Group-1 | నకిలీ అభ్యర్థి.. ఫేక్‌ హాల్‌టికెట్‌! ప్రిలిమ్స్‌ పాసే కాలేదు.. సెలెక్ట్‌ ఎలా?

Group-1 | గ్రూప్‌ -1లో డీఎస్పీ పోస్టుల భర్తీ అంశం కొత్త మలుపు తిరిగింది. ఒకే నంబర్‌ గల రెండు హాల్‌టికెట్లు జారీ చేశారంటూ వచ్చిన వార్తలపై టీజీపీఎస్సీ ఎట్టకేలకు స్పందించింది. ఒక అభ్యర్థి ఫేక్‌ అని.. ఫోర్జరీ హాల్‌టికెట్‌ను సమర్పించారని తేల్చింది.

• ‘ఒకే నంబర్‌ గల రెండు హాల్‌టికెట్లు’ ఉదంతంపై వివరణ ఇచ్చిన టీజీపీఎస్సీ
• డీజీపీ ఆఫీసులో ఫోర్జరీ హాల్‌టికెట్‌ను సమర్పించారని తేల్చిచెప్పిన కమిషన్‌
• మరి, పోలీసులు ఎందుకు గుర్తించలేదు?
• నిశ్రిత ఉదంతంపై అనుమానాలెన్నో!

Group-1 | హైదరాబాద్‌, అక్టోబర్‌ 1 (నమస్తే తెలంగాణ) : గ్రూప్‌ -1లో డీఎస్పీ పోస్టుల భర్తీ అంశం కొత్త మలుపు తిరిగింది. ఒకే నంబర్‌ గల రెండు హాల్‌టికెట్లు జారీ చేశారంటూ వచ్చిన వార్తలపై టీజీపీఎస్సీ ఎట్టకేలకు స్పందించింది. ఒక అభ్యర్థి ఫేక్‌ అని.. ఫోర్జరీ హాల్‌టికెట్‌ను సమర్పించారని తేల్చింది. డీఎస్పీ ఉద్యోగం వచ్చినట్టు ప్రచారం చేసుకుంటున్న దొంత నిశ్రిత అసలు ప్రిలిమ్స్‌ పాస్‌ కాలేదని, మెయిన్స్‌కు సెలెక్ట్‌ కాలేదని టీజీపీఎస్సీ అధికారులు ఒక ప్రకటనలో వెల్లడించారు. 240909088 హాల్‌టికెట్‌ నంబర్‌ ఆమెకు చెందినది కాదని ప్రకటించారు.

పైగా డీజీపీ కార్యాలయంలో సదరు అభ్యర్థి సమర్పించిన హాల్‌టికెట్‌ కూడా నకిలీదని, ఆమె వాదన నిజంకాదని ప్రకటించింది. 240909088 నంబర్‌ గల హాల్‌టికెట్‌ యెల్లబోయిన రుచితది మాత్రమేనని కమిషన్‌ తేల్చింది. ఇద్దరికి ఒకే హాల్‌టికెట్‌ కేటాయించారంటూ జరుగుతున్న ప్రచారమంతా అబద్ధమని వెల్లడించింది. తప్పుడు ప్రచారం చేసిన అభ్యర్థిపై చర్యలు తీసుకుంటామని హెచ్చరించింది. ఇలాంటి ప్రచారాన్ని అభ్యర్థులు నమ్మవద్దని కోరింది.

అయితే మొత్తం ఈ వ్యవహారంలో అనేక సందేహాలు, ప్రశ్నలు ఉత్పన్నమవుతున్నాయి. వాస్తవానికి గ్రూప్‌-1 పోస్టులంటే అంటే సివిల్‌ సర్వీసెస్‌ తర్వాత అంతటి ప్రాధాన్యత గల పోస్టులు. వాటికి ఎంపికైన వారికి నియామకపత్రాలిచ్చే విషయంలో అనేక జాగ్రత్తలు తీసుకోవాలి. జాగరూకతతో వ్యవహరించాలి. కానీ ఈ ప్రక్రియలో అనేక లోపాలు చోటుచేసుకున్నట్టు అర్ధమవుతున్నది. వాస్తవానికి టీజీపీఎస్సీ సహా రిక్రూట్‌మెంట్‌ ఏజెన్సీలు ఉద్యోగాలకు ఎంపికైన వారి వివరాలను సంబంధితశాఖలకు పంపిస్తాయి. ఆ తర్వాత ఆయాశాఖలే నియామకపత్రాలు జారీచేస్తాయి. ఈ ప్రక్రియలో కొన్ని శాఖల అధికారులు నిబంధనల ప్రకారం నడుచుకోవడం లేదని, ప్రొసీజరల్‌ లోపాలు ఉన్నాయని అనేక ఉదాహరణలు వెల్లడిస్తున్నాయి. తాజా ఉదంతంపైనా నిరుద్యోగులు, జేఏసీ నేతలు అనేక సందేహాలను వ్యక్తంచేస్తున్నారు.

