స్పెషాలిటీ వైద్యం పటిష్ఠం దిశగా!

ప్రభుత్వ దవాఖానల్లో స్పెషాలిటీ, సూపర్‌ స్పెషాలిటీ వైద్యసేవలను మరింత బలోపేతం చేయడంపై రాష్ట్ర ప్రభుత్వం దృష్టి సారించింది. రాష్ట్రంలోని ప్రాథమిక ఆరోగ్య కేంద్రాల్లో (పీహెచ్‌సీ) పనిచేస్తున్న నిపుణులైన వైద్యులను టీచింగ్‌, జిల్లా, ఏరియా దవాఖానలకు శాశ్వతంగా

పీహెచ్‌సీల్లో పనిచేస్తున్న 291 మంది డాక్టర్ల బదిలీ
అసిస్టెంట్‌ ప్రొఫెసర్లుగా నియామకం
బలోపేతం కానున్న టీచింగ్‌ దవాఖానలు
పేదల చెంతకు మరిన్ని స్పెషాలిటీ సేవలు

హైదరాబాద్‌, ఫిబ్రవరి 19 : ప్రభుత్వ దవాఖానల్లో స్పెషాలిటీ, సూపర్‌ స్పెషాలిటీ వైద్యసేవలను మరింత బలోపేతం చేయడంపై రాష్ట్ర ప్రభుత్వం దృష్టి సారించింది. రాష్ట్రంలోని ప్రాథమిక ఆరోగ్య కేంద్రాల్లో (పీహెచ్‌సీ) పనిచేస్తున్న నిపుణులైన వైద్యులను టీచింగ్‌, జిల్లా, ఏరియా దవాఖానలకు శాశ్వతంగా బదిలీ (అబ్జార్‌ప్షన్‌) చేయాలని నిర్ణయించింది. డైరెక్టర్‌ ఆఫ్‌ పబ్లిక్‌ హెల్త్‌ (డీపీహెచ్‌) పరిధిలోని 291 మంది వైద్యులను తెలంగాణ వైద్య విధాన పరిషత్తు (టీవీవీపీ) పరిధిలోకి బదిలీ చేసి, అసిస్టెంట్‌ ప్రొఫెసర్లుగా నియమించింది.

• పీహెచ్‌సీల్లో వైద్యసేవలు అందించేందుకు ఎంబీబీఎస్‌ డాక్టర్లు సరిపోతారు. కానీ కొన్ని పీహెచ్‌సీలలో స్పెషలిస్ట్‌, సూపర్‌ స్పెషలిస్ట్‌ డిప్లొమా ఉన్న డాక్టర్లు పనిచేస్తున్నారు. వారిని టీవీవీపీ పరిధిలోకి తీసుకోవడంతో సామర్థ్యానికి తగ్గట్టు సేవలు అందించేందుకు వీలవుతుంది. బదిలీ అయినవారి స్థానంలో ఎంబీబీఎస్‌ డాక్టర్లకు పీహెచ్‌సీలలో ఉద్యోగావకాశాలు లభించనున్నాయి.
• రాష్ట్రంలో కొత్తగా నిర్మిస్తున్న వైద్య కళాశాలలు, వాటి అనుబంధ దవాఖానల్లో నిపుణుల సేవలు ఎంతో అవసరం. పీహెచ్‌సీల నుంచి బదిలీ అవుతున్న స్పెషలిస్టులు ఈ కొరతను తీర్చనున్నారు. పేదలకూ స్పెషాలిటీ సేవలు పెరుగనున్నాయి.
• డీపీహెచ్‌తో పోల్చితే టీవీవీపీ పరిధిలో పనిచేస్తున్న వైద్యుల జీతాలు ఎక్కువ. స్పెషాలిటీ వైద్యులను అబ్జార్‌ప్షన్‌ చేసుకోవడం ద్వారా వారి సామర్థ్యానికి తగిన పని, వేతనం లభిస్తుంది. డీపీహెచ్‌లో పదోన్నతులకు అవకాశం చాలా తక్కువ. టీవీవీపీలో పనిచేసేవారు నైపుణ్యాలను మెరుగుపరుచుకుంటూ, వేగంగా పదోన్నతులు పొందే అవకాశం ఉంటుంది.