బయ్యారంలో నాణ్యమైన ఖనిజం

బయ్యారం స్టీల్‌ప్లాంటుపై కేంద్రమంత్రి కిషన్‌రెడ్డి పచ్చి అబద్ధాలు మాట్లాడారు.

• ఓబుళాపురం ఖనిజం కంటే ఇక్కడే నాణ్యత ఎక్కువ ఉన్నది
• మైనింగ్‌ శాఖ చెప్పిన మాట ఇది
• ఇనుప ఖనిజం నాణ్యత లేదని మంత్రి కిషన్‌రెడ్డి దుష్ప్రచారం
• నాణ్యత లేనిది ఖనిజానికా.. కేంద్ర ప్రభుత్వానికా?
• నాణ్యత లేకుంటే కోట్ల టన్నుల ఖనిజాన్ని.. ప్రైవేటు కంపెనీలు ఎందుకు తవ్వుకుపోయాయి?

ఇల్లెందు, అక్టోబర్‌ 3: బయ్యారం స్టీల్‌ప్లాంటుపై కేంద్రమంత్రి కిషన్‌రెడ్డి పచ్చి అబద్ధాలు మాట్లాడారు. బయ్యారంలో ఇనుప ఖనిజం నాణ్యతపై ఆయనకు ఏమాత్రం అవగాహన లేదని ఉమ్మడి ఆంధ్రప్రదేశ్‌లో ఇక్కడ ప్లాంటు ఏర్పాటుపై జరిగిన పరిణామాలే రుజువు చేస్తున్నాయి. ఓబుళాపురం కంటే ఇక్కడే నాణ్యమైన ఖనిజం ఉన్నదని గతంలో మైనింగ్‌ శాఖ అధికారులే తేల్చారు. ప్లాంటు ఏర్పాటుకు సరిపడా స్థలం లేదన్న కిషన్‌రెడ్డి వాదన కూడా పచ్చి అబద్ధం. ప్లాంటు ఏర్పాటుకు 400 ఎకరాల భూమి సరిపోతుందని 2009లోనే అప్పటి వరంగల్‌ జిల్లా కలెక్టర్‌ ప్రభుత్వానికి నివేదిక పంపటం, దాని ఆధారంగా ప్లాంటు ఏర్పాటుకు రక్షణ స్టీల్స్‌తో ప్రభుత్వం ఒప్పందం కుదుర్చుకోవటం మన కండ్లముందు ఉన్న వాస్తవం.

బయ్యారంలో ప్లాంటు ఏర్పాటుపై ఎప్పుడు ఏం జరిగింది?

