కట్పల్లి పట్టణంలోని తన క్యాంపు కార్యాలయంలో శుక్రవారం ఆయన మీడియాతో మాట్లాడారు. కేసీఆర్, కేటీఆర్, హరీశ్రావును దూషించేందుకు సిద్దిపేటలో సభ పెట్టాల్సిన అవసరమే లేదని, హైదరాబాద్లో ప్రెస్మీట్ పెడితే సరిపోయేదని పేర్కొన్నారు. రాష్ట్ర ప్రజల సంక్షేమం, అభివృద్ధిని మరచి తిట్ల పురణంతో దిగజారడం సీఎం రేవంత్రెడ్డికే చెల్లిందని విమర్శించారు.

గతంలో కేసీఆర్ నిర్మించిన ప్రాజెక్టుల్లో వరదనీటిని నింపలేని అసమర్థ ముఖ్యమంత్రి రేవంత్రెడ్డి అని మండిపడ్డారు. కోట్ల ప్రజాధనాన్ని దుర్వినియోగం చేస్తూ ఒంట్టెద్దు పోకడలతో సభలకే పరిమితమయ్యాడని విమర్శించారు. కేసీఆర్, కేటీఆర్, హరీష్రావుపై ఎలాంటి విమర్శలు చేసినా ఇక సహించేది లేదని, బీఆర్ఎస్ శ్రేణుల సత్తా ఏందో రుచి చూసిస్తామని హెచ్చరించారు. 420 హామీలు, ఆరు గ్యారెంటీలతో ప్రజలకిచ్చిన వాగ్దానం నిలబెట్టుకొని సత్తా చాటాలని డిమాండ్ చేశారు.
Read Today's Latest Telangana News in Telugu and Telugu News
- Tags
- BRS
- harish rao
- KCR
- Revanth Reddy
RELATED ARTICLES
తాజా వార్తలు
ట్రెండింగ్ వార్తలు
Vande Bharat Train | బంధువులను సాగనంపేందుకు వందే భారత్ రైలు ఎక్కిన 12 మంది.. తర్వాత ఏం జరిగిందంటే?
Watch: హాస్పిటల్ యజమానిని బెదిరించి రూ.10 లక్షలు వసూలు.. కాంగ్రెస్ నేత అరెస్ట్, పార్టీ నుంచి బహిష్కరణ
Watch: ‘బ్యాగ్లో గంజాయి పెడతా.. డ్రగ్స్ కేసులో ఇరికిస్తా’.. జంటను బెదిరించిన పోలీస్ అధికారి
Migratory birds | చిలికా సరస్సుకు ప్రత్యేక అతిథులు.. ఏకంగా 80 జాతుల వలసపక్షుల సందడి.. Video
China flies electric plane | 19 సీట్ల ఎలక్ట్రిక్ విమానం.. విజయవంతంగా నడిపి పరీక్షించిన చైనా

