వర్సిటీలకు సర్కారు దన్ను

మారుమూల గ్రామీణ ప్రాంత విద్యార్థులకు ఉన్నత విద్యను అందించాలనే ఉద్దేశంతో ఏర్పాటు చేసిన యూనివర్సిటీలకు రాష్ట్ర ప్రభుత్వం అండగా ఉంటున్నది.

• బడ్జెట్‌లో రూ.500 కోట్లు కేటాయింపు
• చిన్న వర్సిటీలకే తొలి ప్రాధాన్యం
• మెరుగుపడనున్న మౌలిక వసతులు
• బ్లాక్‌గ్రాంట్‌కు అదనంగా నిధులు

హైదరాబాద్‌, ఫిబ్రవరి 19 (నమస్తే తెలంగాణ): మారుమూల గ్రామీణ ప్రాంత విద్యార్థులకు ఉన్నత విద్యను అందించాలనే ఉద్దేశంతో ఏర్పాటు చేసిన యూనివర్సిటీలకు రాష్ట్ర ప్రభుత్వం అండగా ఉంటున్నది. నిధుల కొరత రాకుండా పలు జాగ్రత్తలు తీసుకొంటున్నది. 2023-24 బడ్జెట్‌లో యూనివర్సిటీలకు రూ.500 కోట్లు కేటాయించడం ఇందుకు నిదర్శనమని ప్రభుత్వ వర్గాలు పేర్కొంటున్నాయి. ఈ పద్దులో సింహభాగం చిన్న వర్సిటీలకే కేటాయించే అవకాశాలు ఉన్నాయని తెలిసింది. హాస్టళ్లు, ఇతర మౌలిక వసతుల కల్పన కోసం పలు వర్సిటీలు ప్రతిపాదనలు రూపొందించి ప్రభుత్వానికి అందజేయగా ఈ మొత్తాన్ని కేటాయించింది.

ఉమ్మడి రాష్ట్రంలో అప్పటి సర్కారు నల్లగొండలో మహత్మాగాంధీ, మహబూబ్‌నగర్‌లో పాలమూరు, నిజామాబాద్‌లో తెలంగాణ, కరీంనగర్‌లో శాతవాహన వర్సిటీలను ఏర్పాటు చేసింది. చిన్న చిన్న భవనాలు నిర్మించి మౌలిక వసతులను విస్మరించింది. అప్పటి ప్రభుత్వాలు బ్లాక్‌గ్రాంట్‌ మినహా పెద్దగా నిధులిచ్చిన దాఖలాలు లేవు. ఈ నేపథ్యంలో ఉన్నత విద్యకు అధిక ప్రాధాన్యం ఇస్తూ బీఆర్‌ఎస్‌ సర్కారు తాజా బడ్జెట్‌లో రూ.500 కోట్లు కేటాయించింది. బ్లాక్‌గ్రాంట్‌కు అదనంగా ఈ నిధులను పొందుపరిచింది. నిధుల కేటాయింపు నేపథ్యంలో అధికారులు ఇటీవల వర్సిటీల అభివృద్ధికి ప్రణాళికలను సిద్ధం చేసి ప్రభుత్వానికి సమర్పించారు.

ప్రతిపాదనలిలా..

• నిజామాబాద్‌లోని తెలంగాణ వర్సిటీలో రెండు కొత్త హాస్టళ్ల నిర్మాణానికి రూ.50 కోట్లు కేటాయించే అవకాశం. పాలమూరు వర్సిటీకి రూ.45 కోట్లు కేటాయించనున్నట్టు తెలిసింది.
• నల్లగొండ మహత్మాగాంధీ వర్సిటీకి రూ.49 కోట్లు కేటాయించాలని అధికారులు ప్రతిపాదనలు సమర్పించారు. వీటితో హాస్టళ్లు, పరిపాలన భవన నిర్మాణం, అకడమిక్‌, మెస్‌ వంటి వాటిని నిర్మించనున్నారు.
• కరీంనగర్‌ శాతవాహన వర్సిటీకి బ్లాక్‌గ్రాంట్‌కు అదనంగా రూ.50 కోట్లు ఇవ్వాలని ప్రతిపాదించారు. ఇటీవల వర్సిటీకి 12బీ హోదా దక్కడంతో వర్సిటీని మరింత అభివృద్ధి చేసేందుకు నిధులు ఇవ్వాలని విజ్ఞప్తి చేశారు.
• ఉస్మానియా వర్సిటీకి రూ.120 కోట్లు కేటాయించాలని అధికారులు ప్రతిపాదించారు. దీంట్లో రూ.80 కోట్లు ఇచ్చేందుకు అధికారులు సముఖత వ్యక్తం చేసినట్టు సమాచారం.
• కూకట్‌పల్లి జేఎన్టీయూహెచ్‌ క్యాంపస్‌కు ఇప్పుడున్న స్థలం చాలడం లేదు. కొత్తగా కాలేజీ, హాస్టల్‌ నిర్మించాలంటే స్థలం కోసం వెతకాల్సి వస్తున్నది. ఈ నేపథ్యంలో కొత్త క్యాంపస్‌ నిర్మాణానికి 500 ఎకరాలు, దీనికి కావాల్సిన నిధులను కేటాయించాలని ఇటీవల వర్సిటీ అధికారులు ప్రతిపాదించారు.
• కాకతీయ వర్సిటీ పరిధిలోని కొత్తగూడెం ఇంజినీరింగ్‌ కాలేజీలో హాస్టళ్లు, అకడమిక్‌ బ్లాక్‌, ల్యాబ్‌ల నిర్మాణానికి రూ.50 కోట్లు, హనుమకొండలోని వర్సిటీ క్యాంపస్‌లో 500 మంది విద్యార్థుల సామర్థ్యం గల హాస్టల్‌, ప్రహరీ నిర్మాణానికి రూ.30 కోట్లు కేటాయించాలని కోరారు.

కరెంటు బిల్లు భారం తగ్గించుకొనేందుకు..

ఏటా విద్యుత్తు బిల్లులు భారంగా మారుతుండటంతో పలు వర్సిటీలు సోలార్‌ను ఎంచుకొంటున్నాయి. ఇప్పటికే జేఎన్టీయూ సుల్తాన్‌పూర్‌ క్యాంపస్‌లో 4 మెగావాట్ల భారీ సోలార్‌ ప్లాంట్‌ను నెలకొల్పారు. ఫలితంగా విద్యుత్తు బిల్లు భారీగా తగ్గిపోయింది. మహత్మాగాంధీ వర్సిటీలోను 60 కిలోవాట్స్‌ విద్యుత్తు ప్లాంట్‌ వినియోగంలో ఉండగా, ఉస్మానియా యూనివర్సిటీలో కూడా భారీ సోలార్‌ ప్లాంట్‌ ఏర్పాటు చేసేందుకు ప్రయత్నాలు ప్రారంభమయ్యాయి. పలు వర్సిటీలు సైతం రూఫ్‌టాప్‌ సోలార్‌ ప్లాంట్‌ ఏర్పాటుకు ముమ్మరంగా ప్రయత్నాలు చేస్తున్నాయి.