ఈ ప్రశ్నలకు జవాబేది?

• అభ్యర్థి తండ్రి ఇచ్చిన సమాచారం ఆధారంగానే ‘నమస్తే తెలంగాణ’ కథనాన్ని ప్రచురించింది. అభ్యర్థి పేరు కానీ, హాల్‌టికెట్‌ నెంబర్‌ కానీ ఎక్కడా ప్రస్తావించలేదు. కానీ కథనం ప్రచురితమైన గంటల వ్యవధిలోనే.. 5లక్షల మంది పరీక్షార్థుల్లో ఫలానా అభ్యర్థియే నకిలీ అని అధికారులు ఎట్లా గుర్తించాన్నది మిలియన్‌డాలర్ల ప్రశ్న.
• సదరు అభ్యర్థి డీజీపీ కార్యాలయంలో హాల్‌టికెట్‌ను సమర్పించారని సాక్షాత్తు టీజీపీఎస్సీయే వెల్లడించింది. అసలు డీజీపీ కార్యాలయంలోనికి ఈ నకిలీ అభ్యర్థిని ఎలా అనుమతించారు? హాల్‌టికెట్‌ సరైనదా.. కాదా.. అని ఎందుకు సరిచూసుకోలేదు? హాల్‌టికెట్‌ మార్ఫింగ్‌ చేసినట్టు పోలీసు అధికారులు ఎందుకు పసిగట్టలేకపోయారు?
• సెప్టెంబర్‌ 25న గ్రూప్‌-1 ఫలితాలను ప్రకటించగా.. 26న ప్రధాన పత్రికలన్నింటిలో ఆమెకు డీఎస్పీ పోస్టు సాధించినట్టు పలు పత్రికల్లో పతాకశీర్షికతో వార్తలు ప్రచురితమయ్యాయి. కొందరు బంధువులు, మిత్రులు సామాజిక మాధ్యమాల్లో పోస్టులు కూడా పెట్టారు. అలా పత్రికల్లో వచ్చినప్పుడే అధికారులు ఎందుకు అప్రమత్తం కాలేదు? తప్పుడు ప్రచారం చేస్తుంటే అప్పుడే ఖండించకుండా ఎందుకు మిన్నకుండినట్టు?
• సెప్టెంబర్‌ 27న శిల్పకళావేదికలో నిర్వహించిన గ్రూప్‌ -1 నియామకపత్రాల పంపిణీ కార్యక్రమానికి హాజరైనట్టు సదరు అభ్యర్థి చెప్తున్నారు. ఈ అభ్యర్థిని ఎవరు ఆహ్వానించారు. లోపలికి ఎలా అనుమతించారు? ఈ విషయంపై పోలీసుశాఖ ఎందుకు స్పందించడంలేదు.? డీఎస్పీ అభ్యర్థులు కూర్చునేందుకు శిల్పకళావేదికలో ప్రత్యేకంగా ఒక బ్లాక్‌ను కేటాయించారు. ఈ బ్లాక్‌లోకి అదనంగా ఒక అభ్యర్థి వస్తే అధికారులు ఎందుకు గుర్తించలేకపోయారు?
• గ్రూప్‌ -1 నియామకపత్రాల జారీ కార్యక్రమానికి సాక్షాత్తు సీఎం రేవంత్‌ హాజరయ్యారు. అంటే పటిష్టమైన భద్రత ఏర్పాట్లుండాలి. ఇలాంటి కార్యక్రమానికి ఒక ఫేక్‌ అభ్యర్థిని ఎట్లా అనుమతించారు? పైగా గ్రూప్‌ -1 విజేతల వరుసలో కూర్చుంటే ఎందుకు గుర్తించలేదు ? సీఎం కార్యక్రమంలో సెక్యూరిటీ లోపాలుంటే ఎట్లా? సంఘ విద్రోహక శక్తులు చొరబడితే పరిస్థితేంటి?
