విలీనం సులభమేనా.. ఎస్సెస్సీ, ఇంటర్‌ బోర్డులపై సర్కార్‌ కసరత్తు

రాష్ట్రంలో ఎస్సెస్సీ, ఇంటర్‌బోర్డుల విలీనంపై సర్కార్‌ తీవ్రంగా కసరత్తు చేస్తున్నది. 2026-27 విద్యాసంవత్సరంలో రెండు బోర్డులను విలీనం చేయాలన్న సంకల్పంతో ముందుకు సాగుతున్నారు.

• న్యాయ నిపుణులతో అధికారుల సంప్రదింపులు
• కోర్టుకు వెళుతామంటున్న అధ్యాపక సంఘాల నేతలు

హైదరాబాద్‌, మే 7 (నమస్తే తెలంగాణ) : రాష్ట్రంలో ఎస్సెస్సీ, ఇంటర్‌బోర్డుల విలీనంపై సర్కార్‌ తీవ్రంగా కసరత్తు చేస్తున్నది. 2026-27 విద్యాసంవత్సరంలో రెండు బోర్డులను విలీనం చేయాలన్న సంకల్పంతో ముందుకు సాగుతున్నారు. రెండు బోర్డుల విలీనమంటే విద్యావ్యవస్థను దశాబ్దాలు వెనక్కి నెట్టడమే అవుతుందని అధ్యాపకులు ఆందోళన వ్యక్తం చేస్తున్నారు. సర్కార్‌ మొండిగా ముందుకెళితే కోర్టుకు వెళుతామంటూ హెచ్చరిస్తున్నారు.

తలెత్తుతున్న ప్రశ్నలివే..

• ఇంటర్‌ బోర్డును ఏర్పాటు చేస్తూ ప్రభుత్వం చట్టం చేసింది. విలీనం చేయాలంటే మళ్లీ ఇప్పుడు అసెంబ్లీలో చట్టం చేయాలి.
• ఇంటర్‌ బోర్డు అటానమస్‌ సంస్థ. పరీక్షల విభాగం ప్రభుత్వ ఆధీనంలో ఉన్నది. పరీక్షల విభాగంలో బోర్డును విలీనం చేస్తారా?
• కాలేజీలకు అనుమతులు, పాఠ్య పుస్తకాలు, సిలబస్‌ రూపకల్పన, పరిపాలన, ప్రైవేట్‌ కాలేజీల నియంత్రణ, పరీక్షలు, రిజల్ట్స్‌ పనులను ఇంటర్‌ బోర్డు పర్యవేక్షిస్తున్నది. ఇవే పనులు పాఠశాల విద్యాశాఖ, ఎస్సీఈఆర్టీ, ప్రభుత్వ పరీక్షల విభాగాలు చూస్తున్నాయి. విలీనం చేస్తే ఎవరు పర్యవేక్షణ చేస్తారు.
• సర్కార్‌ బడుల్లో ఇంటర్‌ను ప్రారంభించాలని ప్రభుత్వం యోచిస్తున్నది. 100 తెలంగాణ పబ్లిక్‌ స్కూల్స్‌లో ఇంటర్‌ విద్యను ప్రవేశపెట్టనున్నారు. సర్కార్‌ స్కూళ్లల్లోని స్కూల్‌ అసిస్టెంట్‌లు ఇంటర్‌ క్లాసులను బోధించగలరా? టీచర్లు బోధించబోమంటే లెక్చరర్లను ఎక్కడి నుంచి తెస్తారు.
• ఎవరైనా టీచర్‌ మేం ఇంటర్‌కు బోధించబోమని కోర్టుకు వెళితే.. కోర్టు అనుమతించకపోతే పరిస్థితేంటి?
• ఇంటర్‌ విద్యలో పనిచేసే ఉద్యోగుల సర్వీస్‌ రూల్స్‌, విద్యాశాఖలోని బోధన, బోధనేతర సిబ్బంది సర్వీస్‌ రూల్స్‌ వేరుగా ఉంటాయి. వీటిని ఎలా సర్దుబాటు చేస్తారు.

ప్రైవేట్‌ సంస్థలకు మేలు చేసేందుకే..

నాణ్యమైన చదువులకు ఇంటర్‌ విద్య కేరాఫ్‌. కేరళ సహా అనేక రాష్ర్టాల్లో ఇంటర్‌ బోర్డు సక్సెస్‌కు చిహ్నం. ఇంటర్‌బోర్డుకు మరణశాసనం రాయడాన్ని మేం అంగీకరించం. ఏ, బీ, సీ, డీలు తెలియని వారు చెబితే ఇంటర్‌ బోర్డును రద్దు చేస్తారా? ఇది విద్యార్థుల భవిష్యత్తును నాశనం చేసే చర్య. రాజస్థాన్‌లోని కోటా విద్యాసంస్థల్లా మన విద్యా వ్యవస్థను తయారు చేస్తున్నారు. సీఎం రేవంత్‌రెడ్డిని విద్యాశాఖ కార్యదర్శి యోగితారాణా తప్పుదోవ పట్టిస్తున్నరు. ఇంటర్‌ బోర్డు పరిరక్షణకు మరో పోరాటానికి సిద్ధం.- మధుసూదన్‌రెడ్డి, ఇంటర్‌ విద్యా జేఏసీ