• ఆగస్టు, 2008లో మైనింగ్‌శాఖ బయ్యా రం గనులను సర్వే చేసింది. రిజర్వు ఫారెస్టులో ఉన్న ఇనుపరాయి అత్యంత నాణ్య త కలిగినదిగా గుర్తించింది. ఓబుళాపురం ఇనుప ఖనిజం కంటే ఇక్కడ 60 ప్లస్‌ నాణ్యత ఉన్నదని నిగ్గుతేల్చారు. మైదాన ప్రాంతంలో కాస్త నాణ్యత తగ్గుతుందని తెలిపారు.
• ఫిబ్రవరి, 2009లో అప్పటి వరంగల్‌ జిల్లా కలెక్టర్‌ శ్రీధర్‌బాబు బయ్యారం ఇనుప ఖనిజంపై ప్రభుత్వానికి నివేదిక పంపారు. ఇక్కడ ఫ్యాక్టరీ నిర్మాణానికి 400 ఎకరాలు సరిపోతుందని నివేదికలో స్పష్టం చేశారు. అన్ని విధాలుగా ప్లాంట్‌కు కావల్సిన ముడిసరుకు సమీపంలోనే లభిస్తుందని చెప్పారు. దీంతో నాటి ముఖ్యమంత్రి ఏమాత్రం ఆలస్యం చేయకుండా ప్లాంటు ఏర్పాటుకు రక్షణ స్టీల్‌తో ఒప్పందం చేసుకొన్నారు. దీనిని బట్టే కిషన్‌రెడ్డి మాటలు పచ్చి అబద్ధాలేనని తేటతెల్లమవుతున్నది.
• ఇక్కడ ఖనిజం అత్యంత నాణ్యమైనది కనుకనే విశాఖకు తరలించేందుకు ప్రభు త్వం కుట్ర పన్నుతున్నదనే విమర్శలు ఉన్నాయి. ఇప్పటివరకు బయ్యారం ఖనిజాన్ని దోచుకెళ్లిన ప్రైవేట్‌ వ్యక్తులు మార్కెట్‌లో టన్నును రూ.4,500 చొప్పున అమ్మినట్టు తెలుస్తున్నది.
• సింగరేణి బొగ్గుగనుల అన్వేషణలో భాగం గా సర్వే ఆఫ్‌ ఇండియా 1956లో బయ్యారంలో ఇనుప ఖనిజాన్ని కనుగొన్నది. ఆ మరుసటి సంవత్సరమే సీమాంధ్ర పెట్టుబడిదారులు రంగంలోకి దిగారు. అప్పటి నుంచి మొన్నటి రక్షణ స్టీల్స్‌ వరకు ఇక్కడి ఖనిజాన్ని తరలించుకుపోతూనే ఉన్నారు. క్వాలిటీ లేకపోతే ఈ పెట్టుబడిదారులు సంవత్సరాల తరబడి ఖనిజాన్ని ఎందుకు తరలించుకుపోతున్నారు?
• 25.06.1957లో చౌదరి మైనింగ్‌ కంపెనీ 607.44 హెక్టార్ల భూమిని లీజుకు తీసుకొన్నది. 24.06.1977 వరకు ఇక్కడి ఖనిజాన్ని తరలించుకుపోయింది. 20 సంవత్సరాలపాటు నిరంతరాయంగా ఖనిజాన్ని ఈ కంపెనీ తరలించింది. సంవత్సరానికి పది లక్షల టన్నుల చొప్పున సుమారు 2 కోట్ల టన్నుల ముడి ఖనిజాన్ని ఈ కంపెనీ ఇతర ప్రాంతాలకు తరలించింది. సుమారు రూ.40 వేల కోట్ల సంపదను తరలించుకుపోయారని స్థానికులు ఆరోపిస్తున్నారు.
• 1980 నుంచి 1988 వరకు చౌదరి మైనింగ్‌ కంపెనీ 607.44 హెక్టార్ల భూమిని బయ్యారంలో లీజుకు తీసుకొని ఖనిజాన్ని పాల్వంచ స్పాంజ్‌ ఐరన్‌ కంపెనీతోపాటు ఇతర ప్రాంతాలకు తరలించింది. ఇలా రూ.16 వేల కోట్ల విలువైన 80 లక్షల టన్నుల ఖనిజాన్ని తరలించింది.
• 2005 నుంచి కృష్ణాజిల్లాకు చెందిన ఇద్దరు వ్యక్తులు ఇక్కడి నుంచి ఆమోద ఐరన్‌ ఇండస్ట్రీకి 2010 వరకు 50 లక్షల టన్నుల ఖనిజం తరలించారు. దీని విలువ సుమారు రూ.10 వేల కోట్లు.
• ఇంత సంపదను దోచుకెళ్లిన పెట్టుబడిదారులు స్థానిక కష్టజీవులకు టన్ను రాయిని పోగేస్తే ఇచ్చింది రూ.150 మాత్రమే. ప్రభుత్వానికి వారు కట్టేది రూ.155. రవాణాతో కలిపి మొత్తం రూ.500 ఖర్చు అవుతుంది. నాడు టన్నుకు రూ.2 వేల చొప్పున విలువ కట్టినా ఒక్క టన్నుకు వారికి మిగిలింది రూ.1500. ఇంత ఖనిజం తరలించుకుపోయినా కేంద్రమంత్రి కిషన్‌రెడ్డి మాత్రం బయ్యారం స్టీల్‌ప్లాంట్‌ ఏర్పాటు సాధ్యం కాదని చెప్తున్నారు.

బయ్యారంలో ఇనుప ఖనిజం క్యాలిటీ, క్వాంటిటీ లేదు. అక్కడ ప్లాంట్‌ నిర్మాణానికి సరిపడా భూమిలేదు. బయ్యారంలో స్టీల్‌ప్లాంట్‌ అసాధ్యం.
– కేంద్రమంత్రి కిషన్‌రెడ్డి

బయ్యారంలో ఇనుప ఖనిజం కర్ణాటక, ఏపీలో విస్తరించి ఉన్న ఓబుళాపురం ఖనిజం కంటే నాణ్యమైనది. ఇక్క 60 ప్లస్‌ శాతం నాణ్యత ఉన్నది.
-మైనింగ్‌ శాఖ

01.03.1965 నుంచి 08.01.1974 వరకు వీ కేశవరావు బయ్యారం మండలంలోని రాంచంద్రాపురం వద్ద 329.95 హెక్టార్ల భూమిని లీజుకు తీసుకొన్నారు. పది సంవత్సరాలపాటు 90 లక్షల టన్నులు తరలించుకుపోయారు. దాని విలువ సుమారు రూ.18 వేల కోట్లు.

01.03.1957 నుంచి 15.01.1974 వరకు లాల్‌ అండ్‌ కంపెనీ బయ్యారం మండల పరిధిలోని మెట్ల తిమ్మాపురం గ్రామంలో 647.10 హెక్టార్ల భూమి లీజుకు తీసుకొన్నది. 17 సంవత్సరాలపాటు కోటి 70 లక్షల టన్నుల ఖనిజాన్ని తరలించుకుపోయింది. దీని విలువ సుమారు రూ.33 వేల కోట్లు.