• 35 మంది విజేతలకు ముఖ్యమంత్రి నేరుగా నియామకపత్రాలిచ్చారు. మిగతా అభ్యర్థులకు శాఖలవారీగా ఏర్పాటు చేసిన కౌంటర్ల ద్వారా నియామకపత్రాలిచ్చారు. డీఎస్పీగా ఎంపికైన వారికి పోలీసుశాఖ కౌంటర్‌ వద్ద నియామకపత్రాలిచ్చారు. ఈ కౌంటర్‌ వద్ద ఒక నియామకపత్రం కోసం ఇద్దరు వచ్చినట్టు, అక్కడే గొడవ జరిగినట్టు అభ్యర్థి చెప్తున్నారు. అసలు గొడవ జరిగిందా..లేదా? ఒకవేళ గలాటా జరిగితే అప్పుడే ఫేక్‌ అభ్యర్థిని ఎందుకు గుర్తించలేకపోయారు? అసలైన అభ్యర్థి ఎవరో ఎందుకు తేల్చలేదు ? గలాటా జరిగితే, ఫేక్‌ అని తేలితే ఎందుకు అరెస్టు చేయలేదు?
• అపాయింట్‌మెంట్‌ ఆర్డర్‌ విషయంపై తనకు అన్యాయం జరిగిందని పేర్కొంటూ సదరు అభ్యర్థి ఏకంగా జూబ్లీహిల్స్‌లోని సీఎం నివాసం ముందు బైఠాయించి నిరసన తెలిపారు. అప్పుడైనా ఆమె ఫేక్‌ హాల్‌టికెట్‌ను గుర్తించి ఉండాల్సింది. కానీ ఎందుకు అలా చేయలేకపోయారు? అప్పుడే ఎందుకు అరెస్టు చేయలేదు?
• తాను డీఎస్పీగా ఎంపికయ్యానంటూ నకిలీ హాల్‌టికెట్‌తో ఆమె డీజీపీ ఆఫీసులోకి కానీ, నియామక పత్రాల పంపిణీ కార్యక్రమం జరిగిన శిల్పకళావేదికలోకి కానీ ఎలా రాగలిగింది? ఎవరు అనుమతించారు? ఎవరు సహకరించారు?
• గ్రూప్‌ -1కు సెలెక్ట్‌ అయ్యి, అంతకంటే మంచి ఉద్యోగం సాధించినవారు లేదా అప్పటికే మంచి సర్వీసులో ఉన్నవారు అనాసక్తి ప్రదర్శిస్తే.. వారి స్థానంలో ఈ అభ్యర్థిని చొప్పించే ప్రయత్నం జరిగిందా? దీని వెనుక ఎవరైనా పెద్దల హస్తం ఉండి ఉంటుందా? అని నిరుద్యోగ జేఏసీ నేతలు సందేహాలు వ్యక్తంచేస్తున్నారు. నిజానిజాలు నిగ్గు తేల్చాలని వారు కోరుతున్నారు.
• తుది ఫలితాలు ప్రకటించిన తర్వాత టీజీపీఎస్సీ ఎంపికైన వారి హాల్‌టికెట్‌ నంబర్లు, అభ్యర్థి పేరు, ఫొటో, అప్లికేషన్‌ ఫాం, అభ్యర్థి ఫోన్‌ నంబర్లను సంబంధిత శాఖలకు పంపిస్తారు. వాటిని క్రాస్‌చెక్‌ చేసుకున్నాకే అభ్యర్థులను లోనికి అనుమతిస్తారు. టీజీపీఎస్సీ పంపిన వివరాలను కనీసంగా సరిపోల్చుకున్నా, నకిలీ ఎవరో తేలిపోయేది. కానీ అందుకు భిన్నంగా నకిలీ అభ్యర్థి శిల్పకళావేదికలోకి ఎలా రాగలిగారు?