ఫిన్లాండ్‌లో 98% సర్కార్‌ స్కూళ్లే.. ఒకటి ఆపై తరగతులకు ఉచిత నిర్బంధ విద్య

ఫిన్లాండ్‌ (ఫిన్నిష్‌) విద్యావిధానం. ఇది ప్రపంచ ప్రఖ్యాతిగాంచిన విద్యావ్యవస్థ. ఈ దేశంలో 98% సర్కార్‌ స్కూళ్లే.. కేవలం 2% మాత్రమే ప్రైవేట్‌ స్కూళ్లుంటాయి. ఇంకా ఎన్నో ప్రత్యేకతలు గల ఈ దేశ విద్యావిధానాన్ని మన విద్యాశాఖ అధ్యయనం చేస్తున్నది. రాష్ర్టానికి చెందిన 40 మంది టీచర్లు, లెక్చరర్లు, అధికారులతో కూడిన బృందం ఫిన్లాండ్‌ దేశంలో పర్యటిస్తున్నది.

• ప్రతి పీరియడ్‌కూ 15 నిమిషాల విరామం

హైదరాబాద్‌, ఏప్రిల్‌ 26 (నమస్తే తెలంగాణ) : ఫిన్లాండ్‌ (ఫిన్నిష్‌) విద్యావిధానం. ఇది ప్రపంచ ప్రఖ్యాతిగాంచిన విద్యావ్యవస్థ. ఈ దేశంలో 98% సర్కార్‌ స్కూళ్లే.. కేవలం 2% మాత్రమే ప్రైవేట్‌ స్కూళ్లుంటాయి. ఇంకా ఎన్నో ప్రత్యేకతలు గల ఈ దేశ విద్యావిధానాన్ని మన విద్యాశాఖ అధ్యయనం చేస్తున్నది. రాష్ర్టానికి చెందిన 40 మంది టీచర్లు, లెక్చరర్లు, అధికారులతో కూడిన బృందం ఫిన్లాండ్‌ దేశంలో పర్యటిస్తున్నది. విద్యాశాఖ కార్యదర్శి డాక్టర్‌ యోగితారాణా, ఎస్సీఈఆర్టీ డైరెక్టర్‌ జీ రమేశ్‌, వెంకటేశ్వర్లు(డీఈవో), జ్యోత్స్న(ఇంటర్‌ విద్య), టీచర్లు వీ పద్మప్రియ, వుడుత మహేష్‌చంద్ర తదితరులున్నారు. ఐదు రోజుల పర్యటనలో భాగంగా ఈ బృందం పలు పాఠశాలలను సందర్శించి, అక్కడి అధికారులతో భేటీ అయ్యింది. అక్కడ ఒకటి ఆపై తరగతులకు ఉచిత నిర్బంధ విద్య అమల్లో ఉంది. 45 నిమిషాల తరగతి గది బోధన.. ఆ తర్వాత ప్రతి పీరియడ్‌కూ 15 నిమిషాల విరామం ఇస్తున్నారు. ఈ బృందం అధ్యయనం చేసిన కొన్ని అంశాలను, ఆ దేశ విద్యావిధానం విశేషాలను విద్యాశాఖ విడుదల చేసింది.

కొన్ని ప్రత్యేకతలిలా..

• ఈ దేశంలో పిల్లల కేంద్రీకృత విద్యావిధానం అమల్లో ఉంది. ఏమి నేర్చుకోవాలో కాదు.. ఎలా నేర్చుకోవాలో టీచర్లు నేర్పిస్తారు.
• పాఠ్యప్రణాళిక సరళంగా ఉంటుంది. జీవన నైపుణ్యాలకు ప్రాధాన్యం ఇస్తారు.
• మాస్టర్‌ డిగ్రీ, టీచర్‌ ఎడ్యుకేషన్‌ డిగ్రీ అర్హతలున్న వారినే టీచర్లుగా నియమిస్తారు. మ్యూజిక్‌, కళలు, మీడియా, నృత్యం, హస్తకళలు, సాహిత్యకళలు వంటి సహపాఠ్య కార్యక్రమాలకు ప్రాధాన్యం ఇస్తున్నారు.
• కరిక్యులాన్ని టీచర్లే రూపొందిస్తారు. ఫిన్నిస్‌ జాతీయ విద్యాసంస్థ అందించిన పాఠ్యప్రణాళిక సూత్రాలను పాటించి టీచర్లు కరిక్యులం రూపొందించుకోవచ్చు.
• 1-6 తరగతుల బోధనకు టీచర్లను పునరావృతం చేస్తారు. అంటే సంవత్సరాల తరబడి టీచర్లు అదే విద్యార్థులతో కొనసాగుతారు.
• ఆరేండ్లలోపు ఉన్న చిన్నారులకు ఎర్లీ చైల్డ్‌కేర్‌ ఎడ్యుకేషన్‌ అందిస్తారు. ఏడేండ్లు నిండితేనే ఒకటో తరగతిలో చేర్చుకుంటారు. ఒకటో తరగతిలో చేరడానికి ముందు (6-7 ఏండ్ల వారికి) ప్రిపరేటరీ తరగతి తప్పనిసరి.
• ప్రాథమిక తరగతుల్లో ఒక క్లాస్‌లో 20 మంది, 7-9 తరగతుల్లో తరగతికి 25 మంది విద్యార్థులు మాత్రమే ఉంటారు.
• 1-2 తరగతులకు వారంలో 21పీరియడ్లు, 3-4 తరగతులకు 26, 5 -6 తరగతులకు 28-30 పీరియడ్లు ఉంటాయి.
• 9వ తరగతి వరకు వార్షిక పరీక్షలుండవు. నిరంతర మూల్యాంకనం కొనసాగుతుంది. స్కూళ్లకు ర్యాంకులిచ్చే సంస్కృతి లేదు.